ગુજરાતને જળસંકટમાંથી ઉગારવા માટે સરકારે લીધો મહત્ત્વનો નિર્ણય, ધારાસભ્યની ગ્રાન્ટમાં કર્યો વધારો
અમદાવાદ: ગુજરાત સરકારે જળસંચયને પ્રોત્સાહન આપવા અને ભૂગર્ભ જળસ્તર વધારવા માટે એક મહત્વપૂર્ણ નિર્ણય લીધો છે. હવે ધારાસભ્યોની ગ્રાન્ટમાંથી થતા વિવિધ વિકાસ કાર્યોની સૂચિમાં ‘જળસંચય’ સંબંધિત કાર્યોનો પણ સમાવેશ કરવામાં આવ્યો છે. આ નિર્ણય અંતર્ગત, જળસંગ્રહ ક્ષમતા વધારવા, “કેચ ધ રેઈન” દ્વારા ભૂગર્ભ જળસંગ્રહમાં વધારો કરવા અને રેઈન વોટર હાર્વેસ્ટિંગના વિકાસના કામો માટે ₹50 લાખ સુધીની જોગવાઈ કરવામાં આવી છે. જળસંચયના સૂચવાયેલા વિકાસ કાર્યોમાં એક કામ માટે ₹5 લાખની નાણાકીય મર્યાદા નક્કી કરવામાં આવી છે.
ધારાસભ્ય ગ્રાન્ટમાં વધારો અને જળસંચય પર ભાર
વિકેન્દ્રિત જિલ્લા આયોજન કાર્યક્રમ હેઠળ, ધારાસભ્યોને પોતાના મતવિસ્તારમાં સામુહિક વિકાસના નાના કામો માટે ફાળવવામાં આવતી વાર્ષિક રકમ વર્ષ 2025-26થી વધારીને ₹2.50 કરોડ કરવાનો રાજ્ય સરકારે નિર્ણયો કર્યો છે. આ વધેલી ગ્રાન્ટમાંથી હવે ‘જળસંચય’ના કામોને પણ પ્રાધાન્ય આપવામાં આવશે.
આ પણ વાંચો: જો વરસાદ ખેચાશે તો કચ્છ-સૌરાષ્ટ્ર સહિત ઉત્તર ગુજરાતમાં જળસંકટ
લોકફાળા અને વૈવિધ્યપૂર્ણ જળસંચયના કામો
આ નિર્ણય હેઠળ, ધારાસભ્યોની ગ્રાન્ટમાંથી જળસંગ્રહ ક્ષમતા વધારવા અને ભૂગર્ભ જળસંગ્રહમાં વધારો થાય તેવા સામુહિક વિકાસના કામો માટે ઓછામાં ઓછા ₹50 લાખનો ઉપયોગ થાય તેવી જોગવાઈ કરવામાં આવી છે. ગામ તળાવો અને સીમ તળાવોને ઊંડા અને છિદ્રાળુ કરવાની કામગીરીમાં લોકફાળા પેટે જરૂરી રકમ સામે ખૂટતી રકમ ધારાસભ્યની ગ્રાન્ટમાંથી 10%ની મર્યાદામાં ફાળવી શકાશે.
કયા કયા કામોનો થશે સમાવેશ?
ધારાસભ્યો પોતાની ગ્રાન્ટમાંથી સૂચવી શકે તેવા જળસંચયના કામોની વિસ્તૃત સૂચિ તૈયાર કરવામાં આવી છે. તેમાં ગામના તળાવોને ઊંડા કરવા, તળાવમાં પાણી ભરવા માટેના વોકળા, ગટર, નાળીયા ઊંડા ઉતારવા, સિંચાઈના કામો, ચેકડેમના કામો, સરકારી બિલ્ડિંગો પર વરસાદી પાણીના સંગ્રહ માટે વોટર હાર્વેસ્ટિંગ, ગામના પીવાના પાણીના કુવા ઊંડા ઉતારવા, બાંધવા તથા સુધારણાના કામોનો સમાવેશ થાય છે.
આ ઉપરાંત, કુવા રિચાર્જિંગના કામો, દુષ્કાળ સમયે શરૂ થયેલ પીવાના પાણીના તળાવોને ‘સેફ સ્ટેજ’ પર લાવવા, પાણીની ટાંકીના નવા કામો, વરસાદી પાણીને ભૂગર્ભમાં ઉતારવા માટે વોટર રિચાર્જ સ્ટ્રક્ચર, ભૂગર્ભ જળસંગ્રહના સ્ટ્રક્ચર જેવા કે ભૂગર્ભ ટાંકી અને તેને સંલગ્ન કામો, WTP/STPના રિપેરિંગ, સ્ટોર્મ વોટર ડ્રેઇનના કામો, તળાવના પાળા અને વેસ્ટ વિયરના મજબૂતીકરણ, ચેકડેમ રિપેરિંગ, ચેકવોલ તથા નહેરોની મરામતની કામગીરી પણ આ સૂચિમાં સામેલ છે.