કચ્છ બન્યું ઠંડુંગાર: નલિયા ૬.૪ ડિગ્રી લઘુતમ તાપમાન સાથે રાજ્યનું સૌથી ઠંડું મથક
(અમારા પ્રતિનિધિ તરફથી)
ભુજ:અબડાસા તાલુકાના મુખ્ય મથક નલિયા ખાતે આજે ૬.૪ ડિગ્રી સેલ્સિયસ જેટલું લઘુતમ તાપમાન નોંધાતા તીવ્ર ઠારથી જનજીવનને વ્યાપક અસર થવા પામી છે. વહેલી સવારે લોકો ઠેર ઠેર તાપણાં કરતા જોવા મળી રહ્યા છે,તેમજ પતંગ ઉડાડવા ધાબા પર ચડેલાં બાળકોથી માંડી મોટેરાં ટાઢથી ઠઠરી ઊઠ્યા છે. રણપ્રદેશ કચ્છ શીત સકંજાની ચપેટમાં આવી ગયું છે.
મહત્તમ અને લઘુતમ તાપમાનનો આંક ગણતરીના કલાકોમાં એકાએક ઘટી જતાં ઠંડીના અચાનક આક્રમણથી સંક્રાંતિ પર્વ ઉજવવાની તૈયારી કરી રહેલા લોકો ઊંઘતા ઝડપાયા છે. ભુજમાં આજે લઘુતમ તાપમાન ૧૨ ડિગ્રી સે. સાથે હાડ થીજાવતી ઠંડી પડી રહી છે.
અધુરામાં પૂરું મહત્તમ તાપમાન આજે ૨૬ ડિગ્રી સે. જેટલું નીચું આવી જતાં ભરબપોરે પણ તીવ્ર ઠંડીનો અહેસાસ થવા પામ્યો હતો. ઉત્તર પૂર્વ દિશા તરફથી પ્રતિકલાકે ૧૩ કિ.મિ.ની ઝડપે ફૂંકાતા ઠંડા પવનોએ જાણે સમગ્ર કચ્છને ટાઢુંબોળ બનાવી દીધું છે.
પૂર્વ કચ્છના રાપર અને ભારત પાકિસ્તાનની અંતરરાષ્ટ્રીય સરહદ પાસેના ગામો જેવાં કે,બાલાસર, લોદ્રાણી,બેલા,લાકડા વાંઢ, વૃજવાણીમાં તાપમાન ૧૦ ડિગ્રી સેલ્સિયસ કે તેથી ઓછું રહેવા પામતા ભારે ઠંડીનો સામનો કરવો પડી રહ્યો છે.
ઉતરાયણ પર્વને ગણતરીના કલાકો બાકી રહ્યા છે તેવામાં અવનવા રંગબેરંગી પતંગ,તલસાંકળી, ચીકી, કચરિયું, કાટલું જેવી પ્રણાલીગત વસ્તુઓની છેલ્લી ઘડીએ ખરીદી કરવા નીકળેલા લોકોને ઠંડીએ પરેશાન કરી નાખ્યા છે. આજે મહત્તમ તાપમાનનો આંક પ્રમાણમાં નીચો હોઈ,ભરબપોરે પણ લોકોને ઠંડીનો સામનો કરવો પડ્યો હતો. સાંજ પછી જાણે લોકડાઉન લદાયું હોય તેમ લોકોની અવરજવર પાંખી થઇ જવા પામી હતી.ઉ
