ગુજરાતમાં આગામી બે દિવસ હળવાથી મધ્યમ કમોસમી વરસાદની આગાહી

અમદાવાદ : ગુજરાતના સતત હવામાનમાં ફેરફાર થઇ રહ્યો છે. જેમાં એક તરફ અમદાવાદ સહિત અનેક શહેરોમાં ગરમીનો પારો 40 ડિગ્રી આસપાસ પહોંચ્યો છે. તો બીજી તરફ હવામાન વિભાગે અનેક જિલ્લાઓમાં બે દિવસ હળવા થી મધ્યમ કમોસમી વરસાદની આગાહી કરી છે.

રાજકોટ રાજ્યનું સૌથી ગરમ શહેર રહ્યું

હવામાન વિભાગ દ્વારા જાહેર કરવામાં આવેલા તાપમાનના આંકડા પ્રમાણે રાજ્યમાં સર્વત્ર ગરમીનો કહેર વર્તાઈ રહ્યો છે. રાજ્યમાં 33.4થી લઈને 40.7 ડિગ્રીથી લઈને મહત્તમ તાપમાન નોંધાયું હતું. 40.7 ડિગ્રી મહત્તમ તાપમાન રાજકોટ રાજ્યનું સૌથી ગરમ શહેર રહ્યું હતું. જ્યારે દ્વારકા અને મહુવામાં 33.4 ડિગ્રી તાપમાન નોંધાયું હતું.

હવામાન વિભાગે ફરી વરસાદની આગાહી કરી

જ્યારે હવામાન વિભાગે ફરી વરસાદની આગાહી કરી છે. આગામી બે દિવસ બાદ ઉત્તર ગુજરાતના સાબરકાંઠા, અરવલ્લી, ખેડા, આણંદ, પંચમહાલ, દાહોદ અને મહિસાગરમાં ગાજવીજ સાથે વરસાદ પડવાની શક્યાત સેવી છે.
આજે રાજકોટ, બોટાદ, અમરેલી, ભાવનગર, ગીર સોમનાથ, આણંદ, ખેડા, અરવલ્લી, સાબરકાંઠા, મહિસાગર, પંચમહાલ, દાહોદ, છોટા ઉદેપુર, વડોદરા, ભરૂચ, નર્મદા, સુરત, વલસારી, તાપી જિલ્લા અને નવસારી જિલ્લામાં હળવાથી મધ્યમ વરસાદ પડી શકે છે.

22 મે બાદ રાજ્યમાં વરસાદનું જોર વધશે

હવામાન વિભાગની આગાહી મુજબ, 22 મે બાદ રાજ્યમાં વરસાદનું જોર વધશે અને રાજ્યના અનેક જિલ્લાઓમાં ગાજવીજ, અને ભારે પવન સાથે વરસાદ પડશે. જ્યારે 23 મેના રોજ પણ રાજ્યભરમાં સાર્વત્રિક વરસાદની આગાહી કરવામાં આવી છે.