દેશના અર્થતંત્રમાં ધીમી વૃદ્ધિને સપોર્ટ કરવા CII એ RBI ને કહી આ વાત

નવી દિલ્હી : દેશના અર્થતંત્રમાં ધીમી વૃદ્ધિના સંકેત વચ્ચે હવે કોન્ફેડરેશન ઓફ ઈન્ડિયન ઈન્ડસ્ટ્રીએ (CII) આરબીઆઇ (RBI) પાસે વ્યાજ દર ઘટાડવાની આશા વ્યક્ત કરી છે. તેમજ આગામી બજેટમાં જરૂરી હસ્તક્ષેપ દ્વારા રોજગાર નિર્માણને પ્રોત્સાહન આપવાની જરૂરિયાત પર ભાર મૂકવામાં આવ્યો છે.

આ પણ વાંચો: અરુણાચલ સરકારે અર્થતંત્રને વેગ આપવા માટે ‘મિશન અરુણ હિમવીર’ શરૂ કર્યું

શ્રમ સુધારાઓને આગળ ધપાવવામાં આવશે

સીઆઇઆઇના પ્રમુખ સંજીવ પુરીએ ખાદ્ય ફુગાવાને નિયંત્રિત કરવા અને કૃષિમાં સ્થિતિસ્થાપકતા લાવવા તેને વ્યાજ દરોથી અલગ કરવાની જરૂરિયાત પર ભાર મૂક્યો. નાણામંત્રી નિર્મલા સીતારમણ 1 ફેબ્રુઆરીએ સંસદમાં બજેટ રજૂ કરવા જઈ રહ્યા છે. કોન્ફેડરેશન ઓફ ઈન્ડિયન ઈન્ડસ્ટ્રી ના વડાએ કહ્યું કે તેઓ આશાવાદી છે કે સરકાર દ્વારા ખૂબ જ જરૂરી શ્રમ સુધારાઓને આગળ ધપાવવામાં આવશે. તેનાથી અર્થવ્યવસ્થાને ફાયદો થશે અને વધુ રોજગારીનું સર્જન થશે.

ચીન દ્વારા વધારાના સ્ટોક ડમ્પિંગનો મુદ્દો ઉઠાવ્યો

સીઆઇઆઇ ચેરમેને વધુમાં જણાવ્યું હતું કે જાહેર ખર્ચ વધી રહ્યો છે અને વપરાશમાં પણ વધારો થવો જોઈએ. તેમણે ઉમેર્યું હતું કે સીઆઇઆઇ અપેક્ષા રાખે છે કે રિઝર્વ બેન્ક ઓફ ઈન્ડિયા દ્વારા વ્યાજ દરોમાં ઘટાડો કરવામાં આવશે. પુરીએ ભારત સહિત વૈશ્વિક સ્તરે ચીન દ્વારા વધારાના સ્ટોક ડમ્પિંગનો મુદ્દો ઉઠાવ્યો હતો. તેમજ સરકારને સ્ટીલ, પેપરબોર્ડ, રસાયણો અને પોલિમર જેવા ચોક્કસ ક્ષેત્રો માટે લઘુત્તમ આયાત કિંમતો અને એન્ટિ-ડમ્પિંગ ડ્યુટી લાદવાની ઝડપી રીત પર વિચાર કરવા જણાવ્યું હતું.

ખાદ્ય ફુગાવા અને વ્યાજ દરોને નાણાકીય નીતિથી અલગ કરવા જોઈએ

આ ઉપરાંત સંજીવ પુરીએ કહ્યું કે અમે એવું પણ સૂચન કરી રહ્યા છીએ કે ફુગાવાના લક્ષ્યાંક માળખામાં ખાદ્ય ફુગાવા અને વ્યાજ દરોને નાણાકીય નીતિથી અલગ કરવા જોઈએ. ખાદ્ય ફુગાવો આબોહવા પરિવર્તનને કારણે છે અને ખરેખર નાણાકીય નીતિથી પ્રભાવિત નથી. સીઆઇઆઇ કેટલાક ક્ષેત્રોમાં શ્રમ સુધારાઓ પર ધ્યાન આપવા માટે અમુક પ્રકારની સંસ્થાકીય વ્યવસ્થા ગોઠવવાની ભલામણ કરે છે. પુરીએ એપેરલ, ફૂટવેર, ફર્નિચર, પર્યટન અને રિયલ એસ્ટેટ જેવા શ્રમ-સઘન ક્ષેત્રોમાં હસ્તક્ષેપો કરવા માટે અપીલ કરી હતી. તેમણે ભારપૂર્વક જણાવ્યું હતું કે પ્રવાસનને સુધરેલી માળખાકીય પરિસ્થિતિઓથી ફાયદો થઈ શકે છે જ્યારે એપેરલ પ્રોડક્શન લિન્ક્ડ ઈન્સેન્ટિવ્સ (PLI)2.0 સ્કીમનો લાભ મેળવી શકે છે.