રાજસ્થાનનું ન સમજાય તેવું ગણિતઃ કૉંગ્રેસને મત વધારે મળ્યા પણ તોય 30 બેઠક ઘટી ગઈ

લગભગ મોટા ભાગના રાજકીય પંડિતોએ ભાખ્યું હતું કે રાજસ્થાનમાં દર પાંચ વર્ષે સરકાર બદલવાની પરંપરા તોડી આ વખતે કૉંગ્રેસની ગહેલોત સરકાર ફરીથી સત્તા પર આવશે, પરંતુ રવિવારના પરિણામોએ આ વાત ખોટી સાબિત કરી અને કૉંગ્રેસને હરાવી કમળી ખિલ્યું.

જોકે રાજસ્થાનનું મતોનું ગણિત હજુ કૉંગ્રેસને ગૂંચવાડે છે. અહીં ભાજપના મતોમાં 2 ટકાનો વધારો થયો છે અને 42 બેઠકો વધી છે. તે જ સમયે, કોંગ્રેસની 30 બેઠકો ઘટી, પરંતુ તેની મત ટકાવારી 0.3 ટકા વધી છે.

રાજસ્થાનના ચૂંટણી પરિણામોએ આ વખતે બધાને ચોંકાવી દીધા છે. અહીં ભાજપે કોંગ્રેસની અશોક ગહેલોત સરકારને હરાવવામાં સફળતા મેળવી છે અને સ્પષ્ટ બહુમતી હાંસલ કરી છે. આ વિધાનસભા ચૂંટણીમાં ભાજપે 115 બેઠકો જીતી હતી. તે જ સમયે, કોંગ્રેસ માત્ર 69 બેઠકો સુધી મર્યાદિત હતી.

વોટ શેરની દ્રષ્ટિએ જોવામાં આવે તો ભાજપને 41.69 ટકા વોટ મળ્યા છે. જ્યારે કોંગ્રેસને 39.53 ટકા વોટ મળ્યા હતા. રાજસ્થાનમાં પાંચ વર્ષ પહેલા 2018માં યોજાયેલી વિધાનસભા ચૂંટણી પર નજર કરીએ તો ભાજપને 39.3 ટકા અને કોંગ્રેસને 39.8 ટકા વોટ મળ્યા હતા. તે સમયે ભાજપે 73 અને કોંગ્રેસે 99 બેઠકો જીતી હતી.

જો છેલ્લી અને આ વખતની ચૂંટણીઓનું વિશ્લેષણ કરીએ તો ભાજપનો વોટ શેર માત્ર 2 ટકા વધ્યો છે, પરંતુ તેમની સીટોમાં 42નો વધારો થયો છે. બીજી તરફ કોંગ્રેસની વાત કરીએ તો પાર્ટીની વોટ ટકાવારીમાં ગત ચૂંટણીની સરખામણીએ 0.3%નો વધારો થયો છે, પરંતુ સીટોમાં મોટો ઘટાડો થયો છે અને તે કૉંગ્રેસની હારનું કારણ બની છે.

રાજસ્થાનમાં દર પાંચ વર્ષે સત્તા પરિવર્તનની પરંપરા રહી છે. આ વખતે પણ આ પરંપરા ચાલુ રહી અને અશોક ગેહલોતના નેતૃત્વમાં ચૂંટણી લડનાર કોંગ્રેસને કારમી હારનો સામનો કરવો પડ્યો. ગઈકાલના ચૂંટણી પરિણામો બાદ હવે તમામની નજર આગામી મુખ્યમંત્રી પર ટકેલી છે. સીએમ પદ માટે બાબા બાલકનાથથી લઈને દિયા કુમારી સુધીના નામો ચર્ચામાં છે.