વાશીમમાં વૃદ્ધે જીદ કરતા મોતને આમંત્ર્યું, પણ દેવદૂત બની આવ્યો આ યુવક…
મુંબઈ: મહારાષ્ટ્રના અનેક ભાગોમાં જોરદાર વરસાદ વહી રહ્યો છે અને અનેક ભાગોમાં પાણી ભરાયા છે તેમ જ નદીઓ અને ડેમ છલકાઇ રહ્યા છે. આવામાં અનેક સ્થળો જીવ માટે જોખમી બની જાય છે. ઝરણાઓ, તળાવો, ડેમમાં ન્હાવા પડવું જીવનું જોખમ નોતરે છે અને આવી જ ઘટના મહારાષ્ટ્રના વાશિમ જિલ્લામાં બની હતી.
પાણી ભરાઇ જવાના કારણે પૂલ પરથી ખૂબ વેગમાં પાણી વહી રહ્યું હતું અને એવામાં પૂલ પાર કરવાની જીદ કરનારી એક વ્યક્તિ પાણીમાં તણાઇ ગઇ હોવાની ઘટના વાશિમ જિલ્લાના કારંજા તહેસીલમાં બની હતી.
આ પણ વાંચો: ગોહિલવાડ પર મેઘરાજા મહેરબાન; ઘોઘામાં ધસમસતા પ્રવાહમાં તણાઇ કાર
વૃદ્ધ વ્યક્તિ અને તેમની સાથે રહેલ એક શખ્સ પૂરના પાણીમાં તોફાને ચઢેલી નદીના ઝપેટમાં આવી ગયા હતા. બંને નદીના વહેણમાં તણાવા લાગતા નજીકમાં જ સુરક્ષિત સ્થળે ઊભેલા ગ્રામજનોએ હાહાકાર મચાવ્યો હતો. બંને જણનું મૃત્યુ નજીક છે તેવું જણાતું હતું તેવામાં આ દૃશ્ય જોઇ રહેલા યુવકોએ નદીમાં ઝંપલાવ્યું હતું અને ડૂબી રહેલા બંને જણને બચાવવાનો પ્રયાસ કર્યો હતો.
ભારે જહેમત બાદ બંને જણને બચાવવામાં સફળતા મળી હતી. આ ઘટનાનો વીડિયો ઇન્ટરનેટ પર વાઇરલ થઇ રહ્યો છે. વીડિયોમાં વૃદ્ધ અને તેની સાથે રહેલ વ્યક્તિ પાણીના જોરદાર વહેણ છતાં પુલ કરવાની જીદ કરી રહેલા દેખાય છે. પાસે રહેલા ગ્રામજનો તેમને પુલ પાર ન કરવા માટે બૂમો પાડે છે છતાં તેમની સલાહને અવગણીને વૃદ્ધ વ્યક્તિ પુલ પાર કરે છે અને અંતે પાણીમાં તણાઇ જાય છે. જોકે, સદ્ભાગ્યે યુવાનો તેમને આબાદ બચાવી લે છે