હેપ્પી બર્થ ડેઃ સદીના મહાનાયક થયા 81 વર્ષના
એક બે નહીં પાંચેક દાયકાથી પણ વધારે સમય બોલીવૂડ પર રાજ કરનારા સદીના મહાનાયક, શહેનશાહ, સુપરસ્ટાર, મેગાસ્ટાર, એંગ્રી યંગમેન, બીગબીનો આજે જન્મદિવસ છે. 81 વર્ષના બીગ બી આજે પણ એટલા જ ફીટ એન્ડ ફાઈન છે અને તમામ સિનિયર સિટિઝન માટે પ્રેરણારૂપ છે. આ ઉંમરે પણ કામ કરવાની તેમની ધગશ અને તૈયારી યુવાનોને પણ શરમાવે તેવી છે.
અમિતાભ બચ્ચન સોશિયલ મીડિયા પર ખૂબ જ એક્ટિવ રહે છે. તે અવારનવાર પોતાના ફેન્સ માટે તસવીરો શેર કરતી રહે છે. બિગ બી આજે તેમનો 81મો જન્મદિવસ ઉજવી રહ્યા છે. અમિતાભ બચ્ચન લગભગ પાંચ દાયકાથી ઇન્ડસ્ટ્રી પર રાજ કરી રહ્યા છે. આજે આપણે તેમના જન્મદિવસ પર તેમના જીવન સાથે જોડાયેલી કેટલીક વાતો જાણીએ.
અમિતાભ બચ્ચનનો જન્મ 11 ઓક્ટોબર, 1942ના રોજ ઉત્તર પ્રદેશના અલ્હાબાદ જિલ્લામાં થયો હતો. વિશ્વ વિખ્યાત કવિ પિતા હરિવંશરાય બચ્ચન અને સુશિક્ષિત માતા તેજી બચ્ચનનું આ સંતાન હાલમાં ભલે સફળતાના શિખરે હોય, પણ શરૂઆતમાં ઘણો જ સંઘર્ષ વેઠી ચૂક્યો છે. અભિનેતા માટે અહીં પહોંચવું બિલકુલ સરળ ન હતું. પોતાની કારકિર્દીની શરૂઆતમાં બિગ બીને તેમની ઊંચાઈથી લઈને અવાજ સુધી ઘણી ટીકાઓનો સામનો કરવો પડ્યો હતો. જો કે, તેણે હાર માની નહીં. એટલું જ નહીં તેમના જીવનમાં ઘણા એવા પડાવ આવ્યા, જેમાં કોઈ પણ માણસ હારી જાય, પણ બચ્ચન એટલા જ જોશથી ફરી બેઠા થયા.
તેમના જીવનમાં એક સમય એવો આવ્યો જ્યારે તેમણે મોતને નજીકથી જોયું. આ ઘટનાને બીગ બીનો બીજો જન્મ જ કહેવાય છે. 11 ઓક્ટોબરે પ્રથમ જન્મદિવસ ઉજવે છે. તેમનો જન્મ આ દિવસે થયો હતો અને 2 ઓગસ્ટના રોજ તેમનો બીજો જન્મદિવસ ઉજવે છે. વર્ષ 1982માં આ દિવસે તેમનો બીજી વખત જન્મ થયો હતો. 24 જુલાઈ, 1982ના રોજ, બેંગલુરુમાં ફિલ્મ ‘કુલી’ના એક્શન સીન દરમિયાન, અમિતાભ બચ્ચનને આકસ્મિક રીતે પુનીત ઈસારે પેટમાં મુક્કો માર્યો હતો.
આ દરમિયાન બિગ બીની હાલત એટલી ખરાબ થઈ ગઈ હતી કે તેમને તાત્કાલિક હોસ્પિટલમાં દાખલ કરવામાં આવ્યા હતા. ડૉક્ટરોએ તેમના પર અનેક સર્જરી કરી. આ સર્જરી બાદ તેને મુંબઈની બ્રિજ કેન્ડી હોસ્પિટલમાં શિફ્ટ કરવામાં આવ્યા હતા. આ પછી પણ અમિતાભની તબિયતમાં કોઈ સુધારો ન થયો, જેના કારણે ડોક્ટરોએ તેમનું બીજું ઓપરેશન કરવું પડ્યું. ડોક્ટરોએ જણાવ્યું હતું કે બિગ બીની હાલત ખૂબ જ નાજુક છે. લાખો ચાહકોએ પોતાના ફેવરીટ એંગ્રી યંગમેનની જિંદગી માટે પૂજા, માનતા, ઉપવાસ કર્યા. 2 ઓગસ્ટના રોજ તેણે અચાનક અંગૂઠો ખસેડ્યો હતો. આ પછી ધીમે ધીમે તેની તબિયતમાં સુધારો થવા લાગ્યો. આથી આ દિવસે તેનો બીજો જન્મ થયો હોવાનું માનવામાં આવે છે.
આ સમય દરમિયાન માત્ર અમિતાભ બચ્ચનનો પરિવાર જ નહીં પરંતુ તેમના લાખો ચાહકો પણ તેમના સ્વસ્થ થવા માટે પ્રાર્થના કરી રહ્યા હતા. અમિતાભ બચ્ચનને 24 સપ્ટેમ્બરે હોસ્પિટલમાંથી રજા આપવામાં આવી હતી. આ દરમિયાન મોટી સંખ્યામાં ચાહકો તેમને મળવા પહોંચ્યા હતા. બિગ બીએ હૉસ્પિટલની બહાર પ્રશંસકોને કહ્યું હતું કે, ‘તે જીવન અને મૃત્યુ વચ્ચેની ભયાનક અગ્નિપરીક્ષા હતી. બે મહિનાની હોસ્પિટલમાં રહેવાની અને મૃત્યુ સાથેની લડાઈ પૂરી થઈ. હવે હું મૃત્યુને જીતીને મારા ઘરે પાછો ફરી રહ્યો છું.
બચ્ચન પરિવાર આજે પણ બોલીવૂડનો સૌથી પ્રોમિસિંગ પરિવાર માનવામાં આવે છે. પત્ની જયા બચ્ચન, પુત્ર અભિષેક, પુત્રવધુ ઐશ્વર્યા, દિકરી શ્વેતા અને તેમના સંતાનો સાથે બીગબીની તસવીરો સોશિયલ મીડિયામાં સતત વાયરલ થતી હોય છે. આજે પણ બીગ બીની એક ઝલક જોવા તેમના ઘરની બહાર લાઈન લાગે છે. નિર્માતાઓ તેમના નામ પર જ કરોડ ખર્ચી નાખવા તૈયાર થઈ જાય છે. ગમે તેટલી મોટી બ્રાન્ડની પહેલી પસંદ બચ્ચન જ હોય છે. ટીવી શૉ કેબીસીમાં પણ તેમણે કમાલ કરી છે. હજુ તેઓ આમ જ મનોરંજન પીરસતા રહે તેવી તેમને શુભકામના
