(વાણિજ્ય પ્રતિનિધિ તરફથી)
મુંબઈઃ સ્થાનિક જથ્થાબંધ ધાતુ બજારમાં છેલ્લાં બે સત્ર દરમિયાન વિવિધ ધાતુઓમાં નરમાઈનું વલણ રહ્યા બાદ આજે લંડન મેટલ એક્સચેન્જના પ્રોત્સાહક અહેવાલો સાથે ખાસ કરીને નિકલ, કોપર તથા બ્રાસની અમુક વેરાઈટીઓમાં ઘટ્યા મથાળેથી સ્ટોકિસ્ટોની લેવાલી નીકળતાં ભાવમાં કિલોદીટ રૂ. બેથી ચારનું બાઉન્સબૅક જોવા મળ્યું હતું. જોકે આજે ટીન, બ્રાસ શીટ કટિંગ્સ અને એલ્યુમિનિયમ ઈન્ગોટ્સમાં સ્ટોકિસ્ટોની છૂટીછવાઈ વેચવાલી અને વપરાશકારોની માગ પણ નિરસ રહેતાં ભાવમાં અનુક્રમે કિલોદીઠ રૂ. સાત, રૂ. ચાર અને રૂ. એકનો ઘટાડો આવ્યો હતો, જ્યારે અન્ય ધાતુઓમાં ટકેલું વલણ રહ્યું હતું.
બજારનાં સાધનોના જણાવ્યાનુસાર આજે ચોક્કસ ધાતુઓમાં ઘટ્યા મથાળેથી નીકળેલી સ્ટોકિસ્ટોની લેવાલી ઉપરાંત વપરાશકાર ઉદ્યોગ તથા સ્થાનિક ડીલરોની લેવાલીને ટેકે બાઉન્સબૅક જોવા મળ્યું હતું તેમાં નિકલ અને કોપર કેબલ સ્ક્રેપના ભાવ કિલોદીઠ રૂ. ચાર વધીને અનુક્રમે રૂ. 1352 અને રૂ. 874, કોપર આર્મિચર, બ્રાસ યુટેન્સિલ્સ સ્ક્રેપ અને કોપર વાયરબારના ભાવ કિલોદીઠ રૂ. ત્રણ વધીને અનુક્રમે રૂ. 847, રૂ. 578 અને રૂ. 949 તથા કોપર યુટેન્સિલ્સ સ્ક્રેપના ભાવ કિલોદીઠ રૂ. બે વધીને રૂ. 777ના મથાળે રહ્યા હતા.
જોકે, આજે ટીન અને બ્રાસ શીટ કટિંગ્સમાં સ્ટોકિસ્ટોની અવિરત વેચવાલીનું દબાણ જળવાઈ રહેતાં ભાવ અનુક્રમે કિલોદીઠ રૂ. સાત ઘટીને રૂ. 3106 અને રૂ. ચાર ઘટીને રૂ. 620ના મથાળે તથા નિરસ માગે એલ્યુમિનિયમ ઈન્ગોટ્સના ભાવ કિલોદીઠ રૂ. એકના ઘટાડા સાથે રૂ. 252ના મથાળે રહ્યા હતા. આ સિવાય આજે ખપપૂરતી માગને ટેકે કોપર સ્ક્રેપ હેવીના ભાવ કિલોદીઠ રૂ. 861, એલ્યુમિનિયમ યુટેન્સિલ્સ સ્ક્રેપના ભાવ કિલોદીઠ રૂ. 218, ઝિન્ક સ્લેબના ભાવ કિલોદીઠ રૂ. 280 અને લીડ ઈન્ગોટ્સના ભાવ કિલોદીઠ રૂ. 182ના મથાળે ટકેલા રહ્યાના અહેવાલ હતા.
આ પણ વાંચો…મર્યાદિત કામકાજે બ્રાસ શીટ કટિંગ્સ સિવાયની ચોક્કસ ધાતુમાં નરમાઈ
