મેટ્રો-ટૂબીની ત્રણ ટ્રેન મુંબઈ આવી

મુંબઈ: ‘અંધેરી વેસ્ટ – માનખુર્દ મેટ્રો ૨બી’ રૂટ ઓપરેશન માટે જરૂરી ટ્રેનો પૈકી, ત્રણ મેટ્રો ટ્રેનો તાજેતરમાં મુંબઈમાં પ્રવેશી છે. આ કાર મંડલા ખાતે ડબલ ડેકર કાર શેડમાં પાર્ક કરવામાં આવી છે. આ ટ્રેનોને ટૂંક સમયમાં કનેક્ટ કરીને ટેસ્ટ કરવામાં આવે તેવી શક્યતા છે. ‘મેટ્રો ૨બી’ હેઠળ ‘દહિસર – અંધેરી વેસ્ટ મેટ્રો ૨એ’ ને અંધેરી પશ્ર્ચિમ – મંડલા સુધી લંબાવવામાં આવી રહી છે. આ ૨૩.૬૪ કિલોમીટર લાંબી મેટ્રો લાઇનનું કામ હાલ પૂર ઝડપે ચાલી રહ્યું છે. આ રૂટના ૩૧ હેક્ટરમાં કારશેડના કામે પણ વેગ પકડ્યો છે. આ કારશેડમાં એક સાથે ૭૨ કાર પાર્ક કરી શકાય છે. આ કારશેડનું અંદાજે ૬૦ ટકા કામ પૂર્ણ થઈ ગયું છે. હવે ત્રણ લાલ અને વાદળી મેટ્રો ટ્રેન આ કારશેડમાં પ્રવેશી છે. બેંગ્લોર સ્થિત ભારત અર્થ મૂવર્સ લિમિટેડ કંપની ‘મેટ્રો ૨બી’ની ટ્રેનો બનાવી રહી છે.

‘મેટ્રો ૨એ’ અને ‘દહિસર – ગુંદવલી મેટ્રો ૭’ રૂટ પર ચાલતી ટ્રેનો આ જ કંપની દ્વારા બનાવવામાં આવી છે. હવે ‘મેટ્રો ૨બી’ની ત્રણ ટ્રેનો મંડલા કારશેડમાં પ્રવેશી છે. તબક્કાવાર રીતે કેટલીક વધુ ટ્રેનો મુંબઈમાં પ્રવેશવા જઈ રહી છે. મેટ્રો ટ્રેનની રજૂઆત સાથે, આ માર્ગનો મંડલા-ચેમ્બુર વિભાગ ૨૦૨૪માં ટ્રાફિક સેવામાં પ્રવેશ કરે તેવી સંભાવના છે. દરમિયાન, જ્યારે એમએમઆરડીએના ઉચ્ચ અધિકારીઓને પૂછવામાં આવ્યું કે શું માંડલે-ચેમ્બુર તબક્કો શરૂ કરવામાં આવશે, ત્યારે તેમની પાસેથી કોઈ માહિતી ઉપલબ્ધ ન હતી.

મુસાફરોને સ્ટેશનની બહાર બસ, ટૅક્સી, રિક્ષા મળી રહેશે
મુંબઈ: મુંબઈ મેટ્રોપોલિટન રિજન ડેવલપમેન્ટ ઑથોરિટી (એમએમઆરડીએ)એ અંધેરી વેસ્ટ – ‘માનખુર્દ મેટ્રો ૨બી’ રૂટ પરના મેટ્રો સ્ટેશન પર ઊતર્યા પછી ઇચ્છિત સ્થળે જવા માટે મલ્ટી મોડલ ઇન્ટિગ્રેશન પ્લાન અમલમાં મૂકવાનો નિર્ણય કર્યો છે. આ પ્રોજેક્ટ હેઠળ, એમએમઆરડીએ ‘મેટ્રો ૨બી’ રૂટ પરના ૨૦ સ્ટેશનની બહારથી બેસ્ટ, રિક્ષા, ટૅક્સી સેવાઓ પ્રદાન કરવા માગે છે. મુસાફરોને મેટ્રોમાંથી ઊતર્યા પછી ઇચ્છિત સ્થળ સુધી પહોંચવાનું સરળ બને તો વધુને વધુ મુસાફરો મેટ્રોમાં પ્રવાસ કરે એ ખ્યાલ સાથે આ પ્રોજેક્ટ રજૂ કરવામાં આવ્યો હતો. આ પ્રોજેક્ટ મેટ્રો લાઇનના તમામ સ્ટેશનો પર અમલ કરવાનો નિર્ણય એમએમઆરડીએએ લીધો છે. ‘મેટ્રો ૨બી’ પર ૨૦ સ્ટેશનની બહાર આ સુવિધા પૂરી પાડવા માટે અંદાજે રૂ. ૨૨૩ કરોડનો ખર્ચ થવાની ધારણા છે. મલ્ટિ મોડલ ટ્રાન્સપોર્ટ ઇન્ટિગ્રેશન પ્રોજેક્ટ ચાર તબક્કામાં અમલમાં આવશે. દરેક તબક્કામાં પાંચ સ્ટેશનો હશે. એમએમઆરડીએએ આ માટે કોન્ટ્રાક્ટરની નિમણૂક કરવા માટે તાજેતરમાં ટેન્ડરો આમંત્રિત કર્યા છે. ટૂંક સમયમાં કોન્ટ્રાક્ટરની નિમણૂક કરી સુવિધા વિકસાવવામાં આવશે. સુવિધા કાર્યરત થયાના બે વર્ષમાં આ સુવિધાની સંપૂર્ણ જવાબદારી સંબંધિત કોન્ટ્રાક્ટરની રહેશે, પરંતુ આ માટે ૨૦૨૫ સુધી રાહ જોવી પડી શકે છે.