બિલ્ડરને સસ્તામાં જમીન અપાવવાની લાલચ આપી ગઠીયાએ આટલા કરોડનો ચૂનો લગાવ્યો
અમદાવાદઃ શહેરના લપકામણમાં રહેતા બિલ્ડર સહિત અનેક લોકોને શેરબજાર-જમીનમાં રોકાણની લાલચ આપી બે ગઠીયા 14 કરોડનો ચૂનો લગાવી ગયા હતા. સોલામાં રહેતા બે ગઠિયાઓએ બિલ્ડર અને અન્ય કેટલીક વ્યક્તિઓને શેરબજારમાં રોકાણની સામે તગડો નફો કમાવી આપવાની સાથે એક રોકાણકારને રાજકોટ જિલ્લાના ઉપલેટામાં સસ્તામાં જમીન અપાવવાના નામે છ કરોડ લઇને કુલ 14 કરોડ ઉપરાંતની છેતરપિંડી આચરી હોવાની ફરિયાદ સોલા પોલીસ સ્ટેશનમાં નોંધાઈ હતી. સોલા પોલીસે મુખ્ય આરોપીની ધરપકડ કરીને સમગ્ર મામલે તપાસ શરૂ કરી હતી.
શું છે મામલો?
અમદાવાદ જિલ્લાના લપકામણમાં રહેતા વિજયભાઇ પટેલે સોલા પોલીસ સ્ટેશન ખાતે નોંધાવેલી ફરિયાદ મુજબ, તેઓ જમીન લે-વેચ અને કન્ટ્રક્શનનો વ્યવસાય કરે છે અને તેમની ઓફિસ સોલા સાયન્સ સીટી રોડ પર ઓફિસ ધરાવે છે. તેમના જ કોમ્પ્લેક્સમાં કિશન રાડીયા નામનો વ્યક્તિ પણ શેરબજારને લગતી ઓફિસ ધરાવતો હતો. કિશન રાડીયાએ વિજયભાઇના પિતરાઇ ભાઇ જતીનભાઇને શેરબજારમાં રોકાણની સામે ઉંચુ વળતર અપાવવાની ખાતરી આપી હતી. જેથી વિશ્વાસ કરીને ઓક્ટોબર 2023માં બેંક એકાઉન્ટમાં 2 કરોડ રૂપિયા ટ્રાન્સફર કરી આપ્યા હતા.
આ ઉપરાંત, કિશને તેમને કહ્યુ હતું કે તેમના ધ્યાનમાં રાજકોટ જિલ્લાના ઉપલેટામાં એક સોનાની લગડી જેવી જમીન સસ્તામાં મળી રહે તેવી છે. જેમાં ખુબ સારૂ વળતર મળશે. જેથી જતીનભાઇએ વિશ્વાસ કરીને આંગડિયા મારફતે કિશનના કહેવાથી ઉપલેટામાં રહેતા નવનીત નામના વ્યક્તિને છ કરોડ રૂપિયા મોકલી આપ્યા હતા. આમ, જતીનભાઇએ કુલ 8 કરોડનું રોકાણ કર્યું હતું. જેની સામે વિશ્વાસ અપાવવા માટે કિશને તેમને 54લાખ નફા પેટે પરત આપ્યા હતા.
જતીનભાઇને નફો થતો હોવાથી વિજયભાઇએ પણ શેરબજારમાં રોકાણ કરવા માટે 4.25 કરોડનું આપ્યા હતા. આ ઉપરાંત, અન્ય રોકાણકારોએ પણ મોટાપ્રમાણમાં રોકાણ કરતા કુલ 14 કરોડ ઉપરાંતની રકમ શેરબજારમાં રોકાણ માટે આપી હતી. પરંતુ, ત્યારબાદ મહિનાઓ વીતી ગયા બાદ વળતર ન મળતા રોકાણકારોને છેતરપિંડીનો ખ્યાલ આવ્યો હતો. એટલુ જ નહી આરોપી કિશન રાડીયાએ તેની ઓફિસ પણ બંધ કરી દીધી હતી.
પ્રાથમિક તપાસમાં જાણવા મળ્યું હતું કે નાણાંનું રોકાણ કરનારાઓએ પોતાના ડીમેટ એકાઉન્ટ ખોલાવ્યા નહોતા અને ટેક્ષ ન લાગે તેમજ અન્ય કોઇ ઇન્કવાયરી ન થાય તે માટે કિશન રાડીયાને મૌખિક રીતે કરાર કરીને શેરબજારમાં રોકાણ કરવા માટે કરોડો રૂપિયા આપી દીધા હતા.
પોલીસે બીજા કેટલા લોકો આ રીતની છેતરપિંડીનો ભોગ બન્યા છે તેની તપાસ શરૂ કરી છે.
આ પણ વાંચો…શૅર ટ્રેડિંગમાં અધધધ નફાની લાલચે કરોડો રૂપિયાનું સાયબર ફ્રોડ: છ પકડાયા