નવી દિલ્હીઃ બુધવારે આંધ્ર પ્રદેશના તિરુપતિ મંદિરના વિષ્ણુ નિવાસમાં વૈકુંઠ દ્વાર ખાતે સર્વ દર્શન ટોકન વિતરણ દરમિયાન થયેલી નાસભાગમાં 6 લોકોના મોત થયા હતા, જ્યારે 25 લોકો ઘાયલ થયા હતા. આ ઘટના તિરુપતિમાં વિષ્ણુ નિવાસ અને રામાનાયડુ સ્કૂલ વિસ્તાર પાસે બની હતી. મળતી માહિતી મુજબ, વૈકુંઠ દ્વાર દર્શનની ટિકિટ માટે તિરુપતિના વિવિધ ટિકિટ સેન્ટરો પર સવારથી જ મોટી સંખ્યામાં શ્રદ્ધાળુઓ કતારમાં ઉભા હતા. ગંભીર રીતે ઘાયલ ઘણા લોકોને રુઇયા હોસ્પિટલમાં લઈ જવામાં આવ્યા છે, જ્યાં તેમની સારવાર ચાલી રહી છે.
ઘટનાસ્થળેથી બહાર આવેલા વીડિયોમાં ભાગદોડ જેવી સ્થિતિ જોઈ શકાય છે. ઘટના પછી તરત જ, એમ્બ્યુલન્સ ઘાયલોને લઈને હોસ્પિટલ જવા રવાના થઈ ગઈ. વીડિયોમાં ઘણા ભક્તો જમીન પર પડેલા પણ જોવા મળે છે. પોલીસકર્મીઓ અને અન્ય લોકો પણ તેમને CPR આપતા જોઈ શકાય છે. તે જ સમયે, કેટલાક શ્રદ્ધાળુઓને ખુરશીઓ પર બેસાડીને સલામત સ્થળોએ લઈ જવામાં આવી રહ્યા છે. આંધ્રપ્રદેશના મુખ્ય પ્રધાન ચંદ્રબાબુ નાયડુએ પણ તિરુપતિ મંદિર સંકુલમાં થયેલી ભાગદોડની ઘટના પર ઊંડો શોક વ્યક્ત કર્યો છે અને અધિકારીઓ સાથે ફોન પર ઘટનામાં ઘાયલ થયેલા લોકોને આપવામાં આવતી સારવાર અંગે વાત કરી છે. મુખ્ય પ્રધાન સમયાંતરે જિલ્લા અને ટીટીડી અધિકારીઓ સાથે વાત કરીને વર્તમાન પરિસ્થિતિ વિશે માહિતી લઈ રહ્યા છે. મુખ્ય પ્રધાને ઉચ્ચ અધિકારીઓને સ્થળની મુલાકાત લેવાનો આદેશ આપ્યો છે.
મલ્લિકા નામના એક મૃતકના પતિએ જણાવ્યું હતું કે, “મારી પત્ની અને અન્ય લોકો વૈકુંઠ દ્વાર દર્શનની ટિકિટ લેવાનો પ્રયાસ કરી રહ્યા હતા, ત્યારે નાસભાગ મચી ગઈ, જેના પરિણામે તેનું મૃત્યુ થયું હતું.” વડાપ્રધાન નરેન્દ્ર મોદીએ આ ઘટના પર શોક વ્યક્ત કર્યો હતો અને જણાવ્યું હતું કે. “તિરુપતિ, આંધ્રપ્રદેશમાં નાસભાગથી દુઃખી છુ. મારા વિચારો તે લોકો સાથે છે જેમણે તેમના નજીકના અને પ્રિયજનોને ગુમાવ્યા છે. હું પ્રાર્થના કરું છું કે ઘાયલો જલ્દી સ્વસ્થ થઈ જાય. આંધ્ર પ્રદેશની સરકાર અસરગ્રસ્તોને તમામ શક્ય સહાય પૂરી પાડી રહી છે,”
Also read: તિરુપતિ મંદિરમાં મચી નાસભાગ, 4 શ્રદ્ધાળુનાં મોત…
દરમિયાન, ટીટીડીના અધ્યક્ષ બીઆર નાયડુએ એક પ્રેસ કોન્ફરન્સ દરમિયાન જણાવ્યું હતું કે નાસભાગ એ “એક અકસ્માત” હતો. “આ એક દુર્ભાગ્યપૂર્ણ ઘટના છે, જેમાં 6 યાત્રાળુઓએ જીવ ગુમાવ્યો છે. અત્યાર સુધીમાં, ફક્ત એક જ યાત્રાળુની ઓળખ થઈ શકી છે, જ્યારે અન્યની ઓળખ થવાની બાકી છે. મુખ્ય પ્રધાન ચંદ્રબાબુ નાયડુ આ ઘટના અંગે ખૂબ જ ગંભીર છે અને અધિકારીઓ સાથે વાતચીતમાં અસંતોષ વ્યક્ત કર્યો છે,” એમ ટીટીડી (તિરુમાલા તિરુપતિ દેવસ્થાનમ)ના ચેરમેને જણાવ્યું હતું. એમ પણ જાણવા મળ્યું છે કે આ ઘટના બાદ મુખ્ય પ્રધાને મંદિરના સંચાલકોનો પણ ઉધડો લીધો હતો અને સવાલ કર્યો હતો કે, “બહોળી સંખ્યામાં શ્રદ્ધાળુઓ હાજરી આપશે તે જાણીને પર્યાપ્ત વ્યવસ્થા કેમ કરવામાં આવી ન હતી? શું આવી સંવેદનશીલ પરિસ્થિતિઓને સંચાલિત કરવામાં અત્યંત તકેદારી અને જવાબદારી સુનિશ્ચિત કરવી મહત્વપૂર્ણ નથી?” તેમણે TTD અધિકારીઓને ટોકન વિતરણ કાઉન્ટરોના સંચાલનની પુનઃસમીક્ષા કરવા અને ભવિષ્યમાં આવી ઘટનાઓને રોકવા માટે સુરક્ષા વ્યવસ્થા વધારવાનો આદેશ આપ્યો હતો. મુખ્ય પ્રધાને જાહેરાત કરી છે કે તેઓ ઘાયલોને વ્યક્તિગત રીતે મળવા અને પરિસ્થિતિનું મૂલ્યાંકન કરવા આવતીકાલે સવારે તિરુપતિની મુલાકાત લેશે.
દરમિયાન કોંગ્રેસના નેતા રાહુલ ગાંધીએ પાર્ટીના તમામ નેતાઓ અને કાર્યકરોને “આ મુશ્કેલ સમયમાં તમામ શક્ય સહાય પૂરી પાડવા” વિનંતી કરી છે. નોંધનીય છે કે ટીટીડીના અધિકારીઓ ત્રણ દિવસમાં 40,000 પ્રતિ દિવસના દરે 1.2 લાખ ટોકન જારી કરશે. આ સાથે, વૈકુંઠ દ્વાર સર્વ દર્શન ટોકન માટે મોટી સંખ્યામાં ભક્તો ઉમટ્યા છે.