સોમવારથી સ્કૂલ ખૂલશે કે નહિ? જાણો દિલ્હી સરકારની નવી જાહેરાત

નવી દિલ્હીઃ દિલ્હીમાં વધી રહેલા વાયુ પ્રદૂષણને કારણે શિક્ષણ વિભાગે સમય પહેલા શિયાળુ વેકેશન જાહેર કરી દીધું હતું. પહેલા વાયુ પ્રદૂષણના કારણે અને બાદમાં શિયાળાના વેકેશનના કારણે દિલ્હીની તમામ શાળાઓ છેલ્લા 17 દિવસથી બંધ છે. દિલ્હી સરકારે નર્સરીથી લઈને ધોરણ 12 સુધીની તમામ શાળાઓમાં 9 થી 18 નવેમ્બર સુધી શિયાળુ વેકેશન જાહેર કર્યું હતું. હવે સવાલ એ છે કે 20 નવેમ્બર એટલે કે સોમવારથી શાળાઓ ખુલશે કે નહીં? આ અંગે હવે દિલ્હી સરકારે નવી અપડેટ બહાર પાડી છે.

હકીકતમાં દિવાળી પહેલા જ દિલ્હી-એનસીઆરના ઘણા વિસ્તારોની હવા ઝેરી બની ગઈ હતી. ઘણા વિસ્તારોમાં એર ક્વોલિટી ઈન્ડેક્સ (AQI) સ્તર 900 થી વધુ પહોંચી ગયો હતો. મુખ્ય પ્રધાન અરવિંદ કેજરીવાલે વાયુ પ્રદૂષણને કારણે ગ્રેડેડ રિસ્પોન્સ એક્શન પ્લાન (GRAP) સ્ટેજ-III અને પછી સ્ટેજ IV લાગુ કર્યો હતો. જેમાં ડીઝલ વાહનોના પ્રવેશ પર પ્રતિબંધ મુકવામાં આવ્યો હતો અને તમામ પ્રકારના બાંધકામ પર પ્રતિબંધ મુકવામાં આવ્યો હતો. ઉપરાંત 18મી નવેમ્બર સુધી શાળાઓમાં શિયાળુ વેકેશન જાહેર કરવામાં આવ્યું હતું.

દિલ્હી-એનસીઆર માટે કેન્દ્રની ગ્રેડેડ રિસ્પોન્સ એક્શન પ્લાન (GRAP)એ પ્રદૂષણને નિયંત્રિત કરવા માટેની ક્રિયાઓને ચાર તબક્કામાં વર્ગીકૃત કરી છે-

સ્ટેજ I – ખરાબ (AQI 201-300)
સ્ટેજ II – ખૂબ જ નબળી (AQI 301-400)
સ્ટેજ III – ગંભીર (AQI 401-450) અને
સ્ટેજ IV – ગંભીર પ્લસ (AQI 450 થી ઉપર).
તો હવે સવાલ એ છે કે 20 નવેમ્બરથી શાળાઓ ખુલશે કે નહીં?
રાષ્ટ્રીય રાજધાની દિલ્હીમાં તમામ સરકારી અનુદાનથી ચાલતી અને ખાનગી શાળાઓ 20 નવેમ્બરથી ઑફલાઇન મોડમાં વર્ગો ફરી શરૂ કરવામા આવશે કારણ કે GRAP IV રદ કરવામાં આવ્યો છે, એમ એક સત્તાવાર પરિપત્રમાં શનિવારે જણાવવામાં આવ્યું હતું.

ડિરેક્ટોરેટ ઑફ એજ્યુકેશનના એક પરિપત્રમાં કહેવામાં આવ્યું છે કે AQIમાં થયેલા સુધારા અને IMD/IITMની આગાહીને ધ્યાનમાં રાખીને, એવું નક્કી કરવામાં આવ્યું છે કે નજીકના ભવિષ્યમાં દિલ્હીના AQIમાં કોઈ તીવ્ર ઘટાડો થવાના સંકેત નથી. પરિપત્રમાં કહેવામાં આવ્યું છે કે પ્રિ-સ્કૂલથી લઈને ધોરણ 12 સુધીના તમામ વિદ્યાર્થીઓ માટે 20 નવેમ્બરથી ફિઝિકલ ક્લાસ ફરી શરૂ થશે. દિલ્હી સરકારના શિક્ષણ વિભાગના આદેશ અનુસાર આ આદેશ જારી થયા બાદથી આગામી એક સપ્તાહ સુધી આઉટડોર સ્પોર્ટ્સ એક્ટિવિટીઝ અને મોર્નિંગ મીટિંગનું આયોજન કરવામાં આવશે નહીં.

જારી કરાયેલા પરિપત્રમાં કહેવામાં આવ્યું છે કે આઉટડોર સ્પોર્ટ્સ એક્ટિવિટી અને મોર્નિંગ મીટિંગ્સ આગામી એક સપ્તાહ સુધી સ્થગિત રહેશે. ડિરેક્ટોરેટ ઓફ એજ્યુકેશને શાળાઓને વાલીઓને વર્ગો ફરી શરૂ કરવા અંગે અગાઉથી જાણ કરવા જણાવ્યું છે.