IND vs ENG: રાજકોટમાં ભારત-ઇંગ્લેન્ડ વચ્ચે રમાનારી ટેસ્ટ અંગે A to Z અપડેટ જાણો…
રાજકોટ/નવી દિલ્હી/કેપટાઉનઃ ભારત અને ઇંગ્લેન્ડ વચ્ચેની ત્રીજી ટેસ્ટ મેચ 15મી ફેબ્રુઆરીના રમાશે, જેમાં આ મેચ રાજકોટમાં રમાશે, પરંતુ આ મેચ પહેલા ભારતીય ટીમને સૌથી મોટો ઝટકો લાગ્યો છે. હવે ટીમ ઈન્ડિયાના વિકેટકિપર કેએલ રાહુલ રમી શકશે નહીં.
આ અગાઉ કેએલ રાહુલ અને રવિન્દ્ર જાડેજાની ફિટનેસના આધારે નિર્ણય લેવામાં આવશે, પરંતુ હવે સમાચાર મળી રહ્યા છે કે રાહુલ મેચમાં રમી શકશે નહીં, જ્યારે રાજકોટમાં રવિન્દ્ર જાડેજા રમશે. કેએલ રાહુલની જગ્યાએ દેવદત્ત પડ્ડિકલને રમવાની તક મળશે.
અબુ ધાબીમાં એક સપ્તાહના આરામ બાદ ઇગ્લેન્ડની ક્રિકેટ ટીમ સોમવારે ભારત પહોંચી છે. ઇગ્લેન્ડની ટીમ રાજકોટ પહોંચી ગઇ છે. ભારત સામેની ત્રીજી ટેસ્ટ મેચ રાજકોટમાં 15 ફેબ્રુઆરીથી રમાશે. બીજી બાજુ ઇંગ્લેન્ડ વતીથી બેન સ્ટોક્સ પોતાની કારકિર્દીની 99 ટેસ્ટ મેચ રમી ચૂક્યો છે, પરંતુ રાજકોટની મેચ 100મી હશે.
અત્યાર સુધીમાં જેમ્સ એન્ડરસન, એલિસ્ટર કુલ અને જો રુટ જેવા ખેલાડી 100 ટેસ્ટ રમવાની યાદીમાં સ્થાન ધરાવે છે. એનાથી સૌથી મોટી વાત એ છે કે ટીમ ઈન્ડિયા વતીથી સચિન તેંડુલકરે 200 ટેસ્ટ મેચ રમીને 15,000 રનનો વિક્રમ નોંધાવ્યો છે.
ઈંગ્લેન્ડની જાહેર કરેલી ટીમમાં બેન સ્ટોક્સ (કેપ્ટન), રેહાન અહેમદ, જેમ્સ એન્ડરસન, ગુસ એટકિન્સન, જોની બેરસ્ટો, શોએબ બશીર, હેરી બ્રુક, જેક ક્રાઉલી, બેન ડકેટ, બેન ફોક્સ, ટોમ હાર્ટલી, જેક લીચ, ઓલી પોપ, ઓલી રોબિન્સન, જો રૂટ, માર્ક વુડ રમશે.
દરમિયાન ઈંગ્લેન્ડના ભૂતપૂર્વ ઝડપી બોલર સ્ટુઅર્ટ બ્રોડનું માનવું છે કે ટેસ્ટ શ્રેણીમાં વિરાટ કોહલીની ગેરહાજરી આ શ્રેણી અને રમત માટે સારી નથી પરંતુ તેની ગેરહાજરીમાં ઈંગ્લેન્ડ પાસે ભારતને હરાવવાની ગોલ્ડન તક છે. નોંધનીય છે કે વિરાટ અંગત કારણોસર શ્રેણીમાંથી બહાર છે જ્યારે ભારતે બીજી ટેસ્ટ જીતીને પાંચ મેચની શ્રેણી 1-1થી બરાબર કરી છે.
બ્રોડે અહીં ઈન્ટરવ્યૂમાં કહ્યું હતું કે “વિરાટ પોતાના જુસ્સા, આક્રમકતા અને શાનદાર રમતથી કોઈપણ સ્પર્ધાને શાનદાર બનાવે છે. દર્શકો તેની રમત જોવા આતુર છે. પરંતુ ક્રિકેટ સંબંધિત મુદ્દાઓ કરતાં વ્યક્તિગત મુદ્દા હંમેશા મોટા હોય છે. તેમનું માનવું છે કે વિરાટની ગેરહાજરી યુવા ખેલાડીઓ માટે પોતાની પ્રતિભા સાબિત કરવાની સુવર્ણ તક હશે.
ઉલ્લેખનીય છે કે આ અગાઉ ઇગ્લેન્ડની ટીમ બીજી ટેસ્ટ બાદ અબુ ધાબીમાં આરામ માટે પહોંચી હતી. નોંધનીય છે કે પાંચ ટેસ્ટ મેચની સીરિઝ 1-1થી બરાબરી પર છે. પ્રથમ ટેસ્ટ ઇગ્લેન્ડે તો બીજી ટેસ્ટ મેચ ભારતે જીતી હતી.