સલમાન-કેટરિનાની ફિલ્મ ટાઈગર રૂ. 300 કરોડથી આટલે દૂર

દિવાળીના દિવસોમાં રજૂ થયેલી સલમાન ખાન અને કેટરિના કેફની ફિલ્મ ટાઈગર-3ને સલમાનના ચાહકોએ જબરો પ્રતિસાદ આપતા તેમ જ ખિચડી-2 સિવાય સામે અન્ય કોઈ ફિલ્મ ન હોવાથી હજુ સુધી સિનેમાઘરોમાં ટકી છે.

ફિલ્મ રિલીઝ થયાને 2 અઠવાડિયા થઈ ગયા છે. આંકડા દર્શાવે છે કે ફિલ્મે 12 દિવસમાં બોક્સ ઓફિસ પર 260 કરોડ રૂપિયાનું કલેક્શન કર્યું છે. હવે આ ફિલ્મ 300 કરોડની કમાણી તરફ આગળ વધી રહી છે. ટાઈગર-3ની ગણતરી આ વર્ષની મોટી ફિલ્મોમાં થઈ ચૂકી છે, હવે જોવાનું એ રહેશે કે તેનું કલેક્શન કોઈ રેકોર્ડ બનાવી શકે છે કે નહીં.

ટાઈગર-3 એ 12 દિવસમાં ભારતીય બોક્સ ઓફિસ પર 254 કરોડ રૂપિયાની કમાણી કરી છે. આ ફિલ્મે પહેલા દિવસે 44.5 કરોડ રૂપિયાની કમાણી કરી હતી અને જોરદાર ઓપનિંગ કરી હતી. તે એક સપ્તાહમાં 187 કરોડ રૂપિયાની કમાણી કરવામાં સફળ રહી. બીજા સપ્તાહમાં ફિલ્મના કલેક્શનમાં ઘટાડો થવા લાગ્યો. ટાઈગર-3 એ 13માં દિવસે 3.75 કરોડ રૂપિયાનો બિઝનેસ કર્યો હતો, જે બાદ તેની અત્યાર સુધીની કમાણી 260 કરોડ રૂપિયાને પાર કરી ગઈ હોવાના મીડિયા રિપોર્ટ્સ છે.

ટાઈગર-3ની રિલીઝનો આજે 14મો દિવસ છે. જો કે ફિલ્મ અત્યાર સુધી ઘણી ધીમી પડી ગઈ છે, તેમ છતાં કલેક્શન ચાલુ છે. આ ફિલ્મ રૂ. 300 કરોડના ક્લબની ખૂબ નજીક છે અને ટૂંક સમયમાં આ આંકડાને આંબી લે તો કહેવાય નહીં. આ વર્ષે પઠાણ, જવાન અને ગદર-2 જેવી ફિલ્મોએ ભારતીય બોક્સ ઓફિસ પર 500 કરોડ રૂપિયાનું કલેક્શન કર્યું છે.