સાયન, કોળીવાડા, વડાલામાં પાણીના ધાંધિયા બે પાઈપલાઈનમાં ગળતર
(અમારા પ્રતિનિધિ તરફથી)
મુંબઈ: ઍન્ટોપ હિલમાં રાવજી ગણાત્રા માર્ગ જંકશન પાસે મંગળવારે ૬૦૦ મિલીમીટર વ્યાસની પાઈપલાઈનમાં ગળતર હોવાનું જણાઈ આવતા બાદ યુદ્ધના ધોરણે તેનું સમારકામ હાથ ધરવામાં આવ્યું હતું, જોકે તેને કારણે આખો દિવસ સાયન, કોલીવાડા, વડાલા અને એન્ટોપ હિલ જેવા પરિસરમાં પાણી પુરવઠો ખોરવાઈ ગયો હતો અને લોકોને ભારે હાલાકીનો સામનો કરવો પડ્યો હતો. બુધવારે કદાચ આ વિસ્તારમાં પાણીપુરવઠો પૂર્વવત્ થવાની શક્યતા છે.
પાલિકાના ‘એફ-ઉત્તર’ વોર્ડના ઍન્ટોપ હિલ પરિસરમાં રાવજી ગણાત્રા માર્ગ જકંશન, શેખ મિસરી માર્ગ, સી.જી.એસ. કૉલોની, સેકટર છ પાસે ૬૦૦ મિ.મિ. વ્યાસની પાઈપલાઈનનું મંગળવારે સમારકામ હાથ ધરવામાં આવ્યું હતુંં, તેને કારણે આખો દિવસ આ વોર્ડના મોટાભાગના વિસ્તારમાં પાણીપુરવઠો ખોરવાઈ ગયો હતો.
પાલિકાના જણાવ્યા મુજબ ઍન્ટોપ હિલ પરિસરમાં સોમવારે ૩૦૦ મિલીમીટર વ્યાસની પાણીની પાઈપલાઇમાં ગળતર નિર્માણ થયું હતું. સોમવારે પહેલી જાન્યુઆરીના તેની જાણ થતા જ યુદ્ધના ધોરણે સમારકામ હાથ ધરવામાં આવ્યું હતું. આ સમારકામ પૂરું કર્યા બાદ નજીકમાં અન્ય ૬૦૦ મિ.મી. વ્યાસની પાઈપલાઈનમાં પણ ગળતર હોવાનું જણાઈ આવ્યું હતું. તેથી આ પાઈપલાઈનનું સમારકામ પણ હાથમાં લેવામાં આવ્યું હતું. જોકે ટેક્નિકલી દ્દષ્ટિએ આ કામ અત્યંત પડકારજનક હોવાને કારણે તેમાં ખાસ્સો એવો સમય લાગશે એવું પાલિકાએ જણાવ્યું હતું.
૩૦૦ મિ.મિ. વ્યાસની પાઈપલાઈનનું સમારકામ મંગળવારે સવારના પૂરું કરવામાં સફળતા મળી હતી. ત્યારબાદ સી.જી.એસ કૉલોની, મહાત્મા ગાંધી નગર, ભારતીય કમલા નગર જેવા વિસ્તારમાં પાણીપુરવઠો પૂર્વવત્ થયો હતો. તો ૬૦૦ મિ.મિ. વ્યાસની પાઈપલાઈનના સમારકામમાં સમય લાગવાનો દાવો પ્રશાસને કર્યો હતો. તેથી મંગળવારે આખા દિવસ દરમિયાન ‘એફ-ઉત્તર’ વોર્ડમાં કોકરી આગ, વિજય નગર, સંગમ નગર, દોસ્તી એકર્સ, હિમ્મત નગર, શાંતી નગર, આઝાદ મોહલ્લા, ઍન્ટોપ હિલ, વડાલા (પૂર્વ), ગણેશ નગર, શિવશંકર નગર,નેહરુ નગર, ઈંદિરા નગર, વડાલા ટ્રાન્ઝિટ કૅમ્પ, પંજાબી કોલોની, સેવા સમિતિ, મ્હાડા કોલોની, સાયન કોળીવાડા, બી.પી.ટી, બંગાલીપુરા, રાજીવ ગાંધી નગર જેવા વિસ્તારમાં પાણી પુરવઠો ખોરવાઈ ગયો હતો.
પાઈપલાઈનમાં જ્યાં ગળતર છે તે જગ્યા અત્યંત સાંકડી હોવાથી સમારકામમાં કરવામાં મુશ્કેલી આવી રહી છે. આ સમારકામ મંગળવારે મોડી રાતે પૂરું થયા બાદ બુધવારથી પાણીપુરવઠો પૂર્વવત્ થશે એવો દાવો પ્રશાસને કર્યો હતો.
