ગુજરાતે મેળવી વધુ એક સિધ્ધી, આયુષ્માન ભારત હેલ્થ એકાઉન્ટ હેઠળ 70 ટકા નાગરિકોની નોંધણી થઇ

ગાંધીનગર : ગુજરાત સરકારે વધુ એક સિદ્ધિ મેળવી છે. જેમાં આયુષ્માન ભારત ડિજિટલ મિશન હેઠળ રાજ્યના 4.77 કરોડથી એટલે 70 ટકાથી નાગરિકોની નોંધણી કરવામાં આવી છે. આભા (ABHA)કાર્ડ હેઠળ રેકોર્ડ્સના ડિજીટલાઇઝેશનમાં અગ્રેસર રાજ્ય બન્યું છે.

17,800થી વધુ આરોગ્ય સુવિધાઓની નોંધણી પૂર્ણ

આ ઉપરાંત 2.26 કરોડથી વધુ હેલ્થ રેકોર્ડ લિંક, 17,800થી વધુ આરોગ્ય સુવિધાઓ અને 42,000 પ્રોફેશનલ્સની નોંધણી આયુષ્માન ભારત ડિજિટલ મિશન (ABDM)હેઠળ અત્યાર સુધીમાં 2.26 કરોડથી વધુ આરોગ્ય રેકોર્ડને સફળતાપૂર્વક ડિજિટલી લિંક કરવામાં આવ્યા છે. આ મિશન હેઠળ 17,800થી વધુ આરોગ્ય સુવિધાઓની નોંધણી પણ પૂર્ણ થઈ ગઈ છે. જેનાથી આરોગ્ય સેવાઓની પહોંચ અને ગુણવત્તામાં સુધારો થયો છે. આ ઉપરાંત, 42,000થી વધુ હેલ્થકેર પ્રોફેશનલ્સ પણ સફળતાપૂર્વક નોંધણી કરાવીને ડિજિટલ હેલ્થ સિસ્ટમ સાથે જોડાઈ ગયા છે.

દેશભરમાં 100 ABDM માઇક્રોસાઇટ્સ લાગુ કરવામાં આવી

નોંધનીય છે કે 27 સપ્ટેમ્બર 2021ના રોજ આયુષ્માન ભારત ડિજિટલ મિશન (ABDM) હેઠળ ખાનગી આરોગ્ય વ્યાવસાયિકો અને સંસ્થાઓને ડિજિટલ સેવાઓ સાથે જોડવા માટે અમદાવાદ, સુરત અને મુંબઈમાં ABDM માઇક્રોસાઇટ પાઇલટ પ્રોજેક્ટની શરૂઆત કરવામાં આવી હતી. આ પ્રોજેક્ટના સકારાત્મક પરિણામો બાદ હવે દેશભરમાં 100 ABDM માઇક્રોસાઇટ્સ લાગુ કરવામાં આવી છે.

ABDMની ‘સ્કેન અને શૅર’ સુવિધા દ્વારા OPD અનુભવ બન્યો સરળ

આયુષ્માન ભારત ડિજિટલ મિશન (ABDM) હેઠળ, ‘સ્કેન અને શૅર’ સુવિધાએ આરોગ્ય સેવાઓની પહોંચ અને પ્રક્રિયામાં નોંધપાત્ર સુધારો કર્યો છે. આ સુવિધા રજિસ્ટર્ડ નાગરિકો માટે રાજ્યની 19 મેડિકલ કૉલેજ સંલગ્ન હોસ્પિટલોમાં ઉપલબ્ધ કરાવવામાં આવી છે. દર્દીઓ હવે ફક્ત QR કોડ સ્કેન કરીને સરળતાથી તેમનો OPD ટોકન નંબર મેળવી શકે છે.

આ ઉપરાંત, દર્દીની સંમતિથી ડૉક્ટરોને દર્દીના આયુષ્માન ભારત હેલ્થ એકાઉન્ટ (ABHA) સાથે જોડાયેલી તમામ ડિજિટલ આરોગ્ય માહિતીની તાત્કાલિક ઍક્સેસ મળે છે. QR કોડ ‘સ્કેન અને શૅર’ સુવિધાએ માત્ર દર્દીના અનુભવમાં સુધારો નથી કર્યો, પરંતુ આરોગ્ય સેવાઓની પ્રક્રિયાને વધુ કાર્યક્ષમ અને અસરકારક પણ બનાવી છે.

આયુષ્માન ભારત હેલ્થ એકાઉન્ટ શું છે?

આયુષ્માન ભારત હેલ્થ અકાઉન્ટ (ABHA)એ એક ડિજિટલ આરોગ્ય ઓળખ છે. જેનો ઉદ્દેશ નાગરિકોના સ્વાસ્થ્ય રેકોર્ડને એકીકૃત કરીને તેને સુરક્ષિત રીતે સંગ્રહિત કરવાનો છે. આ અંતર્ગત, નાગરિકોને ડિજિટલ હેલ્થ આઈડી આપવામાં આવે છે. જેથી તેમનો સ્વાસ્થ્ય રેકોર્ડ ઓનલાઈન સુરક્ષિત રહે. આ સિસ્ટમ ડેટા સુરક્ષા અને ગોપનીયતા સુનિશ્ચિત કરે છે અને માહિતી ફક્ત નાગરિકની મંજૂરીથી જ શેર કરી શકાય છે.

આપણ વાંચો:  વડોદરામાં ઈન્કમટેક્સ ઓફિસ સુપ્રીટેન્ડેન્ટને 500 રૂપિયાની લાંચ માંગવી ભારે પડી, એસીબીએ ઝડપી લીધો