વ્યાજખોરોના ત્રાસથી એક જ પરિવારના 9 લોકોનો આપઘાતનો પ્રયાસ…
રાજકોટ: વ્યાજખોરોના ત્રાસને ડામવાના ભલે દાવાઓ થતાં હોય પરંતુ તેમ છતાં આજદિન સુધી વ્યાજખોરોના ત્રાસથી આપઘાત કે સામૂહિક આપઘાતના બનાવો સામે આવતા રહે છે. ત્યારે રાજકોટમાં વ્યાજખોરોના ત્રાસના લીધે વધુ એક પરિવારે સામૂહિક આપઘાતનો પ્રયાસ કર્યો છે. રાજકોટના ગુંદાવાડીમાં રહેતા એક જ પરિવારના નવ સભ્યોએ ઝેરી દવા પી લઈને આપઘાતની કોશિશ કરતા ખળભળાટ મચી જવા પામ્યો છે.
પ્રાપ્ત વિગતો અનુસાર રાજકોટ શહેરના ગુંદાવાડી વિસ્તારમાં રહેતા સોની પરિવારના નવ સભ્યોએ ઝેરી દવા પી લઈને સામુહિક આપઘાતનો પ્રયાસ કર્યો છે. હાલ તમામને સિવિલ હોસ્પિટલ ખાતે સારવાર માટે ખસેડવામાં આવ્યા છે અને હાલ તમામની હાલત સ્થિર હોવાનું જાણવા મળી રહ્યું છે. નવ સભ્યોમાંથી એક સગીરનો પણ સમાવેશ થાય છે.
હાલ તો બેંક લોન ભરપાઈ ન કરી શકવાના કારણે સોની પરિવારે આ પગલું ભરી લીધું હોવાનું માનવામાં આવી રહ્યું છે. આ સિવાય સોની પરિવારની મુંબઈની પેઢી સાથે કરોડોની લેતીદેતી હોવાની વિગતો પણ સામે આવી છે. મુંબઈની 3 પેઢી દ્વારા સોની વેપારીના દાગીના લઈને પૈસા કે સોનાનું પેમેન્ટ ન કરતાં પરિવારે આપઘાત કર્યો હોવાનું મનાઈ રહ્યું છે.
દવા પીનાર પરિવારના સભ્યોના નામ
| 1 | લલીત વલ્લભદાસ આડેસરા | (ઉં.વ.72) |
| 2 | મીનાબેન લલીતભાઈ આડેસરા | (ઉં.વ.64) |
| 3 | ચેતન લલીતભાઈ આડેસરા | (ઉં.વ.45) |
| 4 | દિવ્યાબેન ચેતનભાઈ આડેસરા | (ઉં.વ.43) |
| 5 | જય ચેતનભાઈ આડેસરા | (ઉં.વ.21) |
| 6 | વિશાલ લલીતભાઈ આડેસરા | (ઉં.વ.43) |
| 7 | સંગીતા વિશાલભાઈ આડેસરા | (ઉં.વ.41) |
| 8 | સગીર | (ઉં.વ.15) |
| 9 | એક સભ્યની હાલત સુધાર પર છે |