વકફ બિલનો વિરોધ: મુસ્લિમ પર્સનલ લૉ બોર્ડે રાષ્ટ્રપતિને મળવાનો માગ્યો સમય…
નવી દિલ્હીઃ ભારતભરમાં અત્યારે વક્ફ બોર્ડ બિલનો વિરોધ થઈ રહ્યો છે. જો કે, વક્ફ (સંશોધન) બોર્ડ બિલ લોકસભા અને રાજ્યસભા બન્ને સદનમાં પાસ થઈ ગયું છે. હવે માત્ર રાષ્ટ્રપતિ આ બિલ પર હસ્તાક્ષર કરે એટલે તે કાયદો બની જશે. પરંતુ હવે વિપક્ષી પક્ષો અને ઓલ ઈન્ડિયા મુસ્લિમ પર્સનલ લો બોર્ડ (AIMPLB) સહિત અનેક મુસ્લિમ સંગઠનો આ બિલનો સતત વિરોધ કરી રહ્યા છે. એટલું જ નહીં પરંતુ અત્યારે ગુજરાત સહિત અનેક રાજ્યોમાં બિલના વિરોધમાં પ્રદર્શનો થઈ રહ્યાં છે. આ દરમિયાન ઓલ ઈન્ડિયા મુસ્લિમ પર્સનલ લો બોર્ડે વક્ફ (સંશોધન) બોર્ડ બિલ અંગે ભારતના રાષ્ટ્રપતિ દ્રૌપદી મૂર્મુ સાથે તાત્કાલિક મુલાકાત કરવા માટે સમય માંગ્યો છે.
રાષ્ટ્રપતિ સાથે તાત્કાલિક બેઠક કરવા માટે AIMPLBની માંગ
વક્ફ (સંશોધન) બોર્ડ બિલને લઈને વિરોધી પક્ષો વિરોધ કરી રહ્યાં છે. રાષ્ટ્રપતિ આ બિલને મંજૂરી આપે તે પહેલાં, ઓલ ઈન્ડિયા મુસ્લિમ પર્સનલ લો બોર્ડ (AIMPLB) એ સંસદ દ્વારા પસાર કરાયેલા વક્ફ સુધારા બિલ પર પોતાની ચિંતા વ્યક્ત કરવા માટે રાષ્ટ્રપતિ દ્રૌપદી મૂર્મુ સાથે તાત્કાલિક બેઠક કરવા માટે માંગણી કરી છે. આ મામલે AIMPLB ના પ્રવક્તા ડૉ. SQR ઇલ્યાસે બોર્ડના મહાસચિવ મૌલાના ફઝલુર રહીમ મુજદ્દી દ્વારા લખાયેલા પત્રમાં લખવામાં આવ્યું કે, આ અધિનિયમ દ્વારા રજૂ કરાયેલા સુધારાઓમાં નોંધપાત્ર ફેરફારો છે જે વક્ફ સંસ્થાના વહીવટ અને સ્વાયત્તતાને અસર કરે છે, જેણે ઐતિહાસિક રીતે ધાર્મિક અને સખાવતી પ્રવૃત્તિઓમાં મહત્વપૂર્ણ ભૂમિકા ભજવી છે.’
વક્ફ (સંશોધન) બોર્ડ બિલને લઈને AIMPLBએ ચિંતા વ્યક્ત કરી
હવે જોવાનું એ રહેશે શું રાષ્ટ્રપતિ ઓલ ઈન્ડિયા મુસ્લિમ પર્સનલ લો બોર્ડને મુલકાત માટે સમય આપે છે કે કેમ? કારણ કે, રાષ્ટ્રપતિ આ બિલ પર હસ્તાક્ષર કરશે પછી તે કાયદો બનશે અને પછી તેમાં કોઈ પણ પ્રકારનો ફેરફાર નહીં થઈ શકે! આ પત્રમાં વધુમાં લખવામાં આવ્યું છે કે, રાષ્ટ્રપતિને મળવાનો અમારો હેતુ તાજેતરમાં પસાર થયેલા વકફ (સુધારા) બિલ 2025 અને દેશભરના મુસ્લિમ સમુદાય પર તેની અસરો અંગે અમારી ઊંડી ચિંતા વ્યક્ત કરવાનો છે. આ બિલને લઈને ઓલ ઈન્ડિયા મુસ્લિમ પર્સનલ લો બોર્ડે ચિંતા વ્યક્ત કરી છે અને આ બિલના વિરોધમાં પ્રદર્શનો પણ કર્યાં છે.
કાયદાની જોગવાઈઓ પર ગંભીર પુનર્વિચારની જરૂરઃ AIMPLB
ઓલ ઈન્ડિયા મુસ્લિમ પર્સનલ લો બોર્ડે આ બિલ અંગે વધુમાં કહ્યું કે, આ બિલ સંપૂર્ણપણે ગેરબંધારણીય છે અને દેશના મુસ્લિમોને ટાર્ગેટ કરવામાં આવ્યાં છે. અમારું માનવું છે કે કાયદાની જોગવાઈઓ પર ગંભીર પુનર્વિચારની જરૂર છે, કારણ કે તે ભારતના બંધારણ હેઠળ આપવામાં આવેલા મૂળભૂત અધિકારો, ખાસ કરીને ધાર્મિક સ્વતંત્રતા, સમાનતા અને ધાર્મિક સંસ્થાઓના રક્ષણના સંદર્ભમાં, અસંગત છે. એ વાત સાચી છે કે, ભારતનું બંધારણ લોકોને સમાનતાનો અધિકાર આપે છે પરંતુ આ બિલને લોકસભા અને રાજ્યસભામાં બન્ને સદનમાં પસાર થઈ ગયું છે, હવે રાષ્ટ્રપતિ હસ્તાક્ષર કરવા માટે કેટલો સમય લે છે તે જોવું રહ્યું!
આપણ વાંચો : વક્ફ સંશોધન બિલના વિરોધમાં થઈ સુપ્રીમ કોર્ટમાં અરજી, કૉંગ્રેસે લગાવ્યો આવો આરોપ…