Sri Krishna Janmabhoomi વિવાદ કેસમાં મુસ્લિમ પક્ષની અરજી પર સુપ્રીમ કોર્ટમાં સુનાવણી, જાણો કોર્ટે શું કહ્યું
મથુરા: સુપ્રીમ કોર્ટે આજે શ્રી કૃષ્ણ જન્મભૂમિ(Sri Krishna Janmabhoomi)વિવાદ કેસમાં મુસ્લિમ પક્ષની અરજી પર સુનાવણી કરી. મુસ્લિમ પક્ષે અલ્હાબાદ હાઈકોર્ટના આદેશ વિરુદ્ધ અરજી દાખલ કરી હતી. મથુરામાં કૃષ્ણ જન્મભૂમિ-શાહી ઈદગાહ વિવાદ સાથે સંબંધિત 18 કેસોની જાળવણીને પડકારતી તેમની અરજીને ફગાવી દીધી હતી. જસ્ટિસ સંજીવ ખન્ના અને જસ્ટિસ સંજય કુમારની બેંચે શાહી મસ્જિદ ઈદગાહની મેનેજમેન્ટ ટ્રસ્ટ કમિટી દ્વારા હાઈકોર્ટના 1 ઓગસ્ટના આદેશ વિરુદ્ધ દાખલ કરવામાં આવેલી અરજી પર સુનાવણી કરી હતી. મસ્જિદ પ્રબંધન સમિતિની અરજી એડવોકેટ આરએચએ સિકંદર દ્વારા દાખલ કરવામાં આવી છે.
સુનાવણી દરમિયાન શું થયું
સુનાવણી દરમિયાન સુપ્રીમ કોર્ટે હજુ સુધી મુસ્લિમ પક્ષને કોઈ રાહત આપી નથી. આજે સુપ્રીમ કોર્ટે મુસ્લિમ પક્ષની અરજી પર ન તો કોઈ સ્ટે મૂક્યો છે કે ન તો કોઈ આદેશ આપ્યો છે. સુપ્રીમ કોર્ટે મુસ્લિમ પક્ષને પહેલા એ નક્કી કરવા માટે કહ્યું છે કે તેઓ સિંગલ બેંચના નિર્ણયને અલ્હાબાદ હાઈકોર્ટની ડબલ બેંચમાં પડકારવા માંગે છે કે નહીં, ત્યારબાદ સુપ્રીમ કોર્ટ 4 નવેમ્બરથી શરૂ થતા સપ્તાહમાં તેની સુનાવણી કરશે.
આ પણ વાંચો : મથુરામાં ફૂડ પોઇઝનિંગને કારણે 50 લોકો હોસ્પિટલમાં દાખલ
શું છે સમગ્ર મામલો ?
ઉલ્લેખનીય છે કે, 1 ઓગસ્ટના રોજ હાઈકોર્ટે મથુરામાં મંદિર-મસ્જિદ વિવાદ સાથે સંબંધિત 18 કેસની જાળવણીને પડકારતી અરજીને ફગાવી દીધી હતી અને ચુકાદો આપ્યો હતો કે શાહી ઈદગાહનું ધાર્મિક ચરિત્ર નક્કી કરવાની જરૂર છે. હાઈકોર્ટે મુસ્લિમ પક્ષની દલીલને ફગાવી દીધી હતી કે કૃષ્ણ જન્મભૂમિ મંદિરની બાજુમાં આવેલી શાહી ઈદગાહ મસ્જિદ સંકુલના વિવાદને લગતા હિંદુ પક્ષકારો દ્વારા દાખલ કરાયેલા દાવાઓ પૂજાના સ્થળો અધિનિયમનું ઉલ્લંઘન કરે છે અને તેથી તે સ્વીકાર્ય નથી.
1991નો આ કાયદો દેશની આઝાદીના દિવસે અસ્તિત્વમાં હોય તેવા કોઈપણ ધાર્મિક સ્થળના ધાર્મિક ચરિત્રને બદલવા પર પ્રતિબંધ મૂકે છે. માત્ર રામજન્મભૂમિ-બાબરી મસ્જિદ વિવાદને તેના દાયરાની બહાર રાખવામાં આવ્યો હતો.
