ઘર અને કોર્પોરેટ ટેક્સ પર કાપ મૂકવાની આ દેશની યોજના

ટોક્યોઃ જાપાનના વડા પ્રધાન ફ્યુમિયો કિશિદાએ ઘરો અને કોર્પોરેટ ટેક્સ બ્રેક્સ માટે આવકવેરામાં કાપ મૂકવાની યોજના ઘડી રહ્યા છે. વડાપ્રધાન કિશિદાએ જણાવ્યું હતું કે, તેઓ મોંઘવારીથી પ્રભાવિત ઘરો માટે આવકવેરામાં કાપ અને રોકાણને પ્રોત્સાહન આપવા માટે કંપનીઓ માટે ટેક્સ બ્રેક સહિતના સાહસિક આર્થિક પગલા લેવાની તૈયારી કરી રહ્યા છે. તેમની આ તૈયારીને ઘટી રહેલા જાહેર સમર્થનને મજબૂત કરવાના પગલા તરીકે જોવામાં આવી રહી છે.

નવા સંસદીય સત્રની શરૂઆતના તેમના ભાષણમાં કિશિદાએ જણાવ્યું હતું કે ઓછો ખર્ચ, ઓછું વેતન અને ખર્ચમાં ઘટાડાની અર્થવ્યવસ્થામાંથી ટકાઉ વેતન વધારો અને સક્રિય રોકાણની આગેવાની હેઠળની વૃદ્ધિ દ્વારા સમર્થિત અર્થતંત્ર તરફ જવાનો સમય આવી ગયો છે. કિશિદાએ કહ્યું કે હું અભૂતપૂર્વ રીતે સાહસિક પગલા લેવા માટે કટિબદ્ધ છું. હું અન્ય કંઇપણ કરતા અર્થતંત્ર પર વધુ ભાર મૂકીશ.

તેમણે કહ્યું હતું કે તેઓ આવકવેરામાં કાપ લાગુ કરીને લોકોને ખોરાક, ઉપયોગિતાઓ અને અન્ય ખર્ચાઓ કે જે તેમના પગાર વધારાને વટાવી ગયા છે તેની વધતી કિંમતોની અસરમાંથી બહાર નીકળવામાં મદદ કરવા માટે સંકલ્પબદ્ધ છે.
તેમણે વેતન વૃદ્ધિ, રોકાણ અને ઓપ્ટિમાઇઝેશનને પ્રોત્સાહન આપવા માટે કોર્પોરેટ ટેક્સ પ્રોત્સાહનો રજૂ કરવાનું પણ વચન આપ્યું હતું. કિશિદાની ટેક્સ બ્રેક્સ અંગેની પ્રતિજ્ઞાને વિરોધ પક્ષના નેતાઓએ મત બેંક એકઠી કરવાના પ્રયાસ તરીકે ગણાવ્યો છે અને ટીકા કરી છે.

સીડીપીજેના વરિષ્ઠ ધારાસભ્ય જુન અઝૂમીએ જણાવ્યું હતું કે, પરિણામો સ્પષ્ટ દર્શાવે છે કે વધતી કિંમતોને પહોંચી વળવા સરકારના વિલંબિત આર્થિક પગલાથી ઘણા મતદારો અસંતુષ્ટ છે.