કચ્છમાં બનેલી ખગોળીય ઘટનાથી સર્જાયું કુતુહલ: લોકો બ્રહ્નમુહુર્તે જાગ્યા…

ભુજ: સરહદી જિલ્લા કચ્છમાં એક તરફ ભૂકંપના કંપનોમાં સતત વધારો થઇ રહ્યો છે ત્યારે સોમવારે વહેલી પરોઢિયે ૩ અને ૧૨ કલાકે કચ્છના આકાશમાં તેજ લિસોટા જોવા મળતા, આ રણપ્રદેશમાં ઉલ્કા પડી હોવાના પ્રાથમિક સંકેતો મળી રહ્યા છે.
આ અંગે મળતી વિગતો પ્રમાણે કચ્છના ધ્રંગ અને લોડાઇ આસપાસના ગ્રામ્ય વિસ્તારોમાં લોકોએ અચાનક આંખો આંજી નાંખતા પ્રકાશના લિસોટા જોયા હતા અને આ લિસોટા સામસામા ‘વી’ શેપમાં પરિવર્તિત થઈને અવકાશમાં ઓઝલ થઇ ગયા હતા.

Also read : કચ્છની કેસર કેરીનો સ્વાદ બનશે દોહ્યલો? કચ્છમાં ખરાબ વાતાવરણથી ખરી રહ્યો છે મોર-ખેડૂતોમાં ચિંતા

આ તેજ પ્રકાશપુંજના વિરલ દ્રશ્યો સીસીટીવી કેમેરામાં ઝડપાઇ જતાં ગ્રામજનોની આ વાતને સમર્થન મળવા પામ્યું છે. કચ્છના જાણીતા ખગોળ શાસ્ત્રી નરેન્દ્રભાઈ ગોર ‘સાગર’ના જણાવ્યા પ્રમાણે, આ પ્રચંડ પ્રકાશપુંજ બે સીધી લીટીના સ્વરૂપમાં ‘વી’ શેપમાં પ્રકાશપુંજ ફેલાવાની સાથે અદ્રશ્ય થઇ જતાં આ વિસ્તારમાં ઉલ્કા પડી હોવાની સંભાવના ઉભી થવા પામી છે તેથી આ વિસ્તારમાં જો તેના કોઈ અવશેષ મળે તો તેને શોધવાની કામગીરી સ્થાનિક લોકોના સહકારથી શરૂ કરી દેવાઈ છે.

આ વિસ્તારના પૈયા, નાના વરનોરા, મોટા વરનોરા સહિતના ગામોમાં લોકોએ આ પ્રકાશપુંજોને નરી આંખે નિહાળ્યા હતા અને ત્યારબાદ કુતુહલવશ લોકો જાણે બ્રહ્નમુહૂર્તમાં જ જાગી ગયા હતા. આ ઉપરાંત પવિત્ર રમજાન માસ ચાલી રહ્યો હોઈ,મુસ્લિમ બિરાદરોની વસ્તીવાળા આ ગામોમાં લોકો જાગતા હતા જેથી મોટી સંખ્યામાં તેઓએ આ ઘટના નિહાળી છે. બન્ની-પચ્છમના ગામોમાં ખુલ્લામાં નિંદ્રાધીન લોકોએ પણ આ વિરલ ઘટના નિહાળી હતી. જાણવા મળતી વિગતો પ્રમાણે સૌરાષ્ટ્રના જામનગર સહિતના વિસ્તારોમાં તેમજ પાકિસ્તાનના સિંધ પ્રાંતના મોટાભાગના વિસ્તારોમાં આ પ્રકાશપુંજો જોવા મળ્યા હતા.

ઉલ્લેખનીય છે કે, કચ્છમાં તેમજ ગુજરાતમાં ઉલ્કાવર્ષા થઇ હોવાનો આ પહેલો બનાવ નથી. આજથી લગભગ પાંચ દાયકા પૂર્વે જાન્યુઆરી ૧૯૭૬ના આ પ્રકારની ઉલ્કાવર્ષા સુરેન્દ્રનગર પાસેના ધજાડા ખાતે થવા પામી હતી, જયારે વર્ષ ૧૯૯૮માં બંદરીય માંડવી અને મુંદરા વચ્ચે પણ ઉલ્કાવર્ષા થઇ હતી, જયારે વર્ષ ૨૦૦૪માં આ પ્રકારની ઉલ્કા કચ્છમાં પણ નોંધાઈ હતી.

Also read : કચ્છમાં ગીધની સંખ્યામાં નોંધપાત્ર ઘટાડો; 15 વર્ષમાં 885 ગીધ ઘટયા

જયારે છેલ્લે ઓગસ્ટ ૨૦૦૬ માં આવી ઘટના કચ્છના ભચાઉ તાલુકાના વાંઢીયા ગામમાં નોંધાઈ હતી અને તેના ટુકડા કે જેને ‘મેટાલિક માસ’ પણ કચ્છ-સૌરાષ્ટ્રને જોડતા સુરાજબારી પૂલ તેમજ વાંઢીયા ગામ પાસેથી મળી આવ્યા હતા.
દરમ્યાન, આ ઉલ્કા પડવાની ખગોળીય ઘટનાથી કચ્છમાં ભારે કુતુહુલ ફેલાયું છે, જો કે આ ઉલ્કા પડી હતી કે કોઈ અન્ય ખગોળીય નજારો હતો તેનું સમર્થન મળતાં હજુ થોડો સમય લાગી શકે છે તેમ જાણવા મળી રહ્યું છે.