એક કરોડની રકમ લઈ જતા બેંક મેનેજરની હત્યા
ગુજરાતમાં એક ખાનગી બેંકના 45 વર્ષીય બ્રાન્ચ મેનેજર 1.17 કરોડ રૂપિયા રોકડા લઈને બીજી બ્રાન્ચમાં ટ્રાન્સફર કરવા માટે જઈ રહ્યા હતા. આ સમયે મંગળવારે રાત્રે મહિસાગર જિલ્લામાં સંતરામપુર ખાતે તેમની હત્યા કરી દેવામાં આવી છે. વિશાલ પાટીલ ICICI બેન્કની બાલાસિનોર બ્રાન્ચ ખાતે મેનેજર તરીકે કામ કરી રહ્યા હતા. તેવામાં મંગળવારે બપોરે તેઓ 1.17 કરોડ રૂપિયાની રોકડ રકમ લઈને દાહોદમાં આવેલી મેઈન બ્રાન્ચે જવા નીકળ્યા હતા. આ સમયે પહેલા ગાડી બગડી અને પછી તેમની સાથે અઘટિત ઘટના ઘટી હોવાનું અનુમાન લગાવાઈ રહ્યું છે.
સૂત્રો દ્વારા મળતી માહિતી અનુસાર તેઓ સૌથી પહેલા પોતાના પુત્રને મળવા લુનાવાડા ગયા હતા અને પછી ત્યાંથી દાહોદમાં જવા નીકળ્યા હતા. તેવામાં મેનેજરે એક મેઈન બ્રાન્ચના અધિકારીને ફોન કર્યો કે મારી ગાડી ખરાબ થઈ ગઈ છે હું તેને ઠીક કરાવી રહ્યો છું. લગભગ આ અંગે તેમણે સાંજે 7.30 વાગ્યે ફોન કર્યો હતો. ત્યાર પછી પાટીલે ફરીથી ફોન કર્યો કે હું નીકળી રહ્યો છું. આ સમયે તેમણે તમામ ડોક્યુમેન્ટ્સ અને રોકડ રકમનો ફોટો પણ મોકલ્યો હોવાનું જાણવા મળે છે.
બ્રાન્ચના મેનેજરે આ સમયે પત્નીને ફોન કર્યો કે હું 9 વાગ્યા સુધીમાં ઘરે પહોંચી જાઉં છું, ઉલ્લેખનીય છે કે મોડી રાત થઈ ગઈ છતા વિશાલ પાટીલ ઘરે ન પહોંચતા પત્નીએ મેઈન બ્રાન્ચે ફોન કર્યા હતા. આ અંગે પછી બેન્કના અધિકારીઓ અને પત્નીએ મળીને પોલીસ સ્ટેશને ફરિયાદ નોંધાવી હતી. જેમાં પાટિલ 1.17 કરોડની રોકડ રકમ સાથે આવી રહ્યા હોવાનો પણ ઉલ્લેખ હતો.
તેવામાં પોલીસ તપાસમાં લુનાવાડાથી દાહોદ વચ્ચે તપાસ શરૂ થઈ તો મેનેજરની હ્યુન્ડાઈ ક્રેટા SUV બળેલી ખાખ થઈ ગઈ હતી. ત્યારપછી જોકે અંદર કોઈના મૃતદેહ નહોતા. પોલીસે આસપાસના વિસ્તારોની તપાસ શરૂ કરી દીધી હતી. ત્યારે અનુમાન લગાવાઈ રહ્યું છે કે સંતરામપુર-લુનાવાડા રોડ પાસે તેની સાથે લૂંટની ઘટના બની હશે.
બુધવાર સુધી પોલીસે તપાસ શરૂ જ રાખી હતી તેવામાં મોડી રાત્રે ગોધરાથી 15 કિલોમીટર દૂર આવેલા સુમસામ વિસ્તારમાંથી તેનો મૃતદેહ મળી આવ્યો છે. જોકે આ અંગે હજુ પોલીસ વધુ તપાસ કરી રહી છે અને જેની પણ સંડોવણી હશે તેની સામે મોટી કાર્યવાહી થઈ શકે છે, તેમ પોલીસે જણાવ્યું હતું.
