પાકિસ્તાનની ચૂંટણીમાં ગોટાળા! ઈમરાન ખાને અમેરિકા પાસે માંગી મદદ

ઇસ્લામાબાદઃ પાકિસ્તાનની ચૂંટણીમાં ધાંધલધમાલનો મામલો અમેરિકા સુધી પહોંચ્યો છે. એવું કહેવામાં આવી રહ્યું છે કે જેલમાં બંધ પાકિસ્તાનના ભૂતપૂર્વ વડા પ્રધાન ઇમરાન ખાને ગુરુવારે અમેરિકાને મદદની વિનંતી કરી હતી કે તેઓ તેમના દેશમાં તાજેતરની સામાન્ય ચૂંટણીઓમાં થયેલા ગોટાળા સામે અવાજ ઉઠાવે.

નોંધનીય છે કે ઓગસ્ટ 2018માં વડાપ્રધાન બનેલા ઈમરાન ખાનને એપ્રિલ 2022માં અવિશ્વાસના મત દ્વારા હટાવવામાં આવ્યા હતા. હાલમાં, તેઓ રાવલપિંડીની અદિયાલા જેલમાં બંધ છે. તેઓ ઘણા કેસોમાં સજાનો સામનો કરી રહ્યા છે. ઈમરાન ખાનની પાકિસ્તાન તહરીક-એ-ઈન્સાફ (PTI) પાર્ટીએ આરોપ લગાવ્યો છે કે 8 ફેબ્રુઆરીની સામાન્ય ચૂંટણીઓ નિષ્પક્ષ રીતે હાથ ધરવામાં આવી ન હતી અને ચૂંટણી પરિણામોમાં ધાંધલ ધમાલ કરવામાં આવી હતી.

પાકિસ્તાન મુસ્લિમ લીગ-નવાઝ (PML-N), પાકિસ્તાન પીપલ્સ પાર્ટી (PPP) અને પાકિસ્તાન તહરીક-એ-ઈન્સાફ (PTI) સહિત ત્રણમાંથી કોઈપણ પક્ષને 8 ફેબ્રુઆરીના રોજ યોજાયેલી ચૂંટણીમાં નેશનલ એસેમ્બલીમાં બહુમતી મળી નથી. તેથી, આમાંથી કોઈ પણ પક્ષ એકલા હાથે સરકાર બનાવવા માટે સક્ષમ નથી.

ઈમરાન ખાનની પાર્ટી પીટીઆઈ દ્વારા સમર્થિત 100 થી વધુ અપક્ષ ઉમેદવારો જીત્યા છે, પરંતુ પાર્ટીએ આરોપ લગાવ્યો છે કે ચૂંટણીમાં ગોટાળો થયો છે. પીટીઆઈના નેતા અસદ કૈસરે રાવલપિંડીની અદિયાલા જેલમાં પાર્ટીના નેતાઓની બેઠક બાદ મીડિયાને જણાવ્યું હતું કે પાર્ટીએ ઓમર અયુબ ખાનને તેના વડાપ્રધાન પદના ઉમેદવાર તરીકે નામાંકિત કર્યા છે. કૈસરે કહ્યું હતું કે ઈમરાન ખાને સંદેશ આપ્યો છે કે અમેરિકાએ ચૂંટણીમાં કથિત ધાંધલધમાલ અને ગોટાળા સામે અવાજ ઉઠાવવો જોઈએ. તેમણે કહ્યું છે કે અમેરિકાએ તેની ભૂમિકા યોગ્ય રીતે ભજવી નથી.

પીટીઆઈના અધિકારીએ દાવો કર્યો હતો કે ઈમરાન ખાને એવો સંદેશ આપ્યો છે કે અમેરિકા પાસે તક છે અને તેણે પાકિસ્તાનની ચૂંટણીમાં થયેલી ધાંધલધમાલ સામે અવાજ ઉઠાવવો જોઈએ. અમેરિકા લોકશાહીનું સમર્થક છે તો તેણે અવાજ ઉઠાવવો જોઈએ. દરમિયાન, અમેરિકાએ હાલમાં પાકિસ્તાનમાં પારદર્શક ચૂંટણી પ્રક્રિયા સુનિશ્ચિત કરવાની હાકલ કરી હતી અને કહ્યું હતું કે પાકિસ્તાની લોકોની ઇચ્છાનું સન્માન કરવાની જરૂર છે.