ઉચ્ચ અભ્યાસ માટે અમેરિકા જતા ભારતીય વિદ્યાર્થીઓની સંખ્યામાં મોટો ઘટાડો, F-1 વિઝાના આંકડા જાણો
અમેરિકામાં પાંચ હજારથી વધુ કોલેજો અને યુનિવર્સિટીઓ છે, જ્યાં વિશ્વના દરેક ખૂણેથી વિદ્યાર્થીઓ અભ્યાસ કરવા આવે છે. અમેરિકા તેના ઉચ્ચ-ગુણવત્તાવાળા શિક્ષણ માટે જાણીતું છે. ભારતમાંથી પણ મોટા ભાગના વિદ્યાર્થીઓ ઉચ્ચ અભ્યાસ માટે અમેરિકા જવાનું પસંદ કરતા હોય છે. અહીં ભણતા વિદ્યાર્થીઓને નોકરી મળવાના ચાન્સ પણ વધુ હોય છે, પણ આ ચિત્ર હવે બદલાઇ રહ્યું હોય એમ લાગી રહ્યું છે. અમેરિકન સંસ્થાઓમાં અભ્યાસ કરતા ભારતીય વિદ્યાર્થીઓની સંખ્યામાં ભારે ઘટાડો જોવા મળ્યો છે. કોવિડ રોગચાળા પછી આ સૌથી મોટો ઘટાડો છે.
યુએસ સ્ટેટ ડિપાર્ટમેન્ટના ડેટા દર્શાવે છે કે ગયા વર્ષના સમાન સમયગાળાની સરખામણીમાં 2024ના પ્રથમ નવ મહિનામાં ભારતીયોને આપવામાં આવેલા F-1 સ્ટુડન્ટ વિઝામાં 38 ટકાનો ઘટાડો થયો છે. અમેરિકન કોલેજોમાં પ્રવેશ ઘટી રહ્યો છે, જે દર્શાવે છે કે ભારતીય વિદ્યાર્થીઓને આપવામાં આવેલ F-1 વિઝા રોગચાળા પછીના તેમના સૌથી નીચા સ્તરે પહોંચી ગયા છે. ઉચ્ચ અભ્યાસ માટેવિદેશ જનારા વિદ્યાર્થીઓ હવે યુકે અને જર્મની જેવા દેશની પસંદગી કરે છે.
આ વર્ષે જાન્યુઆરીથી સપ્ટેમ્બર સુધીમાં, 64,008 વિઝા જારી કરવામાં આવ્યા હતા – જે 2023 ના સમાન મહિનામાં 1,03,495 થી નોંધપાત્ર ઘટાડો થયો છે. ડેટા દર્શાવે છે કે 2021 માં સમાન સમયગાળા દરમિયાન 65,235 અને 2022 માં 93,181 વિઝા આપવામાં આવ્યા હતા. રોગચાળાના વર્ષમાં 2020, માત્ર 6,646 F-1 પ્રથમ નવ મહિના દરમિયાન ભારતીયોને વિઝા આપવામાં આવ્યા હતા.
આ ઘટાડો માત્ર ભારતીય વિદ્યાર્થીઓ પૂરતો મર્યાદિત નથી. અમેરિકામાં આવનારા ચાઈનીઝ વિદ્યાર્થીઓની સંખ્યામાં પણ મોટો ઘટાડો જોવા મળ્યો છે. 2023ની સરખામણીમાં 2024માં ચીનના 8 ટકા ઓછા વિદ્યાર્થીઓ ઉચ્ચ અભ્યાસ માટે અમેરિકા ગયા છે.
F-1 વિઝા એ યુએસમાં શૈક્ષણિક સંસ્થાઓમાં પ્રવેશ મેળવવા માંગતા વિદ્યાર્થીઓ માટે નોન-ઇમિગ્રન્ટ કેટેગરી છે. જ્યારે M-1 વિઝા વ્યાવસાયિક અને બિન-શૈક્ષણિક કાર્યક્રમોને આવરી લે છે.
