મુર્શિદાબાદ: લોકસભા ચૂંટણી પહેલા પશ્ચિમ બંગાળમાં સીટોની વહેંચણીને બાબતે વિપક્ષી ગઠબંધન ‘INDIA’ ની અંદર જ ખેંચતાણ ચાલી રહી છે, તૃણમૂલ કોંગ્રેસ (TMC) ના વડા મમતા બેનર્જીએ શુક્રવારે એક નિવેદનમાં કહ્યું કે જો અમને “યોગ્ય મહત્વ” આપવામાં નહીં આવે તો પાર્ટી રાજ્યની તમામ 42 બેઠકો પર ચૂંટણી લડશે. અમે સ્વતંત્ર રીતે ચૂંટણી લડવા તૈયાર છે. પશ્ચિમ બંગાળના મુખ્ય પ્રધાન બેનર્જીએ પક્ષના મુર્શિદાબાદ જિલ્લા એકમની સંગઠનાત્મક બેઠક દરમિયાન આ વાત કહી હતી.
મમતા બેનર્જીની આ ટિપ્પણીઓ કોંગ્રેસના અધીર રંજન ચૌધરીના નિવેદન બાદ આવી છે, અધીર રંજન ચૌધરીએ કહ્યું હતું કે કોંગ્રેસ તૃણમૂલ કોંગ્રેસ પાસેથી બેઠકો માટે “ભીખ નહીં માંગે”.
મુર્શિદાબાદ લઘુમતી વસ્તી ધરાવતો વિસ્તાર મહત્વપૂર્ણ છે અને પરંપરાગત રીતે કોંગ્રેસનો ગઢ માનવામાં આવે છે. બેઠક દરમિયાન, મમતા બેનર્જીએ જિલ્લાની ત્રણેય લોકસભા બેઠકો પર ટીએમસીની જીતની જરૂરિયાત પર ભાર મૂક્યો અને પક્ષના નેતાઓને ચૂંટણી લડાઈ માટે તૈયાર રહેવા વિનંતી કરી.
ટીએમસીના એક વરિષ્ઠ નેતાએ જણાવ્યું હતું કે, “અમારી પાર્ટીના સુપ્રીમો મમતા બેનર્જીએ સ્પષ્ટપણે કહ્યું હતું કે ટીએમસી INDIA ગઠબંધનના સૌથી મહત્વપૂર્ણ ભાગીદારોમાંનું એક છે, પરંતુ બંગાળમાં અમને બાકાત કરીને જો RSP, CPI, CPI(M)ને વધુ મહત્વ આપવામાં આવે છે, તો અમે અમારો પોતાનો રસ્તો બનાવીશું અને તમામ 42 બેઠકો પર ચૂંટણી લડવાની અને જીતવાની તૈયારી કરવી જોઈએ.”
CPI(M)ની આગેવાની હેઠળનો ડાબેરી મોરચો, કોંગ્રેસ અને TMC સામૂહિક રીતે વિપક્ષી ગઠબંધન INDIAનો ભાગ છે. જોકે, પશ્ચિમ બંગાળ વિધાનસભા ચૂંટણી વખતે CPI(M) અને કોંગ્રેસે ટીએમસી અને ભાજપ વિરુદ્ધ ગઠબંધન કર્યું હતું.
રાજ્યમાં 2019ની ચૂંટણીમાં ટીએમસીએ 22 બેઠકો, કોંગ્રેસને બે બેઠકો અને ભાજપે 18 બેઠકો જીતી હતી. કોંગ્રેસના અધીર રંજન ચૌધરી ઉપરાંત પૂર્વ કેન્દ્રીય પ્રધાન અબુ હાસેમ ખાન ચૌધરીએ માલદા દક્ષિણ બેઠક પરથી સતત ત્રીજીવાર જીત મેળવી હતી.