નવી દિલ્હી : વડાપ્રધાન નરેન્દ્ર મોદીનો(PM Modi Birthday)આજે 74મો જન્મદિવસ છે. જેને લઈને ભાજપના આગેવાનો, કાર્યકરો અને સામાન્ય જનતામાં ઉજવણીનો માહોલ જોવા મળી રહ્યો છે. લોકસભા ચૂંટણીમાં ત્રીજી વખત જનાદેશ મળ્યા બાદ પીએમ મોદી એક પછી એક મોટા નિર્ણયો લઈ રહ્યા છે. તેમના અત્યાર સુધીના દસ વર્ષના કાર્યકાળ દરમિયાન તેમણે અનેક ઐતિહાસિક નિર્ણયો દ્વારા દેશને અને દુનિયાને નવી રાહ ચીંધી છે. આ કાર્યકાળ દરમ્યાન અનેક યાદગાર પળો પણ રહી છે.
આ પણ વાંચો : ‘ગુજરાત કે અંગને મે ચ્ંદ્રાબાબુ કા ક્યાં કામ હૈ’ ? મોદીએ નાયડુને ગુજરાત બોલાવી પઘડા ખેલ્યાં છે…
2024માં ત્રીજી વખત વડાપ્રધાન પદ સંભાળ્યું
વડાપ્રધાન મોદીની રાજકીય સફરની સૌથી મહત્વપૂર્ણ ક્ષણ ત્યારે આવી જ્યારે તેમણે 2024માં ત્રીજી વખત પીએમ પદ સંભાળ્યું. તેમના નેતૃત્વમાં ભાજપે નિર્ણાયક જનાદેશ હાંસલ કર્યો હતો. પીએમ મોદી પ્રથમ એવા બિન-કોંગ્રેસી નેતા છે જે જવાહરલાલ નેહરુ પછી સતત ત્રીજી વખત વડાપ્રધાન બન્યા છે. રસપ્રદ વાત એ છે કે વર્ષ 1962 પછી પ્રથમવાર કોઈ સરકાર તેની બે ટર્મ પૂરી કરીને ત્રીજી વખત સત્તામાં પરત આવી છે.
જ્યોર્જિયા મેલોની સાથેની સેલ્ફી સોશિયલ મીડિયા પર વાયરલ થઈ
ઈટાલીમાં G-7 સમિટ દરમિયાન વડાપ્રધાન નરેન્દ્ર મોદી અને ઇટલીના વડાપ્રધાન જ્યોર્જિયા મેલોનીની સેલ્ફી સોશિયલ મીડિયા પર વાયરલ થઈ હતી. મેલોનીએ લીધેલી તસવીરમાં બંને નેતાઓ હસતા જોવા મળ્યા હતા. આ દરમિયાન મેલોનીએ નમસ્તે કહીને પીએમ મોદીનું સ્વાગત કર્યું. પીએમ આવાસ 7 લોક કલ્યાણ માર્ગ પર અમેરિકી રાષ્ટ્રપતિ જો બાઇડેનને હોસ્ટ કરતા વડાપ્રધાન મોદીની તસવીરોએ ઘણી હેડલાઈન્સ બનાવી હતી. બાઇડેને ગયા વર્ષે સપ્ટેમ્બરમાં આયોજિત G-20 સમિટમાં ભાગ લેવા ભારત આવ્યા હતા. આ દરમિયાન બંને નેતાઓએ પ્રાદેશિક અને વૈશ્વિક મુદ્દાઓ પર વિચાર વિનિમય કર્યો હતો.
23 ઓગસ્ટે ઈન્ડિયા નેશનલ સ્પેસ ડે મનાવવાની જાહેરાત કરી
ચંદ્રયાન 3 મિશનની ઐતિહાસિક સફળતા બાદ પીએમ મોદીએ ઈન્ડિયન સ્પેસ રિસર્ચ ઓર્ગેનાઈઝેશન (ઈસરો)ના ચેરમેન એસ. સોમનાથને ગળે લગાડીને તેમની પીઠ થપથપાવે છે. આ દરમિયાન પીએમ મોદીએ દર વર્ષે 23 ઓગસ્ટે ઈન્ડિયા નેશનલ સ્પેસ ડે મનાવવાની જાહેરાત કરી હતી. ચંદ્ર પર લેન્ડર જ્યાંથી ઉતર્યું તે સ્થળનું નામ શિવ શક્તિ પોઈન્ટ હતું.
