મુંબઈ : દેશમાં તહેવારોની સિઝન અને વ્યાજદરમાં ઘટાડાનો પ્રભાવ સોનાના ભાવ પર દેખાવા લાગ્યો છે. આંતરરાષ્ટ્રીય અને સ્થાનિક બંને બજારોમાં સોનાની ચમક સતત વધી રહી છે અને સોનાના ભાવ બંને સ્તરે ફરી નવા રેકોર્ડ સ્તરે પહોંચી(Gold All Time High)ગયા છે. સ્થાનિક બજારમાં સોનું રૂપિયા 76 હજારને પાર પહોંચી ગયું છે.
સોનું રૂપિયા 76 હજારને પાર
અમેરિકન બજારમાં મંગળવારે હાજર અને વાયદાના બંને સોદામાં સોનાની કિંમતમાં જબરદસ્ત વધારો જોવા મળ્યો હતો .જે ટ્રેડિંગ દરમિયાન એક સમયે 2,638.37 ડોલર પ્રતિ ઔંસની નવી ઊંચી સપાટીએ પહોંચ્યો હતો. જ્યારે યુએસ સોનાના ભાવિની કિંમત ઔંસ દીઠ 2,661.60 ડોલર પર પહોંચી ગઈ છે. જ્યારે સ્થાનિક બજારમાં સોનું રૂપિયા 76 હજારને પાર કરી ગયું હતું. મીડિયા અહેવાલ અનુસાર મંગળવારે ભારતીય બજારમાં 24 કેરેટ સોનાની કિંમત વધીને 76,330 રૂપિયા પ્રતિ 10 ગ્રામ થઈ ગઈ હતી.
ફેડરલ રિઝર્વે વ્યાજદરમાં ઘટાડો કર્યો
અમેરિકામાં ફેડરલ રિઝર્વ દ્વારા વ્યાજ દરમાં ઘટાડાથી શેરથી લઈને સોના અને ક્રિપ્ટો સુધીના વિવિધ એસેટ ક્લાસને ફાયદો થઈ રહ્યો છે. તાજેતરમાં ફેડરલ રિઝર્વે વ્યાજ દરમાં અપેક્ષા કરતાં 0.50 ટકા વધુ ઘટાડો કર્યો હતો. ફેડરલ રિઝર્વે પણ આ વર્ષે વધુ ઘટાડાનો સંકેત આપ્યો છે. તેની બાદ વિવિધ એસેટ ક્લાસમાં ફ્લો વધ્યો, જેનો ફાયદો સોનાને પણ થઈ રહ્યો છે.
તહેવારો દરમિયાન ખરીદી વધી જાય છે
વિશ્લેષકોનું માનવું છે કે આગામી દિવસોમાં સોનાના ભાવમાં વધુ વધારો થવાનો છે. સ્થાનિક સ્તરે જોવામાં આવે તો આગામી દિવસોમાં તહેવારોની હારમાળા વધુ વેગ પકડવાની છે. નવરાત્રિ પછી દિવાળી અને ધનતેરસ જેવા તહેવારો આવી રહ્યા છે. આ સિઝનમાં ભારતીય લોકો વધુ સોનું ખરીદે છે, કારણ કે તહેવારોના શુભ અવસર પર સોનું ખરીદવું શુભ માનવામાં આવે છે.
સોનું 78 હજાર રૂપિયા સુધી વધી શકે છે
આ સિવાય દેશમાં નવરાત્રિ બાદ લગ્નની સિઝન શરૂ થવા જઈ રહી છે. લગ્નની મોસમ પરંપરાગત રીતે ઊંચી ખરીદી અને સોનાની વધતી કિંમતોની મોસમ રહી છે. આ વખતે પણ લગ્નની સિઝનમાં સોનાની માંગ મજબૂત રહેવાની ધારણા છે. આ કારણથી બજારના નિષ્ણાતોનું કહેવું છે કે આગામી દિવસોમાં સ્થાનિક બજારમાં સોનું 78 હજાર રૂપિયા પ્રતિ 10 ગ્રામના સ્તરે પહોંચી શકે છે.
Also Read –
