નેશનલ હાઇવે પર અકસ્માતો ઘટાડવા સરકારે શું કર્યું? સંસદમાં નીતિન ગડકરીએ કરી વાત
નવી દિલ્હી: દેશમાં દર વર્ષે હજારો લોકો માર્ગ અકસ્માતમાં જીવ ગુમાવે છે. માર્ગ અકસ્માતો રોકવા માટે સરકાર દ્વારા ઘણા પગલાં લેવામાં આવ્યા છે. કેન્દ્રીય માર્ગ પરિવહન મંત્રી નીતિન ગડકરીએ જણાવ્યું હતું કે રાષ્ટ્રીય ધોરીમાર્ગો પર કુલ 13795 ‘બ્લેક સ્પોટની ઓળખ કરવામાં આવી છે, જેમાંથી 9525 બ્લેક સ્પોટ પર ટૂંકા ગાળાના સુધારાના પગલાં પૂર્ણ કરવામાં આવ્યા છે અને 4777 બ્લેક સ્પોટ પર કાયમી સુધારા કરવામાં આવ્યા છે.
આ પણ વાંચો: ઇન્કમ ટેક્સ બાદ હવે ટોલ ટેક્સમાં રાહત આપવાની સરકારની વિચારણાઃ નીતિન ગડકરીએ કરી મોટી વાત
‘બ્લેક સ્પોટ’ની ઓળખ
નીતિન ગડકરીએ જણાવ્યું હતું કે રાષ્ટ્રીય ધોરીમાર્ગો પરના અમુક સ્થળોને મૃત્યુ અને ગંભીર ઇજાઓ સાથે સંકળાયેલા ચોક્કસ અકસ્માતોની સંખ્યાના આધારે ‘બ્લેક સ્પોટ’ તરીકે ઓળખ કરવામાં આવી આવે છે. તેમણે કહ્યું કે, “સરકારે આવા ‘બ્લેક સ્પોટ’ પર તાત્કાલિક ટૂંકા ગાળાના પગલાં લીધા છે. જેમ કે રોડ માર્કિંગ, સાઇનેજ, ક્રેશ બેરિયર્સ, રોડ સ્ટડ, ડિલિનેટર, અનધિકૃત મધ્ય ખુલ્લા સ્થળો બંધ કરવા, ટ્રાફિક ઘટાડવાના પગલાં વગેરે. રસ્તાની ડિઝાઇનમાં સુધારો, જંકશન સુધારણા, કેરેજવે પહોળો કરવો, અંડરપાસ/ઓવરપાસનું બાંધકામ વગેરે જેવા લાંબા ગાળાના પગલાં પણ લેવામાં આવ્યા છે.
10 વર્ષમાં 1.01 લાખ કિલોમીટરના નેશનલ હાઇવેનું નિર્માણ
લોકસભામાં પૂછાયેલા એક પ્રશ્નના જવાબમાં કેન્દ્રીય માર્ગ અને પરિવહન મંત્રી નીતિન ગડકરીએ જણાવ્યું હતું કે એપ્રિલ 2014 થી ડિસેમ્બર 2024 સુધીમાં દેશમાં 1.01 લાખ કિલોમીટરના રાષ્ટ્રીય ધોરીમાર્ગોનું નિર્માણ કરવામાં આવ્યું છે. હાલમાં, દેશમાં 32366 કિમી લંબાઈના 1366 રોડ પ્રોજેક્ટ્સ પર કામ ચાલી રહ્યું છે અને મોટાભાગના પ્રોજેક્ટ્સ 2028 સુધીમાં પૂર્ણ થવાની ધારણા છે.
