યુક્રેન યુદ્ધ વચ્ચે પુતિને રશિયન મહિલાઓને કરી સૌથી મોટી અપીલ, તો કરશે મદદ

મોસ્કોઃ રશિયા અને યુક્રેન વચ્ચે હાલમાં યુદ્ધ ચાલી રહ્યું છે અને તે ખતમ થવાના કોઇ એંધાણ દેખાતા નથી. દરમિયાનમાં રશિયન પ્રમુખ વ્લાદિમીર પુતિને રશિયન મહિલાઓને સાતથી આઠ બાળકો પેદા કરવાનો આદેશ આપ્યો છે. પુતિને દેશની વસતી વધારવા પર ભાર મૂક્યો છે. વધુ તેમને સરકાર તરફથી આર્થિક અને જરૂરી સહાય આપવામાં આવશે. અહેવાલો અનુસાર, પુતિન ઇચ્છે છે કે રશિયાના લોકો તેમના પરિવારને પહેલાના રશિયન ઝારવાદી પરિવારની જેમ મોટા બનાવે.

એક રિપોર્ટ અનુસાર 14 કરોડથી વધુની વસ્તી ધરાવતા રશિયામાં છેલ્લા કેટલાક વર્ષોમાં જન્મ દરમાં ઘણો ઘટાડો જોવા મળ્યો છે. યુક્રેન પર રશિયાનું આક્રમણ પણ લોકોને બાળકો પેદા કરતા અટકાવવા માટે જવાબદાર છે. એવું કહેવાય છે કે રશિયન રાષ્ટ્રપતિ પુતિનના પણ છ બાળકો છે. જોકે, વ્લાદિમીર પુતિને જાહેરમાં બે દીકરીઓ હોવાનું જ સ્વીકાર્યું છે. તે જ સમયે, વ્લાદિમીર પુતિનના વધુ બાળકો હોવાના નિવેદન બાદ રશિયામાં વિવાદ પણ ઉભો થયો છે.

કથિત વીડિયોમાં રશિયન રાષ્ટ્રપતિ લોકોને દેશ માટે વધુ બાળકો પેદા કરવા વિનંતી કરતા જોવા મળ્યા હતા. તેમણે કહ્યું હતું કે ભગવાનનો આભાર કે આપણા પરિવારોમાં ચાર, પાંચ અને તેથી વધુ બાળકો જન્મે છે. તેની સાથે એક મજબૂત આંતર-પેઢી કુટુંબ પરંપરા છે. વિવાદાસ્પદ વીડિયોમાં વ્લાદિમીર પુતિન રશિયનોને વધુ બાળકો જન્મવાની પરંપરાઓ જાળવી રાખવા અને તેને પુનર્જીવિત કરવા કહેતા પણ દર્શાવવામાં આવ્યા છે.

પુતિને કહ્યું હતું કે ઘણા બાળકો હોવા, એક મોટો પરિવાર બનાવવો તે તમામ રશિયનો માટે જીવનનો આદર્શ માર્ગ બનવો જોઈએ. રિપોર્ટમાં એમ પણ કહેવામાં આવ્યું છે કે રશિયામાં ઘણા પરિવારો તેમનો પરિવાર શરૂ કરવા અથવા વિસ્તારવા વિશે વધુને વધુ નર્વસ છે કારણ કે પુરુષોને યુદ્ધમાં લડવા માટે મોકલવામાં આવે છે. વસ્તીવિદોના મતે, રશિયાની અર્થવ્યવસ્થામાં ભારે મંદી ચાલી રહી છે, જેને કારણે અહીંના કપલો બાળકો પેદા કરવાથી ડરી રહ્યા છે.