ભારતે ખલિસ્તાની નેતાને ત્રાસવાદી જાહેર કર્યો
નવી દિલ્હી: ગૃહ મંત્રાલયે કેનેડા સ્થિત ગેંગસ્ટર લખબીર સિંહ લાંડાને આતંકવાદી જાહેર કર્યો છે. લખબીર સિંહ લાંડા આતંકવાદી મોડ્યુલ, પંજાબમાં આઇઇડી લાવવા, શસ્ત્રો અને માદક દ્રવ્યોની દાણચોરી કરવી અને ભંડોળ અથવા તેની આવકનો ઉપયોગ પંજાબમાં આતંકવાદી કૃત્યો માટે કરવા સહિત ખંડણી અને હત્યાઓ સાથે સંબંધિત વિવિધ ગુનાહિત કેસોમાં પણ સામેલ છે. ગૃહ મંત્રાલય
દ્વારા એક સત્તાવાર રિલીઝ મુજબ ગેરકાયદેસર પ્રવૃત્તિઓ (નિવારણ) અધિનિયમ ૧૯૬૭ની વિવિઘ કલમ હેઠળ જો કોઈ વ્યક્તિ આતંકવાદમાં સામેલ હોવાની માન્યતા હોય તો તેનું નામ ચોથી અનુસૂચિમાં ઉમેરી શકે છે. ગેરકાયદેસર પ્રવૃતિઓ (નિવારણ) અધિનિયમ, ૧૯૬૭ની કલમ ૩૫ની પેટા-કલમ (૧) ની કલમ (એ) દ્વારા આપવામાં આવેલી સત્તાઓનો ઉપયોગ કરીને, કેન્દ્ર સરકાર આથી આ અધિનિયમની ચોથી અનુસૂચિમાં આ સુધારો કરે છે.
સત્તાવાર રિલીઝ મુજબ ૦૯/૬/૨૦૨૧ના લુક આઉટ સર્ક્યુલર નંબર ૨૧૪૪૩૦૬ પ્રમાણે લખબીર સિંહ લાંડા વિરુદ્ધ ઓપન-એન્ડેડ વોરંટ જારી કરવામાં આવ્યું છે.
લખબીર સિંહ લાંડા, તેના સાથીદારો સાથે, આતંકવાદી મોડ્યુલ સ્થાપિત કરવા, ગેરવસૂલી કરવા, હત્યા કરવા, ઇમ્પ્રુવાઇઝ્ડ એક્સપ્લોઝિવ ડિવાઇસ પ્લાન્ટ કરવા, હથિયારો અને માદક દ્રવ્યોની દાણચોરી અને પંજાબમાં આતંકવાદી પ્રવૃત્તિઓ અને દેશના અન્ય વિવિધ પ્રદેશો માટે ભંડોળનો ઉપયોગ કરવા સાથે સંકળાયેલા બહુવિધ ગુનાહિત કેસોમાં ફસાયેલા છે.
વધુમાં, લાંડા અને તેના જૂથો દેશના જુદા જુદા ભાગોમાં લક્ષિત હત્યાઓ, હુમલાઓ અને અન્ય પ્રવૃત્તિઓ દ્વારા પંજાબમાં શાંતિ, કાયદો અને વ્યવસ્થાને ખલેલ પહોંચાડવાના કાવતરામાં સામેલ છે.
આ વર્ષે ઑગસ્ટમાં એનઆઇએની વિશેષ અદાલતે તરનતારન જિલ્લાના કિરિયન ગામમાંથી ફરાર થયેલા ખાલિસ્તાન સમર્થક આતંકવાદીની સંપત્તિ જપ્ત કરવાનો આદેશ આપ્યો હતો. તેને અગાઉ ૨૭ જુલાઈ, ૨૦૨૩ના રોજ અપરાધી જાહેર કરવામાં આવ્યો હતો.
