નવી દિલ્હી : અમેરિકામાં ડોનાલ્ડ ટ્રમ્પ રાષ્ટ્રપતિ બન્યા બાદ અનેક દેશો પર લાદેલા ટેરિફની(US Tariff War) સમગ્ર વિશ્વમાં ચર્ચા છે. જેમા ડોનાલ્ડ ટ્રમ્પે ભારત સહિતના અનેક દેશોમાં 2 એપ્રિલ બાદ રેસીપ્રોકલ ટેરિફ લાદવાની જાહેરાત કરી છે. ત્યારે હાલમાં જ ભારત અમેરિકન આયાત પર ટેરિફ ઘટાડશે તેવી વાત ડોનાલ્ડ ટ્રમ્પે કરી હતી. તેવા સમયે સોમવારે ભારતના વાણિજ્ય સચિવ સુનિલ બર્થવાલે સંસદીય સમિતિ સમક્ષ માહિતી આપી હતી કે ભારતે આવું કોઇ વચન આપ્યું નથી.
Also read : લલિત મોદી ‘ન ઘરનો ન ઘાટનો’ આ ટાપુ દેશે પણ નાગરિકતા રદ કરી
વિદેશ બાબતોની સંસદીય સમિતિને માહિતી આપતાં વાણિજ્ય સચિવે સ્પષ્ટતા કરી કે આ મુદ્દા પર ભારત અને અમેરિકા વચ્ચે હજુ પણ વાતચીત ચાલી રહી છે. તેમજ બંને દેશો વચ્ચે હજુ સુધી કોઈ કરાર થયો નથી.
ટેરિફ પર કોઈ પ્રતિબદ્ધતા વ્યક્ત નથી કરી.
ઉલ્લેખનીય છે કે સંસદના ઘણા સભ્યોએ અમેરિકન રાષ્ટ્રપતિના એ નિવેદન પર પ્રશ્નો ઉઠાવ્યા હતા જ્યારે તેમણે કહ્યું હતું કે ભારત ટેરિફ ઘટાડવા માટે સંમત થયું છે. આ નિવેદન પર પ્રતિક્રિયા આપતા વાણિજ્ય સચિવ સુનિલ બર્થવાલે કહ્યું, અમેરિકન રાષ્ટ્રપતિના દાવાઓ અને મીડિયા રિપોર્ટ્સ પર વિશ્વાસ કરી શકાય નહીં, કારણ કે બંને દેશો વચ્ચે દ્વિપક્ષીય વેપાર કરાર પર વાટાઘાટો હજુ પણ ચાલી રહી છે. ભારતે અમેરિકા સાથે વેપાર ટેરિફ પર કોઈ પ્રતિબદ્ધતા વ્યક્ત નથી કરી.
આ ઉપરાંત, અધિકારીએ એમ પણ કહ્યું કે ભારત મુક્ત વેપારના પક્ષમાં છે અને વેપારનું ઉદારીકરણ ઇચ્છે છે. જે બંને દેશો વચ્ચે વેપાર વધારવામાં મદદ કરશે. ભારત વેપાર વિસ્તરણને સમર્થન આપે છે. પરંતુ ટેરિફ યુદ્ધ કોઈના હિતમાં નથી અને મંદી તરફ પણ દોરી શકે છે.
તેમણે વધુમાં જણાવ્યું કે, ભારત આડેધડ રીતે ટેરિફ ઘટાડશે નહીં, ખાસ કરીને એવા ક્ષેત્રોમાં જે તેના સ્થાનિક અર્થતંત્ર માટે મહત્વપૂર્ણ છે. ભારત તેના રાષ્ટ્રીય હિતોનું રક્ષણ કરવા માટે બહુપક્ષીય રીતે નહીં પણ દ્વિપક્ષીય રીતે ટેરિફ ઘટાડા માટે વાટાઘાટો કરવાનું પસંદ કરે છે.
કેનેડા અને મેક્સિકોની તુલનામાં જેમણે યુએસ ટેરિફ નીતિઓને સીધી રીતે પડકારી છે. બર્થવાલે કહ્યું કે યુએસ સાથે સુરક્ષા અને સરહદ ઇમિગ્રેશન ચિંતાઓને કારણે તેમની પરિસ્થિતિઓ અલગ છે. તેમણે પુનરોચ્ચાર કર્યો કે ભારત ફક્ત એવા વેપાર કરારો પર હસ્તાક્ષર કરશે જે પરસ્પર ફાયદાકારક હોય.
ભારત સહિત ઘણા દેશો પર પારસ્પરિક ટેરિફની જાહેરાત
અમેરિકાના રાષ્ટ્રપતિ ડોનાલ્ડ ટ્રમ્પે પોતાના બીજા કાર્યકાળના થોડા અઠવાડિયામાં ટેરિફ નીતિઓથી વૈશ્વિક વેપારને ઉથલાવી દીધો છે. ટ્રમ્પે સાથી દેશો અને વિરોધીઓ બંને પર ટેરિફ લાદી દીધા છે.આ ઉપરાંત ટ્રમ્પે આવતા મહિને ભારત સહિત ઘણા દેશો પર પારસ્પરિક ટેરિફની જાહેરાત કરી છે. આ દરમિયાન મળતી માહિતી મુજબ ભારતે અમેરિકા પાસેથી સપ્ટેમ્બર 2025 સુધીનો સમય માંગ્યો છે જેથી ટેરિફ મુદ્દાને વિગતવાર અને વ્યાપક રીતે ઉકેલી શકાય.
Also read : અમેરિકામાં હિંદુ મંદિર પર હુમલા મુદ્દે હિન્દુ મહાસભાના પ્રમુખ સ્વામી ચક્રપાણીએ આપ્યું આ મોટું નિવેદન
કોંગ્રેસ સાંસદ ગૌરવ ગોગોઈએ ગૃહમાં જવાબ માંગ્યો
ઉલ્લેખનીય છે કે, આજે સંસદમાં પણ ટેરિફના મુદ્દા પર હોબાળો થયો હતો. કોંગ્રેસના સાંસદ ગૌરવ ગોગોઈએ જણાવ્યું કે ભારત કયા વિષયો પર ટેરિફ ઘટાડશે. શું ભારતે વિચાર્યું છે કે આપણે અમેરિકા પર પારસ્પરિક ટેરિફ લાદીશું? ગૌરવ ગોગોઈએ કહ્યું કે આખો દેશ જાણવા માંગે છે કે ટેરિફ પર ભારતની નીતિ શું હશે.