છ મહિના પછી સૈનિકો માટે લેહથી ચાર્ટર્ડ ફ્લાઈટ શરૂ થઈ

નવી દિલ્હીઃ ગો-ફર્સ્ટ એરલાઈન્સની ચાર્ટર્ડ ફ્લાઈટ્સ બંધ થવાને કારણે લેહ અને તેની આસપાસ તૈનાત ભારતીય સેનાના જવાનોને અવરજવરમાં ઘણી સમસ્યાઓનો સામનો કરવો પડી રહ્યો હતો. જોકે, આજથી સેનાએ એર ઈન્ડિયા સાથે ફ્લાઈટ શરૂ કરી દીધી છે. ગો-ફર્સ્ટની ચાર્ટર્ડ ફ્લાઈટ્સ છ મહિના કરતાં વધુ સમયથી બંધ છે અને ભારતીય સેનાએ ગો-ફર્સ્ટ પર દંડ લગાવ્યો હતો. હવે સેનાએ એર ઈન્ડિયા સાથે કરાર કર્યો છે. આજે લગભગ 300 સૈનિકો દિલ્હીથી લેહ અને પછી લેહથી દિલ્હી ગયા હતા.

ભારતીય સેના તેના સૈનિકોને રજા પર મોકલવા અથવા રજા પરથી પાછા ફરવા માટે ગો ફર્સ્ટની ચાર્ટર સેવાનો ઉપયોગ કરતી હતી. લેહથી દિલ્હી અને લેહથી ચંદીગઢ વચ્ચે ભારતીય સૈનિકોની અવરજવર તેના દ્વારા થતી હતી.

ગો-ફર્સ્ટ ફ્લાઈટ્સ લેહ અને દિલ્હી વચ્ચે અઠવાડિયામાં પાંચ દિવસ અને લેહ અને ચંદીગઢ વચ્ચે અઠવાડિયામાં બે દિવસ ચાલતી હતી. આથી સૈનિકો 2-3 કલાકમાં તેમના ગંતવ્ય સ્થાને પહોંચી શકતા હતા. આ સેવા આ વર્ષે મે મહિનાની શરૂઆતમાં બંધ થઈ ગઈ હતી જેના કારણે લેહમાં તૈનાત મોટાભાગના સૈનિકોને રોડ માર્ગે મુસાફરી કરવી પડી હતી, જેમાં 6-7 દિવસનો સમય લાગતો હતો.