મુંબઈની હવા સતત ત્રીજા દિવસે દિલ્હી કરતા પણ ખરાબ

મુંબઇઃ દેશની આર્થિક રાજધાનીમાં વાયુ પ્રદૂષણ વધવા માંડ્યું છે. મુંબઈ દિવસેને દિવસે રાજધાની દિલ્હીને પ્રદૂષણના મામલામાં પાછળ છોડી રહ્યુ છે. મુંબઈ દિલ્હીને પછાડીને સતત ત્રીજી વખત સૌથી પ્રદૂષિત શહેર બની ગયું છે. મંગળવાર સુધીમાં, મુંબઈનો એર ક્વોલિટી ઈન્ડેક્સ (AQI) 113 નોંધાયો હતો. ગુરુવારે સવારે તે વધીને 161 થઈ ગયો, જે દિલ્હી કરતાં પણ ખરાબ હતો. ગુરુવારે સવાર સુધી દિલ્હીનો AQI 117ની ‘મધ્યમ’ શ્રેણીમાં હતો.

દિલ્હીમાં વાયુ પ્રદૂષણની સમસ્યા નવી નથી. પરાળી સળગાવવા અને વાહનોના પ્રદૂષણને કારણે દિલ્હી હંમેશાથી વિશ્વના સૌથી પ્રદૂષિત શહેરોમાંનું એક રહ્યું છે. અહીં સૌથી વધુ પ્રદૂષણ સામાન્ય રીતે ઓક્ટોબર મહિનામાં થાય છે અને દિવાળીની આસપાસ ખતરનાક સ્તરે પહોંચે છે, જેને કારણે અહીં દિવાળીમાં ફટાકડા ફોડવા પર પણ પ્રતિબંધ હોય છે. છેલ્લા કેટલાક વર્ષોમાં દિલ્હી સરકાર આ સમસ્યા માટે હરિયાણા, પંજાબ અને પશ્ચિમ યુપીના ખેડૂતોને જવાબદાર ઠેરવી રહી છે.

મુંબઇની વાત કરીએ તો હાલમાં ધુમ્મસની ચાદરે મુંબઈને ઢાંકી દીધી છે, જેના કારણે તે AQIમાં નવી દિલ્હીથી આગળ નીકળી ગયું છે. મહારાષ્ટ્રના મંત્રી દીપક કેસરકરે જણાવ્યું હતું કે સમગ્ર મુંબઈમાં ચાલી રહેલા બાંધકામ પ્રોજેક્ટ્સ, જેમ કે મેટ્રો વર્ક, મોટા પાયે વાયુ પ્રદૂષણમાં ફાળો આપી રહ્યા છે. પ્રદૂષણને કાબુમાં લેવા માટે સમગ્ર શહેરમાં ફોગિંગ મશીનો લગાવવામાં આવી રહ્યા છે.

મુંબઇમાં સવારે ધુમ્મસછાયા વાતાવરણને કારણે મુંબઇની ટ્રેન સેવાને પણ અસર પહોંચી હતી અને ટ્રેનો મોડી દોડી રહી હતી. મધ્ય રેલવેના મુખ્ય જનસંપર્ક અધિકારી ડૉ. શિવરાજ માનસપુરેએ જણાવ્યું હતું કે ‘મુંબઈને અડીને આવેલા થાણે જિલ્લાના વાસિંદ અને ટિટવાલા વચ્ચે સવારે 6.30 થી સવારે 9 વાગ્યા સુધી અને રાયગઢ જિલ્લાના કર્જત અને બદલાપુર થાણે વચ્ચે સવારે 5.30 વાગ્યા સુધી. 9 વાગ્યા સુધી ધુમ્મસ યથાવત રહ્યું હતું, જેને કારણે ટ્રેનો મોડી દોડી રહી હતી.