પ્રતિબંધિત દવાઓ લઇ રહ્યા હતા બે ખેલાડીઓ, ઝિમ્બાબ્વે ક્રિકેટે કર્યા સસ્પેન્ડ
નવી દિલ્હી: ઝિમ્બાબ્વે ક્રિકેટે તેના બે આંતરરાષ્ટ્રીય ખેલાડીઓને સસ્પેન્ડ કરી દીધા છે. વેસ્લે મધવીરે અને બ્રેન્ડન માવુતાને સસ્પેન્ડ કરવામાં આવ્યા છે. આ બંને ખેલાડીઓ પ્રતિબંધિત દવાઓનું સેવન કરતા હતા. ડોપ ટેસ્ટમાં પોઝિટિવ આવ્યા બાદ ઝિમ્બાબ્વે ક્રિકેટે તેમના કેસની સુનાવણી સુધી સસ્પેન્ડ કરી દીધા છે.
આ બંને ખેલાડીઓને ડોપિંગ વિરોધી નિયમોના ભંગ બદલ તાત્કાલિક અસરથી સસ્પેન્ડ કરવામાં આવ્યા હતા. હવે જ્યાં સુધી સમગ્ર કેસની સુનાવણી પૂરી ન થાય ત્યાં સુધી આ બંને ખેલાડીઓ ક્રિકેટ મેચ રમી શકશે નહીં.
વેસ્લે મધવીરે અને બ્રેન્ડન માવુતા પર ઝિમ્બાબ્વે ક્રિકેટની આચાર સંહિતાનો ભંગ કરવાનો આરોપ મૂકવામાં આવ્યો છે. બોર્ડે આ મામલે નિવેદન જાહેર કરીને કહ્યું છે કે ’બંને ખેલાડીઓ પ્રતિબંધિત દવાનું સેવન કરવા બદલ પોઝિટિવ મળ્યા છે. આ મામલો ઇન-હાઉસ ડોપિંગ ટેસ્ટમાં સામે આવ્યો હતો.
વેસ્લે મધવીરે અને બ્રેન્ડન માવુતાએ ઝિમ્બાબ્વે માટે કુલ ૨૬ આંતરરાષ્ટ્રીય મેચ રમી છે. તાજેતરમાં તેઓ ૧૭ ડિસેમ્બરે આયરલેન્ડ સામેની મેચમાં ઝિમ્બાબ્વેની પ્લેઇંગ-૧૧નો ભાગ હતો. બીજી તરફ મધવીરે પોતાના દેશ માટે લગભગ ૧૦૦ આંતરરાષ્ટ્રીય મેચ રમી છે. જોકે, આયરલેન્ડ સામે તાજેતરમાં પૂરી થયેલી વન-ડે શ્રેણીમાં તેને તક મળી ન હતી. મધવીરે ઝિમ્બાબ્વે માટે ક્રિકેટના ત્રણેય ફોર્મેટમાં અત્યાર સુધીમાં ૧,૭૦૦થી વધુ રન કર્યા છે. આંતરરાષ્ટ્રીય ક્રિકેટમાં તેના નામે ૧૨ અડધી સદી પણ છે.
