રાજકોટઃ સ્મૃતિ મંધાનાનાં સુકાનમાં ભારતની મહિલા ટીમે અહીં આજે આયરલૅન્ડને બીજી વન-ડેમાં 116 રનથી હરાવીને સિરીઝની ટ્રોફી પર 2-0ની વિજયી સરસાઈ સાથે કબજો કરી લીધો હતો.
જેમાઇમા રૉડ્રિગ્સ આ મૅચની સુપરસ્ટાર હતી. વન-ડેમાં તે ભારતની સેક્નડ-ફાસ્ટેસ્ટ સેન્ચુરિયન બની હતી તેમ જ તેણે વન-ડેમાં 1,000 રનની સિદ્ધિ પણ મેળવી હતી. આખી મૅચમાં ભારતીય બૅટર્સે કુલ 44 ફોર અને ત્રણ સિક્સર ફટકારી હતી.
આપણ વાંચો: સ્મૃતિ મંધાનાનું મોટું પરાક્રમ, આવું કરનારી ભારતની બીજી બૅટર બની…
જેમાઇમાને ગિટાર વગાડવાનો બહુ શોખ છે અને સાથીઓની વચ્ચે ક્યારેક પોતાની આ કળા બતાવતી રહેતી હોય છે. તેણે આજે સેન્ચુરી ફટકાર્યા બાદ મેદાન પર બૅટને ગિટારની જેમ બતાવીને જાણે ગિટાર વગાડી રહી હોય એ સ્ટાઇલમાં પહેલી જ આંતરરાષ્ટ્રીય સેન્ચુરી (102 રન) સેલિબે્રટ કરી હતી.
ભારતે 371 રનનો લક્ષ્યાંક આપ્યા બાદ આયરિશ ટીમ ભારતીય બોલર્સને લડત આપીને 50 ઓવરમાં સાત વિકેટે 254 રન બનાવી શકી હતી. વાઇસ-કૅપ્ટન અને સ્પિનર દીપ્તિ શર્માએ સૌથી વધુ ત્રણ વિકેટ અને આઠ મૅચની અનુભવી સ્પિનર પ્રિયા મિશ્રાએ બે વિકેટ તેમ જ પેસ બોલર ટિટાસ સાધુ તથા સાયલી સતઘરેએ એક-એક વિકેટ લીધી હતી. આયરલૅન્ડની ટીમમાં વિકેટકીપર ક્રિસ્ટિના કૉલ્ટર રિલીના 80 રન હાઇએસ્ટ હતા.
એ પહેલાં, ભારતે ટૉસ જીતીને બૅટિંગ પસંદ કર્યા બાદ 50 ઓવરમાં પાંચ વિકેટે 370 રન બનાવ્યા હતા. વન-ડેમાં ભારતનો આ નવો હાઇએસ્ટ ટીમ-સ્કોર છે. જેમાઇમાએ 102 રન 122 મિનિટ સુધી ક્રીઝ પર રહીને 91 બૉલમાં બાર ચોક્કાની મદદથી બનાવ્યા હતા.
આપણ વાંચો: રાજકોટમાં આવતી કાલથી સ્મૃતિ મંધાનાની ટીમની કઈ મોટી કસોટી છે, જાણો છો?
તેની અને હર્લીન દેઓલ (89 રન, 84 બૉલ, બાર ફોર) વચ્ચે ત્રીજી વિકેટ માટે 168 બૉલમાં 183 રનની ભાગીદારી થઈ હતી. જેમાઇમા ભારતની સેક્નડ-ફાસ્ટેસ્ટ વન-ડે સેન્ચુરિયન છે. તેણે 90 બૉલમાં 100 રન બનાવ્યા હતા. હરમનપ્રીત કૌર 89 બૉલમાં ફટકારેલી સદી સાથે આ લિસ્ટમાં મોખરે છે.
જેમાઇમા-હર્લીનની ભાગીદારી પહેલાં કૅપ્ટન સ્મૃતિ મંધાના (73 રન, 54 બૉલ, બે સિક્સર, દસ ફોર) તથા નવી સાથી-ઓપનર પ્રતીકા રાવલ (67 રન, 61 બૉલ, એક સિક્સર, આઠ ફોર) વચ્ચે 114 બૉલમાં 156 રનની પાર્ટનરશિપ થઈ હતી. આ બન્ને ભાગીદારી આયરલૅન્ડની ટીમને ભારે પડી હતી. જો બેમાંથી એક પાર્ટનરશિપ ન થઈ હોત તો ભારતે કદાચ આ મૅચમાં પરાજય જોવો પડ્યો હોત.
જેમાઇમાને પ્લેયર ઑફ ધ મૅચનો અવૉર્ડ અપાયો હતો.