પટનાઃ લગ્નમાં જાનને સાચવવામાં કોઈ કમી રહી ન જાય તેનું ધ્યાન જે રીતે છોકરીવાળા રાખતા તે રીતે વિપક્ષોએ પોતાના વિધાનસભ્યોનું ધ્યાન રાખવું પડે તેવી સ્થિતિ ભારતના રાજકારણમાં આવી ગઈ છે. આવતીકાલે એટલે કે સોમવારે બિહાર સરકારનો ફ્લોર ટેસ્ટ છે જ્યારે આરજેડીના વિધાનસભ્યો નીતિશ સરકારમાં ન જોડાઈ જાય તેનું ધ્યાન રાખવા લાલુપ્રસાદ યાદવના ઘરમાં જ વિધાનસભ્યો મટે વ્યવસ્થા કરવામાં આવી છે.
સોમવારે યોજાનારી ફ્લોર ટેસ્ટ પહેલા બિહારમાં રાજકીય ગરમાવો વધી ગયો છે. જ્યાં એક તરફ આરજેડીના નેતા તેજસ્વી યાદવે પાર્ટીના તમામ ધારાસભ્યોને તેમના નિવાસસ્થાન પર બેસાડ્યા છે, તો બીજી તરફ બીજેપી બોથગયામાં પોતાના ધારાસભ્યોને ટ્રેનિંગ આપી રહી છે. તે જ સમયે, નીતિશ કુમારની પાર્ટી જેડીયુના 5 ધારાસભ્યો કેબિનેટ પ્રધાન શ્રવણ કુમારના ઘરે આયોજિત લંચમાં સામેલ થયા ન હતા, જેના પછી ઘણી અટકળો લગાવવામાં આવી રહી છે.
RJD ધારાસભ્યોએ તેજસ્વી યાદવના ઘરે રાત વિતાવી હતી અને તેમની કેટલીક તસવીરો પણ સામે આવી છે. આ તમામ ધારાસભ્યો તેજસ્વી યાદવના 5 દેશરત્ન માર્ગ સ્થિત આવાસ પર રોકાયા છે. પહેલા ધારાસભ્યોનો સામાન તેમના સુધી પહોંચાડવામાં આવ્યો અને પછી તેમના માટે રાત્રિભોજનની વિશેષ વ્યવસ્થા કરવામાં આવી. સવારે ધારાસભ્યોને ચા આપવામાં આવી હતી અને હવે નાસ્તા અને ભોજનની વ્યવસ્થા કરવામાં આવી રહી છે. ધારાસભ્યોની સંખ્યા વધુ હોવાથી તેમના માટે સોથી વધુ ખાટલાઓની વ્યવસ્થા કરવામાં આવી હતી.
દરમિયાન, JDUએ નવી રચાયેલી NDA સરકારના વિશ્વાસ મત દરમિયાન સોમવારે પાર્ટીના તમામ ધારાસભ્યોની હાજરી સુનિશ્ચિત કરવા માટે વ્હિપ જારી કર્યો છે. જેડીયુના મુખ્ય દંડક અને રાજ્ય સરકારમાં મંત્રી શ્રવણ કુમારે કહ્યું કે જે ધારાસભ્યો વ્હીપનું ઉલ્લંઘન કરશે તેઓ તેમનું સભ્યપદ ગુમાવશે. કુમાર એવા મંત્રી છે જેમણે તેમના નિવાસસ્થાને JDU ધારાસભ્યો માટે લંચનું આયોજન કર્યું હતું જેમાં પાંચ ધારાસભ્યો આવ્યા નહોતા, ત્યારબાદ તમામ પ્રકારની અટકળો શરૂ થઈ હતી.
આ અંગે શ્રવણ કુમારે કહ્યું કે, ‘અમારા કેટલાક ધારાસભ્યો ખરાબ તબિયતના કારણે આવી શક્યા નથી. તેમણે એવી અટકળોને પણ નકારી કાઢી હતી કે પક્ષના અધ્યક્ષ અને મુખ્ય પ્રધાન નીતિશ કુમાર લંચ પર હાજર બહુ ઓછા ધારાસભ્યોને જોઈને નારાજ થયા હતા અને ગુસ્સામાં પ્રધાનના નિવાસસ્થાનમાંથી બહાર નીકળી ગયા હતા.
બિહાર વિધાનસભામાં કુલ 243 સભ્ય છે, જેમાંથી NDAના ધારાસભ્યોની સંખ્યા 128 છે, જે બહુમતીના આંકડા કરતા 6 વધુ છે. જ્યારે વિપક્ષી મહાગઠબંધન પાસે 114 સભ્યો છે. મહાગઠબંધનમાં આરજેડી, કોંગ્રેસ, સીપીઆઈ (એમએલ), કોમ્યુનિસ્ટ પાર્ટી ઓફ ઈન્ડિયા (સીપીઆઈ) અને કોમ્યુનિસ્ટ પાર્ટી ઓફ ઈન્ડિયા (માર્કસવાદી) સામેલ છે. આવતીકાલે ફ્લોર ટેસ્ટ દેશનો હોટ ટોપિક બની ગયો છે અને હજુ કોઈ નવો વળાંક બિહારના રાજકારણમાં આવે તો પણ નવાઈની વાત ન લાગે તેવી ઉથલપાથલ અહીં જોવા મળી છે.
