રાહુલ દ્રવિડે બ્લેન્ક ચેકની ઓફર ફગાવી દીધી, કારણ જાણીને દ્રવિડ પ્રત્યે માન વધી જશે

મુંબઈ: ભારતના દિગ્ગજ ક્રિકેટર અને ટીમ ઈન્ડિયાના પૂર્વ કોચ રાહુલ દ્રવિડ (Rahul Dravid) તેમના ઉદાર સ્વભાવ માટે જાણીતા છે. કોચ તરીકે ભારતીય ટીમને નવી ઉંચાઈએ લઇ જવામાં તેમનો સિંહ ફાળો રહ્યો છે. ઇન્ડિયન પ્રીમિયર લીગ(IPL)ની 2025ની સિઝનમાં રાહુલ દ્રવિડ રાજસ્થાન રોયલ્સ(Rajasthan Royals)ના કેમ્પમાં જોવા મળશે. દ્રવિડ ફરી એકવાર રાજસ્થાનની ટીમમાં કોચ તરીકે ફરજ બજાવશે, રાહુલ દ્રવિડ IPLમાં રાજસ્થાન તરફથી પણ રમી ચુક્યા છે. તેઓ અગાઉ પણ ટીમના મેન્ટર પણ રહી ચુક્યા છે.

આ દરમિયાન રાહુલ દ્રવિડ સાથે જોડાયેલા એવા અહેવાલો પ્રકાશિત થયા છે, જે જાણીને તમારા મનમાં તેમના માટેનું માન વધુ વધી જશે. ભારતને T20 ચેમ્પિયન બનાવ્યા બાદ, રાહુલ દ્રવિડને ઘણી IPL ફ્રેન્ચાઈઝીઓ તરફથી ઓફર મળી હતી. એક અહેવાલ મુજબ, આઈપીએલની ઘણી ફ્રેન્ચાઈઝીઓએ રાહુલ દ્રવિડને તેમની સાથે જોડાવા માટે બ્લેન્ક ચેક પણ આપ્યો હતો, પરંતુ રાહુલ દ્રવિડ રાજસ્થાન સાથેના જૂના સંબંધોને કારણે એક પણ ઓફર સ્વીકારી ન હતી.

આ પણ વાંચો : ટેસ્ટ ટીમ જાહેર: કોણે કર્યું કમબૅક અને કોને મળ્યો મોકો?

રાહુલ દ્રવિડ 2008 થી 2010 દરમિયાન IPLમાં રોયલ ચેલેન્જર્સ બેંગ્લોર તરફથી રમ્યા હતાં. આ સમયગાળા દરમિયાન, તેમણે શાનદાર પ્રદર્શન કર્યું, પરંતુ જ્યારે ફ્રેન્ચાઇઝીએ તેને રિલીઝ કર્યા, ત્યારે રાજસ્થાન રોયલ્સે તેમના પર વિશ્વાસ દર્શાવ્યો. 2011ની હરાજીમાં રાજસ્થાન સિવાય કોઈ ટીમે રાહુલ દ્રવિડ પર બોલી લગાવી ન હતી. આ પછી ફ્રેન્ચાઇઝીએ દ્રવિડને કેપ્ટન પણ બનાવ્યો અને બાદમાં તે ટીમનો મેન્ટર પણ બન્યો. આ જ કારણ છે કે રાજસ્થાન રોયલ્સ સાથે દ્રવિડનો પરિવાર જેવો સંબંધ છે.

ક્રિકેટમાંથી નિવૃત્તિ લીધા બાદ રાહુલ દ્રવિડ ભારતની અંડર-19 ટીમના કોચ બન્યા હતા. આ સમયગાળા દરમિયાન, તેણે ઘણા યુવા ક્રિકેટરોને માર્ગદર્શન આપ્યું હતું. આ પછી દ્રવિડને ટીમ ઈન્ડિયાના કોચ બનવાની ઓફર મળી, જેને તેમણે સ્વીકારી લીધી અને લાંબા સમય સુધી ભારતીય ટીમના કોચ રહ્યા. ભારતે T20 વર્લ્ડ કપ 2024 જીત્યા બાદ દ્રવિડે અગાળ કોચ પદ રહેવા મનાઈ કરી હતી.