રમૂજી સવાલના મનમોજી જવાબ

દર્શન ભાવસાર

અમેરિકામાં ટ્રમ્પ આવ્યા. એમને સમર્થન આપવું કે વિરોધ કરવો? સમજાતું નથી.

• સમજ ના પડે ત્યાં સુધી મૌન રહો…
  શિયાળામાં સ્કૂલનો સમય મોડો કરવો જોઈએ?
  
• ચર્ચા ચાલુ રાખો. શિયાળો પૂરો થઈ જશે…
  હવે તો વર-વધૂ માટે પણ લગ્નના કપડાં ભાડે મળે છે.
  
• રાહ જુઓ. ભવિષ્યમાં વેવાઈ-વેવાણ ને મહેમાનો પણ ભાડાથી મળશે….
  જાનૈયાઓની સાથે વરરાજા પણ જાહેરમાં કેમ ડાન્સ કરે છે?
  
• જાહેરમાં નાચવાની આ છેલ્લી તક હોય છે….
  કંકોત્રીમાં ‘નો ગિફ્ટ’ લખ્યું હોય, પણ રોકડ ચાંલ્લો આપો તો લઈ લે. આવું કેમ?
  
• એમાં રોકડ ચાંલ્લો લેવાની ના લખી નથી હોતી…
  પત્ની પિયર જવાનું કહેતી નથી. શું કરું?
  
• તમે સાસરે જવાનું બોલવાનું શરૂ કરો….
  મારે ફિલ્મમાં કામ કરવું છે.
  
• કરો. ફિલ્મ રિલીઝ થાય તો ટિકિટ મોકલજો…
  મને ટીવી ડિબેટમાં બોલાવે છે તો શું કરું ?
  
• જાવ એ પહેલાં પત્ની સાથે દલીલ કરતાં શીખી લો….
  કાગડો દહીંથરું લઈ ગયો. હવે શું?
  
• કાગડો પાછો આવે તો પૂછી લે જો….
  પંચતંત્રની વાતો આજે ચાલે ખરી?
  
• જમાનો પ્રપંચ તંત્રનો છે…
  સ્વપ્નની દરેક વાત સાચી પડે તો ?
  
• જાગ્યા પછી જાહેરમાં મારામારી થઈ જાય…
  ચલણી સિક્કાની બે બાજુ હોય તો ખોટા સિક્કાની?
  
• ચારેબાજુ…
  બૅન્કનું ઉઠમણું થાય તો કોણ રડે?
  
• જેનું એમાં ખાતું ન હોય એ જાહેરમાં વધુ રડે…
  શૅરબજાર નીચું જાય તો શું ઊંચું જાય?
  
• શૅરહોલ્ડરનું બ્લડ પ્રેશર….
  ભ્રષ્ટાચારની કમાણીથી બનાવેલા ઘરની તકતી પર કટકી કૃપા કેમ લખાતું નથી?
  
• યે અંદર કી બાત હૈ…