Holi 2025: ગુજરાત વિધાનસભા પરિસરમાં સીએમ ભૂપેન્દ્ર પટેલ સહિત ધારાસભ્યોએ ઉજવ્યું રંગપર્વ
અમદાવાદ : દેશભરમાં 13 માર્ચના રોજ હોળીનું પર્વ(Holi 2025)ઉજવવામાં આવશે. ત્યારે આજે ગુજરાત વિધાનસભા પરિસરમાં સીએમ ભૂપેન્દ્ર સહિત ધારાસભ્યોએ રંગ પર્વની ઉત્સાહભેર ઉજવણી કરી હતી.
આ ઉજવણીમાં મુખ્યમંત્રી ભૂપેન્દ્ર પટેલ,વિધાનસભા અધ્યક્ષ શંકર ચૌધરી સહિત વિધાનસભાના સભ્યો જોડાયા હતા. આ હોળી ઉત્સવ ઉજવણી ગાંધીનગરમાં વિધાનસભા ગૃહની સામેના હરિયાળા પ્રાંગણમાં રંગ-ઉમંગની છોળો અને પરંપરાગત આદિવાસી નૃત્યોની રમઝટ સાથે ઉજવાયો હતો.
પરંપરાગત ઘેરૈયા નૃત્યોના તાલના સંગે સભ્યો પ્રાંગણમાં પહોંચ્યા
ગુજરાત વિધાનસભાની બેઠકની બુધવારના દિવસની કાર્યવાહી પૂરી થયા બાદ ગૃહના નેતા અને મુખ્યમંત્રી ભૂપેન્દ્ર પટેલ તથા અધ્યક્ષ, મંત્રીઓ, ધારાસભ્યોએ વિધાનસભા ગૃહની સામેના હરિયાળા પ્રાંગણમાં આ હોળી ઉત્સવ માટે એકત્ર થયા હતા.જેમાં આદિવાસી કલાકારો દ્વારા પ્રસ્તુત પરંપરાગત ઘેરૈયા નૃત્યોના તાલના સંગે સભ્યો પ્રાંગણમાં પહોંચ્યા હતા.
આપણ વાંચો: હોળીનો તહેવાર આ 5 સદાબહાર ગીતો વિના સાવ ફિક્કો!, આજેય રાજ કરે છે લોકોના દિલમાં…
એકબીજાને રંગો ઉડાડી રંગભીના કર્યા
વિધાનસભા પરિસર સામેના આ હરિયાળા પ્રાંગણમાં હોળીગીતોની સંગીતમય પ્રસ્તુતિ, તથા આદિવાસીઓનાં હોળીનૃત્યોના રંગસભર માહોલ વચ્ચે મુખ્યમંત્રી સહિત સૌએ એકબીજાને રંગો ઉડાડી રંગભીના કર્યા હતા અને આ રંગપર્વનો મન મૂકીને આનંદ માણ્યો હતો.
હોળીગીતોના તાલે ગરબા પણ રમ્યા
પ્રાંગણમાં બેસવા માટે ખાટલા-ઢોલિયા સાથે રંગબેરંગી ફૂલોની સજાવટથી નયનરમ્ય રંગોળી પણ આ હરિયાળા પ્રાંગણની શોભા વધુ રંગમય બની હતી. રાજ્ય મંત્રીમંડળના મંત્રીઓ, ધારાસભ્યો, હોળીગીતોના તાલે ગરબા પણ રમ્યા હતા અને સમગ્ર વાતાવરણને રંગારંગ ઉલ્લાસમય અને પરસ્પર પ્રેમનું પ્રતીક બનાવ્યું હતું. તેમજ ધારાસભ્યોએ સમૂહ ભોજનનો આસ્વાદ પણ માણ્યો હતો.