મીરા ભાયંદરમાં ઠાકરે જૂથની મુશ્કેલીઓ વધશેઃ ગેરકાયદે બાંધકામો સામે કાર્યવાહી થશે
મીરા-ભાયંદર: શિવસેનાના શિંદે જૂથે મંગળવારે મ્યુનિસિપલ કમિશનર સમક્ષ મીરા-ભાયંદરમાં કેટલાક ગેરકાયદે બાંધકામો પર કાર્યવાહીની માંગ કરી હતી. આ બાંધકામો શિવસેનાના ઠાકરે જૂથના પદાધિકારીઓ સાથે સંબંધિત હોવાનું કહેવાય છે. અગાઉ, ઠાકરે જૂથ સહિત અન્ય રાજકીય પક્ષોએ શિંદે જૂથના કન્ટેનરમાં શરૂ કરાયેલી શાખા સામે કાર્યવાહીની માંગ કરી હતી. હવે આ કારણે શહેરમાં શિંદે જૂથ અને ઠાકરે જૂથ વચ્ચે વિવાદ થવાની આગાહી છે.
શિવસેનાના શિંદે જૂથ દ્વારા છેલ્લા કેટલાક દિવસોમાં મીરા-ભાંયદરમાં રસ્તાઓની બાજુમાં ખુલ્લી જગ્યાઓમાં કન્ટેનરમાં પાર્ટીની શાખાઓ શરૂ કરવામાં આવી છે. આ શાખાઓ ગેરકાયદે હોવાનું જણાવીને ઠાકરે જૂથ સાથે કોંગ્રેસ અને મનસેએ તેમની સામે આક્રમક વલણ અપનાવ્યું છે. તેમણે આ શાખાઓ સામે વિરોધ પણ કર્યો હતો.
આ મુદ્દે, વિરોધ પક્ષોના પદાધિકારીઓ સોમવારે મ્યુનિસિપલ કમિશનર સંજય કાટકરને મળ્યા હતા અને ગેરકાયદેસર કન્ટેનર શાખાઓ સામે કાર્યવાહીની માંગ કરી હતી. ત્યાર બાદ મંગળવારે શિવસેનાના શિંદે જૂથના પદાધિકારીઓ કમિશનર કાટકરને મળ્યા હતા. આ વખતે તેમને શહેરના વિવિધ વિસ્તારોમાં છ બાંધકામોની યાદી આપવામાં આવી છે.
આ બાંધકામો ગેરકાયદે હોવાનું જણાવી તેમની સામે કાર્યવાહી કરવાની માંગ કરવામાં આવી છે. આ બાંધકામો ઠાકરે જૂથના વરિષ્ઠ અધિકારીઓ અને ભૂતપૂર્વ કોર્પોરેટરો સાથે સંકળાયેલા હોવાનું કહેવાય છે.
ઠાકરે જૂથે કન્ટેનર શાખાનો વિરોધ કરતાં શહેરમાં રાજકારણ ગરમાયું છે. ઠાકરે જૂથના ગેરકાયદે બાંધકામો સામે પગલાં ભરવાની માગણી કરવામાં આવી હોવાથી આ વિવાદ વધુ ગરમાય તેવી શક્યતા છે.
