નરેન્દ્ર મોદીની હત્યા અને મોદી સ્ટેડિયમને ફૂંકી મારવાની ધમકી
મુંબઈ: હાલ વર્લ્ડ કપ-૨૦૨૩ની મેચ ચાલી રહી છે ત્યારે વડા પ્રધાન નરેન્દ્ર મોદીની હત્યા કરવાની અને મોદી સ્ટેડિયમને ફૂંકી મારવાની ધમકી આપવામાં આવી છે. ધમકી આપનારી વ્યક્તિએ ૫૦૦ કરોડ રૂપિયા ઉપરાંત ગેન્ગસ્ટર લોરેન્સ બિશ્ર્નોઇને છોડી દેવાની માગણી કરી છે.
એનઆઇએ (નેશનલ ઇન્વેસ્ટિગેશન એજન્સી) દ્વારા આ અંગેની જાણ મુંબઈ પોલીસને કરવામાં આવી હોવાનું સૂત્રો પાસેથી જાણવા મળ્યું હતું.
સેન્ટ્રલ એજન્સીને અજાણી વ્યક્તિએ ધમકીભર્યો ઇ-મેઇલ મોકલ્યો હતો, જેમાં જણાવવામાં આવ્યું છે કે તમારી સરકાર પાસેથી ૫૦૦ કરોડ રૂપિયા અને લોરેન્સ બિશ્ર્નોઇ અમને જોઇએ છે. નહીં તો મોદીની હત્યા અને મોદી સ્ટેડિયમને ફૂંકી મારવામાં આવશે. તમે કેટલી પણ સુરક્ષા પૂરી પાડો, પણ બચાવી શકશો નહીં. સંપર્ક સાધવો હોય તો આ જ ઇ-મેઇલ પર સંપક સાધશો. દરમિયાન આવો ઇ-મેઇલ મળ્યા બાદ સુરક્ષા એજન્સીઓને સતર્ક કરી દેવાઇ હતી.
