થિયેટરોમાં ધમાલ મચાવ્યા બાદ ખિચડી-2ની ડિજીટલ સવારી! આ તારીખે ડિજીટલ પ્લેટફોર્મ પર જોઇ શકાશે
દર્શકોને ખડખડાટ હસાવનારી ફિલ્મ ‘ખિચડી-2: મિશન પાનથુકીસ્તાન’ના OTT પ્રિમિયરની જાહેરાત થઇ ચુકી છે. હંસા, પ્રફૂલ, બાબુજી અને જયશ્રી તેમના અલગ અલગ ગતકડાંથી ફરી એકવાર દર્શકોનું ભરપૂર મનોરંજન કરતા જોવા મળશે. પારેખ પરિવાર 9 ફેબ્રુઆરીએ ZEE-5 પર ધમાલ મચાવશે.
સુપ્રિયા પાઠક, રાજીવ મહેતા, અનંગ દેસાઇ, વંદના પાઠક, જમનાદાસ મજેઠિયા, કિર્તી કુલ્હારી જેવા કલાકારોએ પોતાની શાનદાર એક્ટિંગથી દર્શકોને ખૂબ હસાવ્યા છે. ખિચડીના પહેલા ભાગમાં પણ આ કલાકારોએ પોતાના દમદાર અભિનયથી થિયેટરમાં હાસ્યની છોળો ઉડાડી હતી. વર્ષ 2010માં ખિચડી-ધ મુવી રિલીઝ થયું હતું.
જેમાં હિમાંશુના પાત્રના લગ્નની વાર્તા હતી. કિર્તી કુલ્હારીએ પણ આ ફિલ્મમાં મહત્વની ભૂમિકા ભજવી હતી. હવે ફરીએકવાર આખી ટીમ દર્શકોને હસાવવા માટે તૈયાર છે. હવે ખિચડીના બીજા ભાગમાં પારેખ પરિવાર દુનિયાને બચાવવા એક મિશન પર નીકળે છે. ફરાહ ખાન અને પ્રતિક ગાંધીનો કેમિયો પણ જોવા મળશે.
ફેમસ સીટકોમ ખિચડીએ લાંબા સમય સુધી દર્શકોને હસાવ્યા છે. છેક 2002માં આ સિરીયલે તેની હાસ્યયાત્રાની શરૂઆત કરી હતી. જે.ડી. મજેઠિયા અને આતિશ કાપડિયાના હેટ્સ ઓફ પ્રોડક્શનના બેનર તળે ખિચડી સિરીયલનું નિર્માણ થયું હતું. એ પછી ઈન્સ્ટન્ટ ખિચડી નામથી સીરિયલની બીજી સીઝન 2004માં પ્રસારિત થઈ જ્યારે 2010માં તે ફિલ્મ સ્વરૂપે મોટા પડદે આવી હતી.