ઈડીએ મારી ધરપકડ કરી કારણ કે મેં 2019માં ભાજપને સત્તામાં આવતા રોકી, હું એમવીએ સરકારની રક્ષણાત્મક દિવાલ હતો: સંજય રાઉત
તેમના પુસ્તક ‘નરકાતલા સ્વર્ગ’ (નરકમાં સ્વર્ગ)માં રાઉતે ચોંકાવનારો દાવો કર્યો
(અમારા પ્રતિનિધિ તરફથી)
મુંબઈ: શિવસેના (યુબીટી)ના નેતા સંજય રાઉતે દાવો કર્યો છે કે એન્ફોર્સમેન્ટ ડિરેક્ટોરેટ દ્વારા કથિત મની લોન્ડરિંગ કેસમાં તેમની ધરપકડ કરવા પાછળનું મુખ્ય કારણ એ હતું કે તેમણે 2019માં મહારાષ્ટ્રમાં ભાજપને સત્તામાં આવતા અટકાવ્યું હતું.
તેમના પુસ્તક ‘નરકાતલા સ્વર્ગ’માં રાઉતે એવો પણ દાવો કર્યો હતો કે તેમની સામે ઈડીની કાર્યવાહી કરવામાં આવી હતી કારણ કે તેઓ તે વર્ષે સત્તામાં આવેલા ઉદ્ધવ ઠાકરેની આગેવાની હેઠળની મહા વિકાસ આઘાડી (એમવીએ) સરકારની ‘રક્ષણાત્મક દિવાલ’ હતા.
આપણ વાંચો: મહાવિકાસ આઘાડીને ‘પાડવા’ માટે હવે સંજય રાઉતે કર્યો નવો દાવો, દિલ્હીમાં રચાયું કાવતરું
આ પુસ્તક રાઉતના જેલમાં અનુભવો વિશે છે જ્યારે ઈડીએ 2022માં ઠાકરે સરકારના પતન પછી તરત જ કથિત મની લોન્ડરિંગ કેસમાં તેમની ધરપકડ કરી હતી. રાઉતને બાદમાં જામીન મળ્યા હતા.
‘મારા વિરુદ્ધ (ઈડી) કાર્યવાહી પાછળનું મુખ્ય કારણ એ હતું કે મેં ભાજપને સત્તામાં આવતા રોકી હતી. હું ઠાકરે સરકારના બચાવમાં રક્ષણાત્મક દિવાલ તરીકે પણ ઉભો રહ્યો હતો. તે પછી ઠાકરે સરકાર પડી ભાંગી હતી.
‘(એકનાથ) શિંદે સરકાર ગેરબંધારણીય રીતે રચાઈ હતી. શિંદે અને (તત્કાલીન નાયબ મુખ્ય પ્રધાન દેવેન્દ્ર ફડણવીસ) બંને એક વાત પર સંમત થયા હશે કે જો સરકારે કામ કરવું હોય તો રાઉતને જેલના સળિયા પાછળ જવું પડશે,’ એવો દાવો તેમણે કર્યો હતો.
આપણ વાંચો: બિહારની ચૂંટણી પહેલા તહવ્વુરને ફાંસી?: સંજય રાઉતે મોદી સરકારને પૂછ્યા સવાલો
રાઉતે કહ્યું કે ભાજપને દુ:ખ એ વાતનું થયું હતું કે તેને 105 બેઠકો (2019ની ચૂંટણીમાં 288 સભ્યોની વિધાનસભામાં) જીતવા છતાં વિપક્ષમાં બેસવું પડ્યું હતું.
‘શિવસેનાએ શરદ પવારની આગેવાની હેઠળની એનસીપી સાથે હાથ મિલાવ્યા પછી, ભાજપને વિપક્ષમાં બેસવું પડ્યું. ભાજપ 2019માં મહારાષ્ટ્રમાં સરકાર ન બનાવી શક્યું તેનું કારણ રાઉતને માનતી હતી. ભાજપને હંમેશા આ બાબતનો અફસોસ રહ્યો છે,’ એવો દાવો તેમણે કર્યો હતો.
ભાજપ અને શિવસેનાએ 2019ની વિધાનસભા ચૂંટણી સાથે લડી હતી, પરંતુ મુખ્ય પ્રધાનપદ માટે શિવસેના ભાજપથી અલગ થઈ ગઈ હતી. બાદમાં તે કોંગ્રેસ અને (અવિભાજિત) એનસીપીના બનેલા મહા વિકાસ આઘાડી (એમવીએ)નો ભાગ બની. એમવીએ સરકારનું નેતૃત્વ ઉદ્ધવ ઠાકરે દ્વારા કરવામાં આવ્યું હતું.
ભાજપના ઉગ્ર ટીકાકાર તરીકે જાણીતા રાજ્યસભા સાંસદે કહ્યું હતું કે ભૂતપૂર્વ સાથી પક્ષ 2019માં ઉદ્ધવ ઠાકરેને મુખ્ય પ્રધાન તરીકે જોઈ શક્યો નહીં તેથી તેના નેતાઓએ તેમની સરકાર તોડી પાડવાનું કાવતરું ઘડ્યું હતું.
સરકાર પાસે 170 વિધાનસભ્યોની બહુમતી હોવાથી, તેમનું ‘ઓપરેશન લોટસ’ સફળ થાય તે શક્ય નહોતું, એમ તેમણે કહ્યું હતું. ‘તેથી જ કેન્દ્રીય એજન્સીઓ યુદ્ધના મેદાનમાં આવી ગઈ. ‘અનિલ દેશમુખ, નવાબ મલિક અને સંજય રાઉતને નિશાન બનાવવામાં આવ્યા હતા,’ એમ તેમણે કહ્યું હતું.
કેન્દ્રીય એજન્સીએ રાજકીય એજન્ડા નક્કી કર્યો હતો અને મહારાષ્ટ્રમાં ધરપકડ કરવા માટે એમવીએ નેતાઓની યાદી બનાવી હતી. પુસ્તકમાં દાવો કરવામાં આવ્યો છે કે આ યાદીમાં દેશમુખ, મલિક અને રાઉતનો સમાવેશ થાય છે.
દેશમુખ અને મલિક, બંને નેતા એનસીપીના હતા અને ઠાકરે સરકારમાં પ્રધાન હતા.
ઈડીએ અવિભાજિત શિવસેનાના 40 વિધાનસભ્યો (શિંદે સહિત)માંથી 11 વિધાનસભ્યો પર પોતાનો સકંજો કડક કરી દીધો હતો, જેમણે ઠાકરે વિરુદ્ધ બળવો કર્યો હતો. ઈડી અવિભાજિત શિવસેનાના કેટલાક સાંસદોની પણ ધરપકડ કરવા જઈ રહી હતી, એવો દાવો સંજય રાઉતે કર્યો હતો.