ફાળો ઉઘરાવી બનેલી સ્મિતા પાટીલની આ ફિલ્મ હવે જશે કાન્સ ફિલ્મ ફેસ્ટિવલમાં
Smita Patilની શ્રેષ્ઠ ફિલ્મોમાંની એક એવી મંથન ફિલ્મ કાન્સ ફિલ્મ ફેસ્ટિવલ (CANNES FILM FESTIVAL)માં પહોંચી છે.
ફિલ્મ મંથનને 4K (અલ્ટ્રા હાઇ ડેફિનેશન)માં રિસ્ટોર કરવામાં આવી છે. મંથન (Manthan)ની 4K ગુણવત્તાવાળી ફિલ્મ મે મહિનામાં યોજાનારા કાન્સ ફિલ્મ ફેસ્ટિવલ 2024માં રેડ કાર્પેટ વર્લ્ડ પ્રીમિયર માટે પસંદ કરવામાં આવી છે. 1976માં રિલીઝ થયેલી મંથન 10 લાખ રૂપિયાના બજેટમાં બની હતી. આ પણ પ્રથમ ક્રાઉડ-ફંડેડ ભારતીય ફિલ્મ હતી.
ગુજરાત કો-ઓપરેટિવ મિલ્ક માર્કેટિંગ ફેડરેશન લિમિટેડ (GCMMF) દ્વારા નિર્મિત 1976માં રિલીઝ થયેલી શ્યામ બેનેગલની ફિચર ફિલ્મ મંથનને 77માં કાન્સ ફિલ્મ ફેસ્ટિવલમાં સ્ક્રીનિંગ માટે પસંદ કરવામાં આવી છે.
મૂળ બ્રાન્ડ નામ હેઠળ દૂધ અને દૂધની બનાવટોનું વેચાણ કરતી GCMMF તેની સુવર્ણ જયંતિની ઉજવણી કરી રહી છે. મંથન મે મહિનામાં યોજાનારા કાન્સ ફિલ્મ ફેસ્ટિવલ 2024માં રેડ કાર્પેટ વર્લ્ડ પ્રીમિયર માટે પસંદ કરવામાં આવી છે. મંથન એકમાત્ર ભારતીય ફિલ્મ છે જેને આ વર્ષે ફેસ્ટિવલના કાન્સ ક્લાસિક વિભાગ હેઠળ પસંદ કરવામાં આવી છે.
અત્રે ઉલ્લેખનીય છે કે ભારતની શ્વેત ક્રાંતિના પિતા ડો. વર્ગીસ કુરિયન દ્વારા પ્રેરિત દૂધ સહકારી ચળવળથી મંથન પ્રેરિત છે. આ ફિલ્મે ડેરી સહકારી ચળવળ પર ભારે અસર કરી છે. તેણે દેશભરના લાખો ખેડૂતોને સ્થાનિક ડેરી સહકારી સંસ્થાઓ બનાવવા માટે એકસાથે આવવા પ્રેરિત કર્યા અને દૂધ ઉત્પાદનમાં આત્મનિર્ભરતા તરફ ભારતની સફરમાં મોટો ફાળો આપ્યો છે. મંથન (Manthan)ફિલ્મે લોકોને વિશ્વાસ અપાવ્યો કે પશુપાલન અને દૂધ ઉત્પાદન આજીવિકાનું સમૃદ્ધ માધ્યમ બની શકે છે. ભારત 1998માં વિશ્વનો સૌથી મોટો દૂધ ઉત્પાદક દેશ બન્યો અને ત્યારથી આ સ્થિતિ જાળવી રાખી છે.
સ્મિતા પાટીલ, નસીરુદ્દીન શાહ, ગિરીશ કર્નાડ અને અમરીશ પુરી જેવા કલાકારોએ ફિલ્મને માણવા લાયક બનાવી છે.
10 લાખના બજેટ સાથે બનેલી, મંથન પ્રથમ ક્રાઉડ-ફંડેડ ભારતીય ફિલ્મ હતી, જેમાં તે સમયે GCMMFમાં તમામ 5 લાખ ડેરી ખેડૂતોએ તેના ઉત્પાદન ખર્ચને પહોંચી વળવા માટે 2 રૂપિયાનું યોગદાન આપ્યું હતું.
ફિલ્મને 1977માં હિન્દીમાં શ્રેષ્ઠ ફિચર ફિલ્મ માટેનો રાષ્ટ્રીય ફિલ્મ પુરસ્કાર અને વિજય તેંડુલકરને શ્રેષ્ઠ પટકથા માટેનો રાષ્ટ્રીય ફિલ્મ પુરસ્કાર મળ્યો હતો. તે 1976 માં શ્રેષ્ઠ વિદેશી ભાષાની ફિલ્મ માટે એકેડેમી એવોર્ડ માટે ભારતે નોંધાવી હતી.
