હૈદરાબાદના મેદાન પર પંજાબની આતશબાજી

હૈદરાબાદઃ પંજાબ કિંગ્સે અહીં ગઈ કાલે સનરાઇઝર્સ હૈદરાબાદ સામે અહીં હૈદરાબાદના જ મેદાન પર જોરદાર ફટકાબાજી કરી હતી. પંજાબે બૅટિંગ લીધા પછી 20 ઓવરમાં છ વિકેટે 245 રન કર્યા હતા. આ વખતની આઇપીએલ (IPL-2025)નો આ બીજા નંબરનો સૌથી મોટો ટીમ-સ્કોર છે. આ લિસ્ટમાં હૈદરાબાદના 286/6 હાઇએસ્ટ છે.

અગાઉની મૅચના સુપરસ્ટાર ઓપનર પ્રિયાંશ આર્યએ આ મૅચમાં (36 રન, 13 બૉલ, ચાર સિક્સર, બે ફોર) અને પ્રભસિમરન સિંહ (42 રન, 23 બૉલ, એક સિક્સર, સાત ફોર) વચ્ચેની 66 રનની ઓપનિંગ ભાગીદારી પછી કૅપ્ટન શ્રેયસ ઐયરે (82 રન, 36 બૉલ, છ સિક્સર, છ ફોર) બાજી સંભાળી લીધી હતી અને ટીમના સ્કોરને 200-પ્લસ પહોંચાડ્યા પછી જ વિકેટ ગુમાવી હતી.

હૈદરાબાદના ફાસ્ટ બોલર હર્ષલ પટેલે 42 રનમાં ચાર વિકેટ લીધી હતી તેમ જ શ્રીલંકન ફાસ્ટ બોલર ઇશાન મલિન્ગાએ બે વિકેટ લીધી હતી, પરંતુ પંજાબના બૅટ્સમેન અને ખાસ કરીને ઐયર (SHREYAS IYER ) સામે કોઈનું કંઈ ચાલ્યું નહોતું અને તે વનડાઉન આવ્યા બાદ 18મી ઓવર સુધી લડતો રહ્યો હતો.

ઐયરે પ્રભસિમરન સાથે પચીસ રનની, નેહલ વઢેરા (27 રન, બાવીસ બૉલ, એક સિક્સર, બે ફોર) સાથે 73 રનની અને મૅક્સવેલ (ત્રણ રન) સાથે 37 રનની ભાગીદારી કરી હતી. સ્ટોઇનિસ (34 અણનમ, 11 બૉલ, ચાર સિક્સર, એક ફોર) પણ ધમાકેદાર રમ્યો હતો.

હૈદરાબાદના બોલર્સમાં શમી, કૅપ્ટન કમિન્સ અને ઝીશાન અન્સારીને વિકેટ નહોતી મળી.