મુંબઈઃ ‘હેરા ફેરી 3’માંથી પરેશ રાવલનું અચાનક બહાર નીકળવું ચર્ચાનો વિષય બની ગયું છે. અભિનેતાના આ નિર્ણયથી ફિલ્મના નિર્માતાઓ અને કલાકારો સહિત ઘણા લોકોને આઘાત લાગ્યો છે. અક્ષય કુમારની કંપની કેપ ઓફ ગુડ સિનેમાએ પરેશ રાવલ સામે 25 કરોડ રૂપિયાનો દાવો કર્યો ત્યારે આ મામલાએ કાનૂની વળાંક લીધો હતો. ત્યાર બાદ ઘણું બધું બન્યું. હવે, અક્ષય કુમારે ‘હેરા ફેરી 3’ પર પોતાનું મૌન તોડ્યું છે અને ખાતરી આપી છે કે બધું ઠીક થઈ જશે.
એક ઇન્ટરવ્યૂ દરમિયાન ‘હેરા ફેરી 3’ સ્ટાર અક્ષય કુમારને ફિલ્મના નવા અપડેટ અને તેના વિશે વધુ વિગતો પૂછવામાં આવી. આ પ્રશ્નનો જવાબ આપતા અક્ષયે કહ્યું, ‘જે કંઈ થઈ રહ્યું છે તે તમારી સામે થઈ રહ્યું છે. હું મારી આંગળીઓ ક્રોસ કરી રહ્યો છું. મને આશા છે કે બધું સારું થશે.’ અક્ષયે આશ્વાસન આપ્યું છે કે બધું સારું થશે અને કહ્યું,’ મને ખાતરી છે કે બધું ઠીક થશે.’
પરેશ રાવલે ‘હેરા ફેરી 3’ છોડી દીધી
જ્યારથી પરેશ રાવલે ‘હેરા ફેરી 3’ છોડી દેવાનો નિર્ણય લીધો ત્યારથી અક્ષય કુમાર અને પરેશ રાવલ વચ્ચે ચાલી રહેલ વિવાદ હેડલાઇન્સમાં છે. એક મુલાકાતમાં પરેશ રાવલે ‘હેરા ફેરી’માં પોતાના પાત્રને ગળાનો ફાંસો ગણાવ્યું અને કહ્યું કે તે ટાઇપકાસ્ટ થઈ ગયો છે અને આગળ વધવા માંગે છે.
આ પછી,જ્યારે અક્ષય કુમારે પરેશ રાવલ વિરુદ્ધ કેસ દાખલ કર્યો ત્યારે તણાવ વધી ગયો. જવાબમાં પરેશ રાવલે વ્યાજ સહિત સાઇનિંગ રકમ પરત કરી જેનાથી બંને વચ્ચેનો વિવાદ વધુ વકર્યો. બંને વચ્ચે અણબનાવ છતાં અક્ષય અને પરેશ બંનેએ તાજેતરમાં પ્રિયદર્શનની હોરર-કોમેડી ફિલ્મ ‘ભૂત બાંગ્લા’નું શૂટિંગ પૂર્ણ કર્યું છે. જોકે, અહેવાલો સૂચવે છે કે તેમના સંબંધો હવે પહેલા જેટલા મૈત્રીપૂર્ણ નથી રહ્યા.
આ પણ વાંચો - શું છે 12Aનું રેટિંગ, જે બ્રિટિશ સેન્સર બોર્ડે સિતારે ઝમીન પર ફિલ્મને આપ્યું છે?
વર્ક ફ્રન્ટની વાત કરીએ તો અક્ષય કુમાર ‘કનપ્પા’ સાથે તેલુગુ ફિલ્મ ઉદ્યોગમાં ડેબ્યૂ કરવા માટે તૈયાર છે. તે ભગવાન શિવની ભૂમિકા ભજવશે. આ ફિલ્મમાં વિષ્ણુ માંચુ મુખ્ય ભૂમિકામાં છે, જ્યારે અક્ષય મોહનલાલ અને પ્રભાસ સાથે એક નાનકડી ભૂમિકામાં જોવા મળશે. ‘કનપ્પા’ 27 જૂનના સિનેમાઘરોમાં રિલીઝ થવાની છે. તે અક્ષયનું તેલુગુ ફિલ્મ ઉદ્યોગમાં ડેબ્યૂ પણ છે.