સેંગોલને લોકસભા અધ્યક્ષની ખુરશી પાસે રાખ્યો
નવી દિલ્હીમાં નવી સંસદ ભવનનું ઉદ્ઘાટન કરતા પહેલા વડાપ્રધાન મોદીએ તમિલનાડુના ઐતિહાસિક રાજદંડ સેંગોલને લોકસભા અધ્યક્ષની ખુરશી પાસે રાખ્યો હતો. આ દરમિયાન પીએમ મોદીએ સેંગોલ સમક્ષ પ્રણામ કર્યા હતા અને હાથમાં પવિત્ર રાજદંડ લઈને તમિલનાડુના પૂજારીઓ પાસેથી આશીર્વાદ લીધા હતા. આ પછી, વૈદિક મંત્રોચ્ચાર વચ્ચે, સેંગોલને નવા સંસદ ભવન લઈ જવામાં આવ્યો અને લોકસભા ચેમ્બરમાં સ્પીકરની ખુરશીની જમણી બાજુએ સ્થાપિત કરવામાં આવ્યો.
દેશના નામના કાર્ડ પર ‘ભારત’ લખવામાં આવ્યું હતું.
નવી દિલ્હીમાં G-20 સમિટમાં વડાપ્રધાન નરેન્દ્ર મોદીની સામે મૂકવામાં આવેલા દેશના નામના કાર્ડ પર ‘ભારત’ લખવામાં આવ્યું હતું. સમગ્ર સમિટ દરમિયાન વડાપ્રધાન મોદીને ‘ભારત’નું પ્રતિનિધિત્વ કરતા નેતા તરીકે ઓળખવામાં આવી હતી. પીએમ મોદીની આ તસવીર સોશિયલ મીડિયા પર આકર્ષણનું કેન્દ્ર બની રહી હતી. આ દરમિયાન પીએમ મોદીએ કહ્યું હતું કે G-20નું ભારતનું પ્રમુખપદ દેશની અંદર અને બહાર દરેકની એકતાનું પ્રતીક બની ગયું છે. તે ભારતમાં લોકોનું G-20 બની ગયું છે અને દેશભરમાં 200 થી વધુ બેઠકો યોજાઈ હતી.
તેજસ વિમાનમાં આકાશમાં ઉડાન ભરી
વડા પ્રધાન નરેન્દ્ર મોદીએ 2023 માં કર્ણાટકના બેંગલુરુમાં હિન્દુસ્તાન એરોનોટિક્સ લિમિટેડ સાઇટની મુલાકાત દરમિયાન તેજસ વિમાનમાં આકાશમાં ઉડાન ભરી હતી, જેની તસવીરોએ સોશિયલ મીડિયા પર હલચલ મચાવી હતી. આ દરમિયાન પીએમએ કહ્યું હતું કે તેજસમાં ઉડવું એક શાનદાર અનુભવ હતો. આ ઉડાનથી દેશની સ્વદેશી ક્ષમતાઓમાં તેમનો વિશ્વાસ વધુ વધ્યો. તેમણે કહ્યું કે તેઓ ગર્વ સાથે કહી શકે છે કે અમારી મહેનત અને સમર્પણને કારણે આપણે આત્મનિર્ભરતાના ક્ષેત્રમાં દુનિયામાં કોઈથી ઓછા નથી.
રોબોટ દ્વારા પીરસવામાં આવેલી ચાની મજા માણી
વડાપ્રધાન મોદીએ વર્ષ 2023માં અમદાવાદમાં રોબોટિક્સ ગેલેરીની મુલાકાત લીધી હતી. આ દરમિયાન પીએમ મોદીએ રોબોટ દ્વારા પીરસવામાં આવેલી ચાની મજા માણી હતી. વડા પ્રધાને તેમના ઇન્સ્ટાગ્રામ હેન્ડલ પર આ ક્ષણ શેર કરી હતી. જેમાં તેમણે કેપ્શન આપ્યું હતું, ‘રોબોટ દ્વારા ચા પીરસવાની તસવીર જોવાનું ચૂકશો નહીં.’ તેને લાખો લોકોએ પસંદ કર્યું હતું.
કૈલાશ વ્યુ પોઈન્ટથી આદિ કૈલાસના દર્શન કર્યા
વર્ષ 2023 માં વડા પ્રધાન નરેન્દ્ર મોદીએ ઉત્તરાખંડના પિથોરાગઢ જિલ્લામાં પાર્વતી કુંડમાં પૂજા અને ધ્યાન કર્યું હતું. આ પછી તેમણે કૈલાશ વ્યુ પોઈન્ટથી આદિ કૈલાસના દર્શન કર્યા હતા. આ આધ્યાત્મિક ક્ષણ દરમિયાન તેમણે ઢોલ અને શંખ પણ વગાડ્યા. 2024ની લોકસભા ચૂંટણી પ્રચારના પૂર્ણ થયા બાદ પીએમ મોદીએ કન્યાકુમારીમાં વિવેકાનંદ રોક મેમોરિયલમાં 45 કલાક ધ્યાન કર્યું. તેમણે સ્વામી વિવેકાનંદની પ્રતિમા સામે બેસીને ધ્યાન કર્યું. આ દરમિયાન પીએમ મોદીએ વિવેકાનંદ શિલા પાસે સ્થિત તમિલ કવિ તિરુવલ્લુવરની 133 ફૂટ ઊંચી પ્રતિમાની મુલાકાત લીધી હતી.
