આજથી શરૂ થશે સ્વચ્છતા અભિયાન 3.0નો પ્રથમ તબક્કો
આજથી દેશભરમાં ત્રીજા સ્વચ્છતા અભિયાનનો પ્રથમ તબક્કો શરૂ થશે. આ અભિયાનનો પ્રથમ તબક્કો 15 થી 30 સપ્ટેમ્બર સુધી ચાલશે. આ તબક્કામાં તમામ મંત્રાલયો અને વિભાગો સ્વચ્છતા અંગેના પેન્ડિંગ કેસો અને સ્વચ્છતા માટેની જગ્યાઓની ઓળખ કરશે. નિકાલ કરવા યોગ્ય બિનજરૂરી સામગ્રીના જથ્થાનું પણ મૂલ્યાંકન કરવામાં આવશે.
આ અભિયાનનો બીજો તબક્કો ગાંધી જયંતિ એટલે કે 2જી ઓક્ટોબરથી શરૂ થશે, જે 31મી ઓક્ટોબર સુધી ચાલશે, આ અમલીકરણનો તબક્કો હશે. આ તબક્કામાં તમામ મંત્રાલયો અને વિભાગો પ્રારંભિક તબક્કામાં નક્કી કરાયેલા લક્ષ્યોને પ્રાપ્ત કરવાના પ્રયાસો કરશે. વહીવટી સુધારણા વિભાગ આ સંદર્ભમાં એકીકૃત અહેવાલ પણ તૈયાર કરશે. જે કેબિનેટ સચિવાલય અને પીએમઓને સોંપવામાં આવશે. આ અભિયાનનો ઉદ્દેશ્ય અન્ય કચરાના નિકાલ દ્વારા આવક પેદા કરવાના પગલાં પર ધ્યાન કેન્દ્રિત કરવાનો છે.
કેન્દ્રીય રાજ્ય પ્રધાન જિતેન્દ્ર સિંહે ગઈ કાલે ગુરુવારે નવી દિલ્હીમાં વિશેષ સ્વચ્છતા અભિયાન 3.0નું વેબ પોર્ટલ લોન્ચ કર્યું હતું. આ પ્રસંગે તેમણે કહ્યું હતું કે વડાપ્રધાન નરેન્દ્ર મોદીએ સ્વચ્છતા અભિયાનને જન આંદોલનમાં ફેરવી દીધું છે અને લોકોએ તેને સામાજિક સુધારણા આંદોલન તરીકે સ્વીકાર્યું છે. સામાન્ય માણસની મૂળભૂત સમસ્યાઓના નિવારણ માટે સરકાર મિશન મોડમાં કામ કરી રહી છે.
