ICCએ સર્વશ્રેષ્ટ ટેસ્ટ ટીમની કરી જાહેરાતઃ ભારતના સ્ટાર ક્રિકેટરને મળ્યું સ્થાન

દુબઇઃ ઇન્ટરનેશનલ ક્રિકેટ કાઉન્સિલ (આઈસીસી)એ વર્ષ 2023ની સર્વશ્રેષ્ઠ ટેસ્ટ ટીમની જાહેરાત કરી છે. ટીમની કેપ્ટનશિપ પેટ કમિન્સને સોંપવામાં આવી છે. આ ટીમમાં ઓસ્ટ્રેલિયન ખેલાડીઓનો દબદબો રહ્યો છે. સર્વશ્રેષ્ઠ ટેસ્ટ ટીમમાં ભારત અને ઈંગ્લેન્ડના બે-બે, શ્રી લંકા અને ન્યૂ ઝીલેન્ડના એક-એક ખેલાડી છે. ટીમમાં ચાર બેટ્સમેન, એક વિકેટકીપર, ત્રણ ઓલરાઉન્ડર અને ત્રણ ફાસ્ટ બોલર છે.

ઓપનિંગની જવાબદારી ઉસ્માન ખ્વાજા અને દિમુથ કરુણારત્નેને આપવામાં આવી છે. જ્યારે કેન વિલિયમ્સનને ત્રીજા નંબરે અને જો રૂટને ચોથા નંબરે રાખવામાં આવ્યો છે. ટીમમાં ટ્રેવિસ, રવિન્દ્ર જાડેજા અને રવિચંદ્રન અશ્વિન ત્રણ ઓલરાઉન્ડર છે. કમિન્સ, મિશેલ સ્ટાર્ક અને સ્ટુઅર્ટ બ્રોડ એમ ત્રણ ઝડપી બોલર છે. એલેક્સ કેરી ટીમમાં વિકેટકીપર બેટ્સમેન છે.

આ ટીમમાં પાકિસ્તાન, બાંગ્લાદેશ, વેસ્ટ ઈન્ડિઝ અને દક્ષિણ આફ્રિકાનો કોઈ ખેલાડી નથી. ભારત તરફથી માત્ર જાડેજા અને અશ્વિનને સ્થાન મળ્યું છે, જ્યારે ઓસ્ટ્રેલિયાના ખ્વાજા, હેડ, કેરી અને સ્ટાર્ક સ્થાન મેળવવામાં સફળ રહ્યા હતા. ઇંગ્લેન્ડના જો રૂટ અને સ્ટુઅર્ટ બ્રોડ પણ પ્લેઇંગ-11માં સ્થાન મેળવ્યું છે. બ્રોડે ગયા વર્ષે જ આંતરરાષ્ટ્રીય ક્રિકેટમાંથી નિવૃત્તિ લીધી હતી. આ ઉપરાંત શ્રી લંકાના દિમુથ કરુણારત્ને અને ન્યૂ ઝીલેન્ડના કેન વિલિયમસન પણ આ ટીમમાં છે.

આઇસીસીની વર્ષ 2023ની શ્રેષ્ઠ ટેસ્ટ ટીમ

ઉસ્માન ખ્વાજા, દિમુથ કરુણારત્ને, કેન વિલિયમ્સન, જો રૂટ, ટ્રેવિસ હેડ, રવિન્દ્ર જાડેજા, એલેક્સ કેરી (વિકેટકીપર), પેટ કમિન્સ (કેપ્ટન), રવિચંદ્રન અશ્વિન, મિશેલ સ્ટાર્ક, સ્ટુઅર્ટ બ્રોડ.