એલર્ટઃ મહારાષ્ટ્રમાં કિશોરીઓ પર આ બીમારીનું તોળાતું જોખમ
મુંબઈ: ભારતમાં ડાયાબિટીસના દર્દીઓ વધી રહ્યા છે અને લગભગ ૧૩ કરોડ નાગરિકો પ્રી-ડાયાબિટીસની સ્થિતિમાં છે. આમાં મહારાષ્ટ્રમાં ૩૯ ટકા કિશોરીઓને ડાયાબિટીસનું જોખમ વધારે છે, તેમાં ગ્રામીણ વિસ્તારોની છોકરીઓનું પ્રમાણ વધુ હોવાનું સર્વેમાં સ્પષ્ટ થયું છે.
પ્રી-ડાયાબિટીસ એ ગંભીર આરોગ્ય સ્થિતિ છે. આ તબક્કા દરમિયાન, લોહીમાં ગ્લુકોઝનું સ્તર વધે છે, પરંતુ તે ટાઇપ-૨ ડાયાબિટીસનું નિદાન કરવા માટે પૂરતું નથી. તદનુસાર રાજ્યમાં ૧૬થી ૧૮ વર્ષની વયજૂથની કિશોરીઓમાં ડાયાબિટીસનું સ્તર જાણવા માટે એક સર્વે હાથ ધરવામાં આવ્યો હતો. જેમાં ૧૫૨૦ યુવતીઓએ ભાગ લીધો હતો.
આ સહભાગી કિશોરીઓમાંથી, ૨ ટકાને પ્રી-હાઈપરટેન્શન અને ૧૨.૭ ટકામાં એચડીએલ ઓછું જોવા મળ્યું હતું. એ જ રીતે, સર્વેમાં જાણવા મળ્યું છે કે ૩૯ ટકા કિશોરવયની છોકરીઓને પ્રી-ડાયાબિટીસ હતું.
તાજેતરના એક અભ્યાસ મુજબ ભારતમાં લગભગ ૧૫.૪ ટકા શહેરીજનો અને ૧૫.૨ ટકા ગ્રામીણજનો પ્રિ-ડાયાબિટીક છે. તેવી જ રીતે ૨૦૨૧માં વિશ્વમાં ૨૯૮ મિલિયન લોકો પ્રી-ડાયાબિટીક હતા. ૨૦૪૫માં આ રકમ વધીને ૪૧૪ મિલિયન થવાની ધારણા છે. જીવનશૈલીમાં ફેરફાર કરીને અને સમયસર ચેક-અપ કરાવીને આપણે ડાયાબિટીસનું જોખમ કાયમ માટે ઘટાડી શકીએ છીએ.
