આતંકવાદ સામેની લડાઈમાં જે ડી વાન્સે ભારતને સંપૂર્ણ સમર્થન આપ્યું; મીટિંગ બાદ તેજસ્વી સૂર્યાનું નિવેદન

વોશિંગ્ટન: પહલગામ આતંકવાદી હુમલો અને ઓપરેશન સિંદૂર બાદ ભારત સરકારે કેટલાક સર્વપક્ષીય પ્રતિનિધિમંડળો વિવિધ દેશમાં મોકલ્યા છે, જેથી દુનિયા સમક્ષ પાકિસ્તાનની આતંકવાદ સમર્થક નીતિઓની પોલ ખોલી શકાય. આ ઉપરાંત આ પ્રતિનિધિમંડળો આતંકવાદ સામે ભારતની લડાઈ માટે જે તે દેશનું સમર્થન પણ મેળવી રહ્યા છે. એવામાં અમેરિકાના ઉપરાષ્ટ્રપતિ જેડી વાન્સે (J D Vance) આતંકવાદ વિરુદ્ધની લડાઈમાં ભારતને પૂર્ણ સમર્થન જાહેર કર્યું છે.

કોંગ્રેસના સાંસદ શશી થરૂરના નેતૃત્વમાં એક સર્વપક્ષીય પ્રતિનિધિમંડળ અમેરિકાના પ્રવાસે છે. આ પ્રતિનિધિમંડળ અમેરિકાના ઉપરાષ્ટ્રપતિ જેડી વાન્સને મળ્યું હતું. પ્રતિનિધિમંડળના સભ્ય ભાજપના સાંસદ તેજસ્વીને વાન્સ સાથેમુલાકાત વિશે પૂછવામાં આવ્યું ત્યારે તેમણે કહ્યું, ‘અમેરિકાના ઉપરાષ્ટ્રપતિ સાથેની અમારી મુલાકાત ફળદાયી રહી. ઉપરાષ્ટ્રપતિ વાન્સે આતંકવાદ સામે ભારતના વલણને સ્પષ્ટ અને સ્પષ્ટપણે સમર્થન આપ્યું. તેમનો સ્પષ્ટ મત હતો કે ભારતે પાકિસ્તાનથી આતંકવાદી હુમલાઓને રોકવા માટે પોતાના અધિકારોનો ઉપયોગ કર્યો છે અને તેઓ પહેલગામમાં થયેલા આતંકવાદી હુમલાના પીડિતો પ્રત્યે સહાનુભૂતિ ધરાવે છે.’

ભારતના સંયમની પ્રશંસા કરી:

ભાજપના સાંસદ તેજસ્વી સૂર્યાએ કહ્યું, ‘તેમણે (વાન્સ) કહ્યું કે જ્યારે હુમલો થયો ત્યારે તેઓ પોતે ભારતમાં હતા અને તેઓ આ ક્રૂર આતંકવાદી હુમલા પ્રત્યે ભારતીય લોકોના આક્રોશ અને ગુસ્સાના સાક્ષી પણ છે. તેમણે આતંકવાદ સામેની લડાઈમાં ભારત સરકારને સંપૂર્ણ સમર્થન પણ વ્યક્ત કર્યું. તેમણે પાકિસ્તાન દ્વારા વારંવાર ઉશ્કેરણી છતાં ભારત દ્વારા દર્શાવવામાં આવેલા સંયમની પણ પ્રશંસા કરી અને કહ્યું કે ભારતે લશ્કરી અને રાજદ્વારી બંને સ્તરે આ મુદ્દાને ખૂબ જ કડક રીતે ઉકેલ્યો છે.’

ભારત સાથે વેપાર માટે ઉત્સાહ:

ટેરીફ મુદ્દે ભારત અને યુએસ વચ્ચે તાણવ ચાલી રહ્યો છે, એવામાં સૂર્યાએ કહ્યું કે જેડી વાન્સે ભારત અને અમેરિકા વચ્ચેના વેપાર અંગે ઉત્સાહ વ્યક્ત કર્યો હતો. તેમના મતે, વાન્સે મુલાકાત દરમિયાન વડા પ્રધાન નરેન્દ્ર મોદી સાથેના તેમના અંગત સંબંધોનો ઘણી વખત ઉલ્લેખ કર્યો અને જણાવ્યું કે ભારત કેવી રીતે સમૃદ્ધિ, વિકાસ અને પ્રગતિ તરફ મોટા પરિવર્તનમાંથી પસાર થઈ રહ્યું છે.

તેજસ્વી સૂર્યાએ કહ્યું, ‘તેમણે કહ્યું કે યુએસ ભારત સાથે વેપાર અને ભાગીદારીની માટે ઉત્સાહ ધરાવે છે. તેમણે જણાવ્યું કે તેમણે ભારતમાં મહાન શક્તિ જોઈ છે અને આવનારા વર્ષોમાં આ સફરમાં ભારત અને યુએસ ભાગીદાર રહેશે. હું કહીશ કે ગઈકાલે અને આજે વિવિધ વરિષ્ઠ સેનેટરો અને સાંસદો સાથે અમારી મુલાકાતો આ વાતનો સંકેત છે.’

આ પણ વાંચો….ફ્રી પેલેસ્ટાઇનના નારા સાથે વ્યક્તિએ અમેરિકાના કોલોરાડોમાં પેટ્રોલ બોંબ ફેંક્યો, છ લોકો દાઝ્યા